Tera te Aro ae Ko Riai n Rineia?
‘AARO aika kakaokoro, bon tii kawai aika kakaokoro ma a bane n nakon te tabo ae tii teuana. Ni koauana tii temanna te Atua, ke tiaki?’ Anne aia kaantaninga aomata aika mwaiti ake a namakinna bwa e ngae ngke e kakawaki kaainakin te Aro, ma e aki akaka bwa tera ana Aro te aomata ae e na rineia.
Tao e kona n taraa n riai te iango aei kioina ngke e bon eti bwa tii temanna te Atua, ae Moan te Mwaaka. (Itaia 44:6; Ioane 17:3; 1 I-Korinto 8:5, 6) Ma, ti aki kona n tarariaoi nako taian okoro aika kai noraki ao te bobuaka n iango, i buakon botaki n Aro aika bati ake a taku bwa a beku iroun te Atua ni koaua. A rangi n okoro n aia mwakuri, aia koaua, aia reirei, ao bwaai ake a tangiri. E rangi ni korakora te okoro, n te aro are te koraki ake a kaaina te Aro teuana ke te kurubu n Aro teuana, a kunea bwa e kangaanga bwa a na ota ke ni butimwaei aia reirei tabemwaang ke aia koaua.
Ni kaitaraan anne, e taku Iesu: “Bon te Tamnei te Atua: ao akana taromauria e riai ba a na taromauria n te tamnei ma te koaua.” (Ioane 4:24) Te koaua bwa taromaurian te Atua ma te koaua, e kariaia te bobuaka n iango ibukin ae antai te Atua, tera ana kaantaninga, ao tera aron taromauriakina ae e tangiria? E riai bwa ti na kakoauaa ae e aki kakawaki iroun te Atua ae Moan te Mwaaka bwa tera arora n taromauria?
Kristian ni Koaua Ngkekei ao Ngkai
N taai tabetai, a kakaokoro naba n iango i aon bwaai tabeua, Kristian n te moan tienture. N te katoto, e taku te abotoro Bauro ibukia Kristian ake i Korinto: “I tuangaki taekami, tariu, irouia ana utu Koroe, ba bon iai taiani kauntaeka i buakomi. Ao I atonga aei ngkai, ba ai aron ae kam kangai n tatabemaningkami nako, Raoni Bauro ngai; ao raon Aboro ngai; ao raoni Keba ngai; ao raoni Kristo ngai.”—1 I-Korinto 1:11, 12.
Te koaua bwa e tarai kakaokoro n iango aikai Bauro bwa tiaki bwaai aika kakawaki? Te koaua bwa bon te uota uotana te aomata ni mwakuriia kamaiuakina? Bon tiaki ngaia anne! E kaungaunga Bauro ni kangai: “I butingkami, taari, n aran ara Uea are Iesu Kristo, ba kam na bane n atonga te taeka ae ti teuana, ao a na tai reke raure i buakomi; ao kam na manga bo raoi n te nano ae ti te arona ao n te taeka ae ti te arona.”—1 I-Korinto 1:10.
E aki kona n reke te katiteuanaki n te koaua, ngkana a taumatoaki nako iai. E tii reke ngkana a karaurau n neneri bwaai ake a aki boraoi n iango i aona, ma ni karokoia n are a uaiakinna, ao ni kariaia te iango ae tii teuana. Mangaia are te ukeuke n reirei i bon iroura n ana Taeka te Atua, ao maiuakinan baike ti reiakin ma nanora ni koaua, boni mwaneka aika riai ibukin karekean te katiteuanaki, are e taekinna Bauro. E kona n reke te aeka ni katiteuanaki aei? N aron ae ti a tia n noria, e a kaman reitaki te Atua ma ana aomata aika a mena n te botaki teuana. E kona ni kinaaki te botaki anne ni boong aikai?
Kakabwaia Aika Reke man te Itamwaomwao ae Eti
E titiraki te tia areru are Tawita ngkoa ni kangai: “Iehova, ai antai ae na memena i nanon umam? Ai antai ae na maeka i aon am maunga are tabu?” Anne bon te titiraki ae kammwakura te iango ao e kaekaa Tawita ni kangai: “Ane nakonako n aki bure, ma ni karaoa ae raoiroi, ma n atonga te koaua i nanona.” (Taian Areru 15:1, 2) Te atatai ae eti raoi ibukin te Baibara, e na buokira ni kinaa te Aro ae kaakaraoa nanon te Atua. E kona ngkanne n unga nanon te aomata are e ikoikotaki ma te botaki anne, ae kaainaki irouia aomata aika a katiteuanaki n taromauria te Atua n “te tamnei ma te koaua.”
A a tia ni kaotiotia Ana tia Kakoaua Iehova bwa e kona n reke te katiteuanaki n te onimaki ao n te mwakuri, e ngae ngkana akea te katiteuanaki n te aonnaba. Iai i buakoia te koraki aei, kaain ngkoa Aaro aika bati aika kakaokoro ao kaain reeti naba aika kakaokoro. Taani Kakoaua tabemwaang bon aomata ngkoa aika nanououa ibukin te Atua aika agnostics ke aomata aika aki-kakoauaa te Atua aika atheists. Iai naba tabeman aika a aki tabe ma te Aro. A a tia n otinako aomata man Aaro aika kakaokoro aikai, katei, ao rabakau n aomata, ao a a kimwareirei ngkai i nanon te Aro ae katiteuanaki, ae te waaki ae aki-nonoraki n te aonnaba ni boong aikai.
E aanaki te katiteuanaki aei, n ana Taeka te Atua ae te Baibara. Ni koauana, a ataia Ana tia Kakoaua Iehova bwa a aki kona ni kairoroia tabemwaang nakon karaoan te mwakuri teuana. Ma a kimwareirei ni mwiokoaia ae kaungakia aomata bwa a na reirei n te Baibara, n te aro bwa e na nene aan aia rinerine ni kaineti ma te taromauri. N te aro aei, ao a a mwaiti riki aika a kona ni karekei kakabwaiaia man taromaurian te Atua n “te tamnei ma te koaua.”
Ni boong aikai, e korakora karuanikain te mwanetaati ni kariri aika bubuaka ao bwaai n anainano. E kakawaki karekean te itamwaomwao ma aomata ake e kukurei te Atua irouia. E taekinaki n te Baibara bwa ane e ‘nakonako ma aomata aika rabakau, ao e na rabakau iai,’ ma “a uru aaro aika riai taian i raorao aika bubuaka.” (Taeka N Rabakau 13:20; 1 I-Korinto 15:33) Bon te bwai ni kamanomano, te itamwaomwao ma taan taromauria te Atua aika nanomatoa iai. Mangaia are e kauringira te Baibara ni kangai: “Ti na i taratara n iangoi arora ba ti aonga ni keiakinira ni karika te tangira ma makuri aika raraoi. Ao ti na tai kaki te bobotira, n ai aroia tabemang, ma ti na taetae n i kauungaira i roura; ni kakorakoraira riki iai n te aro ane kam nora te Bong arei ba e a kan roko.” (Ebera 10:24, 25) Ai te kakabwaia tera bwainan te ibuobuoki ae tatangira i marenaia, raao ni koaua aika taari n te onimaki, ibukin kakororaoan mwiokoaia i matan te Atua!
E kaota koauan te iango aei Ottmar. E ngae ngke e kaikawaki n te utu ni Katorika i Tiaman, ma e katoka irakin te taromauri. E kabwarabwaraa ni kangai: “Ni katoai taai ake I kaea iai te taromauri, ao bon akea reireiau ae kona n reke ni karokoa bwarana.” Ma e bon teimatoa naba n onimakina te Atua. E kaitiboo imwina ma Ana tia Kakoaua Iehova ao e a kakoauaa bwa bon tooro ni koaua ngaiia ibukin te Atua. E nora riain te itamwaomwao ma ngaiia. E taku ngkai: “E a reke irou te raunnano man te teimatoa n tiku n te botaki ae katobibia te aonnaba. I a tabe ngkai ni buokaki bwa N na karekea riki te atatai ae eti man te Baibara. Anne te bwai ae moan te kakawaki irou.”
Te Kakao Nakoia te Koraki Ake A Kakaae
Aomata aika bonnano aika reitaki ni mwakuri n te kurubu, a kona ni baitii ni katiaa mwiokoaia, nakoia aomata aika mwakuri i bon irouia. N te katoto, e kangai ana kaetieti Iesu nakoia ana reirei imwain kitanakiia: “Ma ngaia ae kam na nako ni kakiritiania botanaomata ni kabaneia, ni babetitoiia nako nanon aran te Tama ma te Nati ma te Tamnei are Raoiroi; n reireiia ba a na kabane baike I tuangngkami n tauu.” (Mataio 28:19, 20) E na kanga ni katiaaki raoi te aeka ni mwakuri aei ngkana akea te kairiri ke te botaki? E na kanga n aantaeka temanna nakon ana reirei te Baibara aei, ngkana e kataia n toro iroun te Atua i bon irouna?
Ana tia Kakoaua Iehova n te ririki ae nako, a tibwatibwai booki, booki aika uarereke ao boroutia aika kabwarabwaraa te Baibara aika 91,933,280 mwaitiia, ao maekatin aika 697,603,247 mwaitiia. Mangaia are, a a tia ni karokoa te rongorongo man ana Taeka te Atua irouia aomata aika mwaiti kurikuri n aaba aika 235 mwaitiia. Ai rianako ra aron te kakoaua aei, are e oti iai bwa e bati riki te mwakuri ae kona ni karaoaki n te kurubu ae katiteuanaki ae baireaki raoi, nakon ae e kona ni karaoia te aomata ae akea raona ni mwakuri!
Irarikin tibwatibwakin booki ake a kabwarabwaraa te Baibara, a kairi naba reirei n te Baibara ma aomata Ana tia Kakoaua Iehova n aki-kabooaki iai. A buokaki iai aomata bwa a na ataia raoi bwa tera ae e tangiria te Atua. N te ririki ae nako, ao mwaitiia aomata aika reirei n te Baibara bon 5,726,509, ake a karaoaki ni bon tii ngaiia ke n te kurubu ni katoa wiki. E a tia te kaetieti man te Baibara aei ni buokiia aomata aika mirion ma mirion mwaitiia bwa a na karekea aaia ae nene ibukin aia rinerine ni kaineti ma aia taromauri. Ko kaoaki bwa ko na reiakin bwaai aika e tangiri te Atua, ake a koreaki n te Baibara. Imwina ko a kona ngkanne ni karaoa am rinerine.—I-Ebeto 4:13; I-Biribi 1:9; 1 Timoteo 6:20; 2 Betero 3:18.
Ngkana ko kani kakukureia te Atua, ao e kakawaki kaainakin te Aro, ma tiaki nanona bwa e aki akaka te Aro ae ko na kaaina. Ko riai ni kabotoa rineakin am Aro i aon te atatai ae eti man te Baibara, ao tiaki i aon aia koaua Aaro aika riai ni kakoauaki irouia kaain aia Aro ke i aon ana rongorongo te aomata riki temanna ae akea koauana. (Taeka N Rabakau 16:25) Reiakin baika a tangiraki n te Aro ae koaua. Kabotaua ma oin am koaua, ao imwina karaoa am rinerine.—Te Tua-Kaua 30:19.
[Taamnei n iteraniba 7]
A kimwareirei ni katiteuanaki Ana tia Kakoaua Iehova n te aonnaba ae akea iai te katiteuanaki