E Aki Kona Ni Bwaka ‘Ana Moti Iehova’

“N na taekina te tua [“moti,” BK]: E kangai Iehova nako iu, Bon Natiu Ngkoe; . . . butiai, ao I a anganiko botanaomata ba am aomata.”​—TAIAN ARERU 2:7, 8.

1. Tera te kauntaba i marenan ana kaantaninga te Atua ma natannaomata?

BON iai ana kaantaninga Iehova ae te Atua ibukin te botannaomata n ikotaki ma te aonnaba. Ma bon iai naba oin aia kaantaninga natannaomata. Ai boni kauntaba ra kaantaninga aikai! Ma ti aki riai ni mimi n aei bwa e kangai te Atua: “Aroni karawa ngkae e rietata riki nakon aontano, ao ai aron naba arou nako, ba a rietata riki nakon aromi nako, ao nanou nako nakon nanomi nako.” E na boni kakoroaki bukin ana kaantaninga te Atua bwa e reita nako ana taeka ni kangai: “Aron te karau ma te tinoo ngkai a bwabwaka mai karawa, ma n aki okiria, ma a teboka aontano, ma n anganna te kariki ma te kaue, ma n angan te tia ununiki te uaa, ao ae amamarake te amarake; ao ai aron naba au taeka ae oti nako mai wiu: e na aki okirai ni matebuaka, ma e na boni karaoa ae I tangiria, ao e na reke konana n are I kanakoa nako iai.”​—Itaia 55:9-​11.

2, 3. Tera ae kateretereaki n te kauoua n areru, ma baikara titiraki aika tabekaki?

² Kakoroan bukin ana kaantaninga te Atua anne ni kaineti ma ana Mesia ae te Uea, e kateretereaki raoi n te kauoua n areru. E kairaki iroun te Atua te tia karioa te areru aei are Uean Iteraera ngkoa are Tawita, bwa e na kamani kaota te tai teuana ae kakawaki are a na kiriwe iai natannaomata. A na boni kaitaraa Iehova ae te Atua ma ana Uea ae Kabiraki. Ma e anene naba ni kangai te tia areru: “N na taekina te tua [“moti,” BK]: E kangai Iehova nako iu, Bon Natiu Ngkoe; . . . butiai, ao I a anganiko botanaomata ba am aomata, ao tabon aonaba ake a raroa ba abam.”​—Taian Areru 2:7, 8.

³ Tera ae nanonaki n ‘ana moti Iehova’ ibukia natannaomata? Tera aron rotakia te botannaomata iai? Tera nanon baikai nakoia te koraki ake a mamaaka te Atua ni kabane ake taani wareka te kauoua n areru?

Kiriweia Natannaomata

4. Ko na kanga ni kabwarabwaraa te boto n reirei are n Taian Areru 2:1, 2?

⁴ E moana ana ototo te tia areru n anenea ae kangai ni kaineti ma aia mwakuri natannaomata ao aia taani kairiri: “A aera Tientaire ngkai a kiriwe, Ao a aera botanaomata ngkai a iangoa te bwai ae akea uana? A tei rake n un uean aonaba, Ao a botaki ni kabowi taan tau-taeka, N eka nako Iehova ma ana Mesia [“ana uea ae e kabiraki,” BK].”​—Taian Areru 2:1, 2.a

5, 6. Tera “te bwai ae akea uana” ae ‘a iangoia’ botannaomata?

⁵ Tera “ae akea uana” ae ‘a iaiangoi’ natannaomata n taai aikai? A aki butimwaea ana Uea ae Kabiraki te Atua ae te Mesia ke te Kristo natannaomata, ma “a iangoa” ke a kananoa aia iango i aon waakinakoan oin mwaakaia. A kakoroaki naba bukin taeka aikai n te kauoua n areru n te moan tienture C.E. ngke a inanoi ngkoa te tautaeka n Iutaia ao n Rom, bwa a na tiringa Iesu Kristo are Teuare rineaki bwa e na Uea, iroun te Atua. Ma e a tibwa kakoroaki bukin anne n te aro ae kakawaki riki, n 1914 ngke e a kaueaaki Iesu bwa te Uea i karawa. Man te tai anne ni karokoa ngkai ao bon akea naba te tautaeka teuana n te aonnaba ae butimwaea te Uea aei are kaueaaki iroun te Atua.

⁶ Tera ae nanonaki ngke e titiraki te tia areru ni kangai: “A aera botanaomata ngkai a iangoa te bwai ae akea uana”? Bon aia kaantaninga ae akea uana; akea manena ao e nang aki koro bukina. A aki kona ni karekea te rau ao te kakukurei nakon te aonnaba. Ma a waakini aia mwakuri n te aro ae a kaitaraa ana tautaeka te Atua. A katiteuanaki n teirake n un nakon Teuare Moan te Rietata ma ana Uea ae Kabiraki. Ai nanobaba ra.

Ana Uea Iehova ae Totokanikai

7. A kanga ana reirei Iesu rimoa ni kabongana Taian Areru 2:1, 2 n aia tataro?

⁷ A kamanenai taeka nakon Iesu ake n Taian Areru 2:1, 2 taan rimwina, ngke a bwainikirinaki ibukin aia onimaki, ao a tataro ni kangai: “Te Uea, bon te Atua Ngkoe [ae Iehova], ae Ko karaoa karawa, ma aonaba, ma marawa, ma bwaai ni kabane ake a mena i nanoia: ae Ko kangai ni win am toro are Tawita, iroun te Tamnei are Raoiroi, A aera Tientaire ngke a kiriwe, ao a aera botanaomata ngke a iangoi baika akea uaia? A tei rake n un uean aonaba, ao a botaki taan tau-taeka n eka nako Iehova, ma ana Mesia: ba e boni koaua ba a botaki Erote ao Bontio Birato, ma Tientaire, ma aomata aika Iteraera n te kawa aei, n eka nako Natim are raoiroi, are Iesu, are Ko kabiria.” (Mwakuri 4:24-​27; Ruka 23:1-​12)b Eng, iai te boraraoi ae e kakarabakauakaki karaoana irouia taani kaitaraa ana toro te Atua ae kabiraki ae Iesu n te moan tienture. Ma e a manga kakoroaki kaua riki bukin te areru aei n tienture ake imwina riki.

8. Tera nanon Taian Areru 2:3 ni kaineti ma natannaomata ni boong aikai?

⁸ Ngke iai aia uea I-Iteraera rimoa n aron Tawita, ao a katiteuanaki natannaomata aika beekan ma aia tia tautaeka ni kaitaraa te Atua ma ana kabiraki are e uea arei. Ma tera arona n ara bong aikai? Natannaomata ni boong aikai a aikoa kan ongeaba n ana kaetieti Iehova ao te Mesia. Mangaia are titeboo ma a kangai: “Ti na motiki aia bwai ni kabaebae, ao ti na tetewe nako aia mwaea mairoura.” (Taian Areru 2:3) A na boni bae ni kaitaraaki kaetieti ake a kateaki iroun te Atua ma ana Uea ae Kabiraki, irouia taan tautaeka ma natannaomata. Ma e na bon akea uaan aia kakorakora ake a karaoi ibukin motikan bwaai ni kabaebae ao tetewenakoan mwaea.

E na Kaenaenaia Iehova

9, 10. Bukin tera ngkai e kakanikoia natannaomata Iehova?

⁹ E aki tabe Iehova ma aia kakorakora taan tautaeka ni kataia n tautaekania i bon irouia. E reitaki nako te kauoua n areru ni kangai: “E na ngarengare Teuare tekateka i karawa: E na kaenaenaia [Iehova].” (Taian Areru 2:4) E na boni waakina nako ana kaantaninga te Atua n ai aron ae kanga akea maneia taan tautaeka aikai irouna. E ngareakina aroia ni kainikatonga ao e kaenaenaia. A na katukaki ma aroia ni kamoamoa ibukin are a nang waakinna. Ma iroun Iehova a riki bwa bwaai ni kangare. E ngareakina aia kaaitara ae akea uana.

¹⁰ E noraki n ana areru Tawita tabeua, taekaia taani kairiribai aika mwaane ma natannaomata ike e anene ni kangai iai: “Ngkoe, ae Iehova ae Atuaia taanga, ae Atuaia Iteraera, Ko na tei rake ni kawariia botanaomata ni kabaneia: Tai nanoanga te tia bure temanna ae babakanikawai. A rikaki n te tairiki, a tang n ai aron te kamea, Ao a kabuta te kawa. Noria, a katinakoi taetaebuaka mai wiia; A mena kabaang i nanon riaia: A kangai, Ba ai antai ae ongo? Ao ngkoe, ae Iehova, ane Ko na ngareakinia; Ane Ko na kakaniko nakoia botanaomata ni kabaneia.” (Taian Areru 59:5-8) E ngareakinia natannaomata Iehova n aia kainikatonga ao aia nanobaba ni kaitaraa.

11. Tera ae e na riki ngkana a kakorakoraia natannaomata ni kaitaraa ana kaantaninga te Atua?

¹¹ A kakorakoraa ara onimaki taeka ake n Taian Areru 2 bwa e boni kona n tokanikai i aon kangaanga nako te Atua. Ti boni kona n onimakinna bwa e teimatoa ni kakoroi bukin ana kaantaninga, ao e aki kona n teweia nako ana toro aika kakaonimaki. (Taian Areru 94:14) Ma tera ngkanne ae riki ngke a a kakorakoraia natannaomata ni kaitaraa ana kaantaninga Iehova? Ni kaineti ma te areru aei, “E na taetae n unna nako ia” te Atua n ai aron rurungan te baa ae rangi ni korakora. Irarikin anne “E na karawawataia n unna ae korakora,” n ai aron te itirua ae korakora ootana.​—Taian Areru 2:5.

E a Kaueaa Ana Uea te Atua

12. E taekina kauean antai Taian Areru 2:6?

¹² E kaunia natannaomata ana taeka Iehova rinanon te tia areru are kangai: “Ao Ngai I katokaa au uea I aon au maunga are tabu are Tion.” (Taian Areru 2:6) Te maunga are Tion bon te tabuki ae mena i Ierutarem ngkoa, ike e kaueaaki iai Tawita. Ma e na aki tekateka n te kaintokanuea n te kaawa anne te Uea ae te Mesia ke n te tabo riki teuana i aon te aba. E a bon tia ni kaueaa Iesu Kristo Iehova, bwa ngaia ana Uea ae te Mesia ae rineia n te Maunga are Tion are i karawa.​—Te Kaotioti 14:1.

13. Te berita raa are e karaoia Iehova ma Natina?

¹³ E taetae ni kangai te Uea are te Mesia: “N na taekina te tua [are ana moti Iehova are e a tia ni karaoia ma Natina ibukin te Tautaeka n Uea]: E kangai Iehova nako iu, Bon Natiu Ngkoe; I karikiko n te bong aei.”(Taian Areru 2:7) E taekina te berita ibukin te Tautaeka n Uea Kristo ngke e tuangia ana abotoro ni kangai: “Ngkami bon aika kam memena ma Ngai ni kaririakiu; ao Ngai I motika ueami nako imi, n ai aron Tamau ngke E motika ueau nako Iu.”​—Ruka 22:28, 29.

14. Bukin tera ngkai akea te nanououa bwa e bon riai n uea Iesu?

¹⁴ N aron are e a kaman taekinaki n Taian Areru 2:7, e kanikinaea Iesu Iehova bwa Natina ni bwabetitoakina, ao ni kautana nakon te maiu n taamnei. (Mareko 1:9-​11; I-Rom 1:4; Ebera 1:5; 5:5) Eng, Uean te Tautaeka n Uea are i karawa bon ana Riki-temanna te Atua. (Ioane 3:16) Kioina ngkai te bwaanuea Iesu bwa kanoan te Uea are Tawita, akea te nanououa ngkanne bwa e bon riai n uea. (2 Tamuera 7:4-​17; Mataio 1:6, 16) E taku te Atua nakon Natina n te areru aei: “Ko na butiai, ao I a anganiko botanaomata ba am aomata, ao tabon aonaba ake a raroa ba abam.”​—Taian Areru 2:8.

15. Bukin tera ngkai e bubutii Iesu taian natannaomata bwa ana bwai?

¹⁵ Te Uea aei are oin Natin te Atua, boni ngaia raoi te kauoman ni kakannato i aan Iehova. E a tia Iesu ni kakoauaki kakaonimakina iroun Iehova bwa e bon tau nako iai. Irarikina, Iesu bon ana Karimoa naba te Atua. Iesu Kristo “boni katotongan te Atua ae aki nonoraki, are te moa ni bung i buakoni baika karikaki ni bane.” (I-Korote 1:15) Te bwai ae riai ni karaoia bon tii te bubutii, ao e a ‘anganaki naba taian natannaomata bwa ana aomata, ao tabon aonnaba ake a raroa bwa abana.’ E boni bubutii aei Iesu bwa ‘e kukukurei irouia natiia aomata’ ao ibukina bwa e korakora nanona ni kani kakororaoa nanon Tamana ibukin te aonnaba aei ao te botannaomata.​—Taeka N Rabakau 8:30, 31.

Ana Moti Iehova ni Kaitaraia Natannaomata

16, 17. Ni kaineti ma Taian Areru 2:9, tera ae na riki nakoia natannaomata n te tai ae na roko?

¹⁶ Ibukina bwa e a tabe ni kakoroaki ngkai bukin te kauoua n areru, n ana tai Iesu Kristo ni mena i rarikia aomata n arona n aki–noraki, tera ngkanne mwina nakoia natannaomata? E nang waekoa te Uea ni kakoroa nanon are taekinna te Atua ni kangai: “Ko nang uruia [natannaomata] n te oko ae te biti; Ko nang ibeibeiia n ai aron te mangko ae te tano.”​—Taian Areru 2:9.

¹⁷ Okoia uea rimoa boni kanikinaean ana mwaaka ni kairiri te utu n uea. Tabeua oko a karaoaki man te biti, n aron ae taekinaki n te areru aei. Te kaikonaki ae kabonganaki aei, e kaota bebeten ana mwakuri Kristo are te Uea ni kamaunaia natannaomata. E na bon urubekebeke ni marikiriki te mwangko ae karaoaki man te tano ngkana e oreaki n te oko ae te biti.

18, 19. Tera te bwai ae a riai ni karaoia taan tautaeka i aon te aba bwa a aonga n akoaki iroun te Atua?

¹⁸ Te koaua bwa a kairoroaki taani kairiri i aon te aba bwa a na nora te kamaunanakoaki? A aki bwa e butiia te tia areru ni kangai: “Ngaia ae kam na wanawana ngkai, ngkami aika uea: Kam na reireiaki, ngkami aika taani motiki taekan aonaba.” (Taian Areru 2:10) A kaumakaki taan tautaeka ikai bwa a na kawanawanaia. A riai n iangoia bwa akea uaan aia babaire, ni kabotauaki ma te bwai are e na karaoia ana Tautaeka n Uea te Atua ibukin kakabwaiaaia te botannaomata.

¹⁹ A riai ni bita aroia taan tautaeka i aon te aba bwa a aonga n akoaki iroun te Atua. A boaaki bwa a na “toro iroun Iehova ma te maku, ao [ni] kimareirei ma te ruru.” (Taian Areru 2:11) Tera ae e na riki ngkana a karaoa anne? A nang aki ngkanne kiriwe ke ni mangaongao, ma a nang kimwareirei n te kaantaninga are e na menaa imwaia te Mesia ae te Uea. E na bon riai irouia taani kairiri n te aonnaba bwa a na kaki te nanorieta ao te kainikatonga, are a kaotiotia n aia kairiri. Irarikina, a na waekoa ni biti aroia n aki iremwe, ao ni kawanawanaia nakon ana kairiri Iehova ae akea kabotauana ao nakon mwaakan te Atua ae akea tokina ma ana Mesia are te Uea.

“Kaboria ma te Nati”

20, 21. Tera ae nanonaki n te “kaboria ma te Nati”?

²⁰ E karaababanako te kakao ae raonaki n te nanoanga ae bati Taian Areru 2 nakoia taani kairiia natannaomata. N onean mwin are a bobotaki n riki bwa taani kaaitara, a tuangaki ae kangai: “Kaboria ma te Nati, ba E kawa n un [Iehova ae te Atua], ao kam mate i nanon te kawai, ba e nang ura mwaka unna.” (Taian Areru 2:12a) E bon riai n iraki nanon te Uea ae Moan te Rietata ae Iehova ngkana e katanoataa ana moti. Ngkana e a kaueaa Natina te Atua i aon te kaintokanuea, a bon riai ngkanne taani kairiri n te aonnaba ni katoka aroia n “iangoa te bwai ae akea uana.” A riai ni butimwaea te Uea n te tai naba arei ao ni kaota ongeabaia ae korakora nakoina.

²¹ Bukin tera ngkai a riai ni “kaboria ma te Nati”? Ngke e oteaki te areru aei ao te kaboria boni kaotan te iraorao, ao e kakabonganaki ibukin butimwaeaia iruwa nakon mwengan temanna, ike a nang kimwareirei iai n akoakia. Te kaboria boni kaotan te kakaonimaki. (1 Tamuera 10:1) Ni kibun te kauoua n areru aei, e tua iai te Atua nakoia natannaomata bwa a na kaboria ma Natina are e a kabiraki bwa te Uea, ke a na kaota butimwaeana.

22. Te kauring raa ae a riai n ira nanona taani kairiri n te aonnaba?

²² A na boni kauna Iehova te koraki ake a rawa ni kakoauaa mwaakan te Uea are e rineaki irouna. A aki butimwaea ae iai riain Iehova ae te Atua n tautaekana te iuniweeti, ao mwaakana ma ana konabwai n rinea te Uea ae te kabanea n nakoraoi ibukin kairakia te botannaomata. A na noria taani kairiia natannaomata ngkai bwa e na waekoa n tokariia nako unin te Atua ae korakora, i nanon aia tai ni kataia ni waakina aia babaire. “Ba e nang ura mwaka unna,” ke e a rangi ni waekoa n ura ao e a aki kona ni katokaki. A riai taani kaira te aonnaba ni kakorakoraia n ira nanon te kauring aei ao ni kaboraoa aia waaki ma ngaia. Karaoan anne irouia boni kamaiuaia.

23. Iai ngkai aia tai aomata nako ni karaoa tera?

²³ E kabanea ana taeka te tia areru aei ni kangai: “A bane ni kabaia akana onimakinna [Iehova].” (Taian Areru 2:12b) E bon reke naba aia tai ngkai aomata ni kakaaea kamaiuaia, ao e kaineti naba aei nakoia taani kairiri i aon te aba, ake a a tia ni boutokaa ngkoa aia babaire natannaomata. A kona ni birinako nakon Iehova, bwa e katauraoa kamanoaia i aan ana kairiri ana Tautaeka n Uea. Ma a riai ni karaoa anne i mwain te tai are e nang kamaunaia iai natannaomata ake a karitei.

24. Ti na kanga ni kona ni maiu n te aro ae kakukurei ngkai, e ngae ngke ti mena n te aonnaba ae bati iai te kangaanga?

²⁴ Ngkana ti kakorakoraira n reirei n te Baibara ao ni maiuakina te reirei iai, ti kona ni maiu n te aro ae kakukurei ngkai, e ngae ngke ti mena n te aonnaba ae bati iai te kangaanga. Kamanenan reirei man te Baibara e kona ni karekea te kakukurei n te utu, ao te kainaaomataki man taian tabeaianga ma maaku ake a taonaanako te aonnaba aei. Irakin nanon ana reirei te Baibara, e karekea onimakinan ae ti boni kakukureia te tia Karikiriki. Bon tii te tia Tautaeka i aoni Bwaai ni Kabane, ae kona ni kakororaoa reken “te maiu aei, ao te maiu are e na roko.” E na riki aei imwin kaitiakan te aonnaba irouna ni kamaunaia te koraki ake a karitei nakon ae riai, n aroia n rawa nakon ana kairiri te Tautaeka n Uea.​—1 Timoteo 4:8.

25. Kioina ngkai e aki kona ni bwaka ‘ana moti Iehova,’ tera ngkanne ae ti kariaa bwa e na riki n taai aikai?

²⁵ E aki kona ni bwaka ‘ana moti Iehova.’ Kioina ngkai te Atua bon ara tia Karikiriki, e atai riki bwaai aika tamaroa ibukia te botannaomata ao e na boni kakoroa bukin ana kaantaninga ni kakabwaiaia te koraki ake a ongeaba n angania te maeka n rau, te kimwareirei, ao te mweraoi ae teimatoa, i aan ana Tautaeka n Uea Natina ae tangiraki. Ni kaineti ma ara tai aikai, e korea ae kangai te burabeti ae Taniera: “N aia bong uea akanne ao E na katea ueana Atuani karawa, ae na bon aki uruaki n aki toki, . . . ma e na ururu ma ni kamaunai uea akanne ni kabane, ao e na tei matoa n aki toki.” (Taniera 2:44) Mangaia are bon aei te tai n umaki ibukin te “kaboria ma te Nati,” ao n toro iroun te Uea ae Moan te Mwaaka ae Iehova!

[Kabwarabwara ae nano]

Ko na Kanga ni Kaeka?

• Tera “te bwai ae akea uana” are a ‘iaiangoia’ natannaomata?

• Bukin tera ngkai e kaenaenaia natannaomata Iehova?

• Tera ana moti te Atua ni kaitaraia natannaomata?

• Tera ae nanonaki n te “kaboria ma te Nati”?

[Taamnei n iteraniba 14]

E anenea Tawita taekan te Mesia ae te Uea ae totokanikai

[Taamnei n iteraniba 15]

A kakarabakauia taani kairiri ao I-Iteraera ni kaitaraa Iesu Kristo

[Taamnei n iteraniba 16]

E a tia ni kaueaki Kristo i aon te Maunga ae Tion i karawa