Te Rongorongo Ae Raoiroi Ibukia Aomata Nako

“Ane kam na riki ba taani kaotioti i bukiu . . . ni karokoa tabon aonaba.”​—MWAKURI 1:8.

1. Tera ae ti riai n tabeakinna ngkai taan angareirei i aon te Baibara ngaira, ao bukin tera?

TAAN reirei aika a mwaatai, a aki tii tabeakina ae baikara reirei ake a anga, ma a tabeakina naba aroia n angareirei. Ngkai taan reiakina te koaua man te Baibara ngaira, ti karaoa ae titeboo ma anne. Ti uaia ni mutiakina te rongorongo ae ti tataekinna ao arora n angareirei naba. Akea bitakin ara rongorongo ae raoiroi ibukin Ana Tautaeka n Uea te Atua, ma n taai tabetai ti bitii ara aanga n angareirei. Bukin tera? Bwa ti aonga ni kona n roko irouia aomata aika mwaiti n aron ae ti konaa.

2. Ti katotonga antai ngkana ti bibitii ara aanga n angareirei?

² Ti katotongia Ana toro te Atua ake rimoa ngkai ti bibitii ara aanga n angareirei. Iangoa ana katoto te abotoro Bauro. E taku: “I riki n ai aron te I-Iutaia nakoia I-Iutaia . . . I riki n ai aron ae akea te tua I rou nakoia akana akea te tua i rouia . . . I riki n ai aron ae mamara nakoia aika mamara, ba N na anai nanoia aika mamara. I riki ni bwaai ni bane nakoia aomata ni kabaneia, ba N na boni kamaiuia tabemang.” (1 I-Korinto 9:19-23) E uaana bibitakin ana aanga n angareirei Bauro. E na uaana naba ara angareirei ngkana ti karaua n iangoa raoi te bwai ae e kainnanoia ke e namakinna te aomata ae ti taetae mangaia, ao ni kaangaraoa ara angareirei nakoina.

Nako “Tabon Aonnaba”

3. (a) Tera te kangaanga ae ti kaaitara ma ngaia ni kaineti ma tataekinan te rongorongo? (b) E a kanga n tabe ni kakoroaki bukin ana taeka Itaia 45:22 ni boong aikai?

³ Te kangaanga naba teuana are a aki toki ni kaaitara ma ngaia te koraki ake a tataekina te rongorongo, bon abwabwakin te tabo are a riai ni karaoia, ae aaba ni kabane. (Mataio 24:14) I nanon te tienture ae nako, a kakorakoraia ni mwakuri ana toro Iehova ni karoko n aaba ake a tuai n roko iai, ibukin tibwatibwan te rongorongo ae raoiroi. Tera mwina? Te rikirake ae kamimi ae e a taonaaba. Ni moan te ririki 1900, ao tii tabeua aaba ake a ribootinaki bwa e a tia n tataekinaki iai te rongorongo ae raoiroi, ma ni boong aikai e a korakora rikiraken aia mwakuri Ana tia Kakoaua Iehova n aaba aika 235 mwaitiia! Ni koauana, e a tabe ngkai n tataekinaki rongorongon te Tautaeka n Uea nako “tabon aonaba.”​—Itaia 45:22.

4, 5. (a) Antai aika a a tia ni karaoa te mwakuri ae rang ni kakawaki ni kaineti ma tibwatibwan te rongorongo ae raoiroi? (b) Tera aia taeka kaain mwaangan te aobiti n tararua tabeua ibukia te koraki ake a kitan abaia ao a nako ni mwakuri n aia aono?

⁴ Tera ae karika te rikirake aei? Boni bwaai aika mwaiti. Mitinare aika kataneiaki n te Watchtower Bible School of Gilead, ao ni boong aikai, taani kaea te Kuura Ibukin Kataneiakiia Minita, ae 20,000 tabun mwaitiia, ake a a tia naba n anga aia ibuobuoki ae abwabwaki i aon aei. Ao ai uana naba ma taani Kakoaua aika mwaiti ake a a tia ni mwamwananga n oin aia kabane mwane, nakon aaba ake e korakora riki iai kainnanoan te ibuobuoki ibukin uarongorongoan te Tautaeka n Uea. A a tia ni karaoa te mwakuri ae rangi ni kakawaki ni kaineti ma tataekinan rongorongon te Tautaeka n Uea ni kabutaa aonnaba ni kabane, Kristian ake a kaota te nano ni kan anga ngaiia, aika mwaane ma aine, ataei ao kaara, ake iai ao ake akea buuia. (Taian Areru 110:3; I-Rom 10:18) A rangi ni kakawaki aomata aikai. Nora rongorongoia te koraki ake a kitan abaia ao a nakon taabo ake e korakora riki iai kainnanoan te ibuobuoki n aia aono, ae e koreaki man mwaangan aobiti n tararua tabeua.

⁵ “A kaira te mwakuri ni kaineti ma te uarongorongo, taani Kakoaua aika tangiraki aikai nakon taabo aika e aki roroko te aba iai, a buoka katean ekaretia aika boou, ao a buoka naba karikirakean aia onimaki taari mwaane ao aine n taabo akanne.” (Ecuador) “Ngkana a nang kitanira iruwa ake a mwakuri ikai aika bubua ma bubua mwaitiia, e na bon rotaki buaka iai kakaonimakia kaain te ekaretia. Ti rangi ni kakabwaiaki ngkai a a roko i buakora.” (Dominican Republic) “I nanon ara ekaretia aika mwaiti, angiia kaaina bon taari aine ao n tabetai e kona n roko mwaitiia ni 70 te katebubua. (Taian Areru 68:11) Angiia taari aine aika kaain abara aikai, a a bon tibwa reke irouia te koaua, ao bwaiania aika taari aine aika akea buuia ake a roko mai abatera, a buokiia taari aine aika boou n te aro ae kakawaki rinanon reiakinaia. Boni bwaai n akoi ni koaua nakoira, taari aine aika roko mai abatera aikai!” (Eurobe Mainiku) Ko a tia n iaiangoa te nako ni mwakuri n te aba teuana?a​—Mwakuri 16:9, 10.

“Tengaun te Aomata Mai Buakon Taetaeia Botanaomata ni Kabane”

6. E kanga Tekaria 8:23 n taekina kangaangan te mwakuri n uarongorongo ibukin kakaokoron te taetae?

⁶ Teuana naba te kangaanga ae matoatoa bon kakaokoron te taetae i aonnaba. E taetae ni burabetinaki aei n Ana Taeka te Atua ni kangai: “Ni boong akekei ao a na taua ririn temanna tengaun te aomata mai buakon taetaeia botanaomata ni kabane, eng, a na bon taua ririn temanna ae te I-Iutaia, ao a na kangai, Ti na airi ma ngkami, ba ti ongo ba E memena te Atua i roumi.” (Tekaria 8:23) Ibukin kakoroan bukin te taetae ni burabeti aei, e tei tengaun te aomata ibukin te koraki ae uanao, are e taetae ni burabetiaki n Te Kaotioti 7:9. Ma e ngae n anne, ao noria bwa ni kaineti ma ana taetae ni burabeti Tekaria, a na aki tii roko “tengaun te aomata” mai buakoia botannaomata ma “mai buakon taetaeia botanaomata” ni kabane. Ti a tia n nora kakoroan bukin iteran te taetae ni burabeti ae kakawaki aei? Ni koauana, ti a tia.

7. Baikara waare aika kaotia bwa e a tia ngkai n roko te rongorongo ae raoiroi irouia aomata “mai buakon taetaeia botanaomata” nako?

⁷ Iangoi waare aikai. Nimabwi te ririki n nako, ao a boretiaki ara boki nakon taetae aika 90 mwaitiia. Ni boong aikai, e a tia n rikirake te ware anne nakon 400 tabun. E a tia ni karaoa ana kabanea ni konaa, “te toro ae kakaonimaki ae wanawana” ibukin katauraoan booki n taetae aika kakaokoro, ao n taetae naba ake tii tabeman aika a kabongana. (Mataio 24:45) N te katoto, a a tauraoi ngkai booki ake aanaki man te Baibara n te taetae n Greenland (ae kamanenaki irouia aomata aika 47,000 mwaitiia), n te taetae ni Palau (15,000 mwaitiia aomata aika a kamanena te taetae aei), ao n te taetae n Yap (ae kamanenaki irouia aomata aika tii tabeman bwa e karako riki nakon 7,000).

“Te Mataroa ae Warebwe” ni Kaineti ma Mwioko Aika Boou

8, 9. Tera te rikirake ae e a tia ni kauka “te mataroa ae warebwe” ibukira, ao tera aroia ngaa ma ngaa taani Kakoaua ni kaineti ma aei?

⁸ Ni boong aikai, tao ti a aki kainnanoa te nako n aaba riki tabeua ibukin tibwatibwan te rongorongo ae raoiroi nakoia aomata man taetae ni kabane. N ririki aika tibwa nako, a roko iabatera ma aomata ake a raba nako mai abaia nakon aaba aika kaubwai aika mirion ma mirion mwaitiia. Ibukin anne, iai kaawa tabeua aika a mwaiti aomata aika mena iai aika kabongana te taetae ae kaokoro ma taetaen te aba anne. N te katoto, tao 100 mwaitin taetae aika kakaokoro aika a kamanenaki i Paris are i Buranti. I Toronto ao i Kanata, mwaitin te taetae iai bon 125; ao i Ranran i Engiran, e raka i aon 300 taetae n ianena aika kamanenaki iai! Rokoia aomata man aaba tabeua n aonon ekaretia aika mwaiti, e a uki iai “te mataroa ae warebwe,” are kairiri nakon mwioko aika boou ibukin tibwatibwan te rongorongo ae raoiroi nakoia aomata man baronga ni kabane.​—1 I-Korinto 16:9.

⁹ A a tauraoi ngkai ngaa ma ngaa taani Kakoaua ni kaaitara te kangaanga aei ngkai a a tia n reiakina te taetae ae kaokoro ma taetaen abaia. E rangi ni kangaanga karaoan aei irouia angiia mai buakoia; ma e ngae n anne e a manga kabooaki mwin aroia ni korakai n te kukurei are a namakinna, imwin buokaia iabatera ao aomata ake a rabanako mai abaia n ataa te koaua ae e reke i nanon Ana Taeka te Atua. N te ririki teuana ae e a tibwa nako, e kaania 40 te katebubua mai buakoia aomata ake a bwabetitoaki n taiani bwabwaro ake a karaoaki n te aono n Eurobe Maeao, aika roko man aaba tabeua.

10. Tera arom ni kamanena te boki ae uarereke ae Good News for People of All Nations? (Nora te bwaoki ae “Kanoan te Boki ae Uarereke ae Good News for People of All Nations,” n iteraniba 32.)

¹⁰ Te koaua bwa angiina mai buakora, e kangaanga reken ara tai n reiakina te taetae ae ianena. Ma e ngae n anne, ti boni kona naba ni buokia iabatera ni kamanenan te boki ae uarereke, are e a tia n tibwatibwaki ae Good News for People of All Nations,b are iai i nanona te rongorongo ae e anainano man te Baibara, n taetae aika kakaokoro nako. (Ioane 4:37) Ko kakamanena te boki ae uarereke aei n am mwakuri ni minita?

Ngkana Akea Nanoia Aomata n Tabeakina te Rongorongo ae Raoiroi

11. Baikara riki kangaanga aika nonoraki n aono tabeua?

¹¹ Ngkai e a rikirake ni korakora ana kariri Tatan i aon te aba, teuana te kataaki ngkanne ae bati n nonoraki, boni karakon butimwaean te rongorongo ae raoiroi n aono tabeua. Te koaua, bwa ti aki mimi n aei, kioina ngke e a tia n taetae ni burabeti Iesu bwa e na bon riki aei. E taekina ae kangai ibukin ara bong aikai: “Ao ane e a kani mauna tangiran te Atua irouia aomata aika bati.” (Mataio 24:12) Te koaua, bwa e a tia ni bua mairouia aomata aika mwaiti onimakinan te Atua ao karinean te Baibara. (2 Betero 3:3, 4) Ibukin anne, a karako mwaitiia aomata ake a a riki bwa taan rimwin Kristo, n taabo tabeua n te aonnaba. Ma tiaki nanona bwa e matebuaka aia kakorakora ni mwakuri tarira ao mwanera ni Kristian ake a kakaonimaki n uarongorongo n aono ake a aki butimwaea te rongorongo ae raoiroi kaaina. (Ebera 6:10) Bukin tera? Iangoa aei.

12. Baikara tiia aika uoua ibukin ara mwakuri n uarongorongo?

¹² E kaatuuaki taekan tiara aika uoua aika kakawaki n ana Euangkerio Mataio ibukin te mwakuri n uarongorongo. Teuana, ti riai ni “kakiritiania botanaomata ni kabaneia.” (Mataio 28:19) Te kauoua, e na riki euangkerion Uean te Atua bwa “te bwai ni kaotioti.” (Mataio 24:14) A uaia ni kakawaki tiia aika uoua aikai, ma e raka riki kakawakin ae te kauoua. Bukin tera?

13, 14. (a) Tera te bwai ae raka kakawakina ni kanikinaean menan Kristo ma aomata? (b) Tera ae ti riai n ururingnga riki ngkana ti uarongorongo n taabo ake e karako iai te kan ongora?

¹³ E korea taekaia abotoro te tia korea te Baibara are Mataio bwa a titirakina lesu ni kangai: “Tera kanikinaean menam ma aomata ao tokin te waaki ae buakaka i aon te aba?” (Mataio 24:3, NW) Ni kaekaan aei iroun Iesu, e taekinna bwa teuana te bwai ae raka riki kakawakina man te kanikina aei, bon tataekinan te rongorongo ae raoiroi ni katobibia te aonnaba. E taetae ibukin karekeaia taan rimwin Kristo? E aki. E taku: “Ane e na tataekinaki euangkerion uean te Atua aei i aonaba ni bane ba te bwai ni kaotioti nakoia botanaomata ni kabaneia.” (Mataio 24:14) Mangaia are e kaotia ikai Iesu bwa tataekinan rongorongon te Tautaeka n Uea, bon te bwai teuana ae rangi ni kakawaki man te kanikina aei.

¹⁴ I nanon ara tai n tataekina te rongorongo ae raoiroi ibukin te Tautaeka n Uea, ti riai n ururingnga bwa e ngae ngke ti aki tokanikai n taai nako ni kairiia aomata n riki bwa taan rimwin Kristo, ma ti bon tokanikai ngkai ti a tia n anga “te bwai ni kaotioti.” N aki ongeia bwa tera aron butimwaean te rongorongo irouia aomata, ma a bon ataa ae ti karaoia, mangaia are ti bon uataboa naba kakoroan nanon ana taetae ni burabeti Iesu. (Itaia 52:7; Te Kaotioti 14:6, 7) E taekina ae kangai Jordy, ae te tia Kakoaua ae te roro-n-rikirake i Eurobe, Maeao: “I rangi ni kukurei ngkai I a ataia ae, e kabonganai Iehova bwa N na buoka kakoroan bukin are e taekinaki ni Mataio 24:14.” (2 I-Korinto 2:15-17) Akea te nanououa bwa ko namakina naba aron aei.

Ngkana E Totokoaki Ara Rongorongo

15. (a) Tera te bwai are e a kaman kauringia iai taan rimwina Iesu? (b) Tera ae buokira bwa ti na tataekina te rongorongo n aki ongei taian totoko?

¹⁵ Totokoan te rongorongo mairouia aomata e kona naba ni karekea te kangaanga riki teuana nakon tataekinan te rongorongo ae raoiroi ibukin te Tautaeka n Uea. E a kaman kauringia taan rimwina Iesu ni kangai: “Ane kam na ribaki irouia botanaomata ni kabaneia i bukin arau.” (Mataio 24:9) N aroia Kristian ake rimoa, a a tia naba taan rimwin Iesu ni boong aikai n ribaaki, kaaitaraki ao ni bwainikirinaki. (Mwakuri 5:17, 18, 40; 2 Timoteo 3:12; Te Kaotioti 12:12, 17) E katabuakaki aia mwakuri irouia tautaekan aaba tabeua. Ma e ngae n anne, ao ibukin ongeabaia riki nakon te Atua, a teimatoa n tataekina rongorongon te Tautaeka n Uea Kristian ni koaua n aaba akanne. (Amota 3:8; Mwakuri 5:29; 1 Betero 2:21) Tera ae e kakorakoraia ni karaoan aei, n ikotaki naba ma taani Kakoaua ni katobibia te aonnaba? E angania Iehova te korakora rinanon taamneina ae raoiroi.​—Tekaria 4:6; I-Ebeto 3:16; 2 Timoteo 4:17.

16. E kanga Iesu ni kaota te reitaki i marenan te mwakuri n uarongorongo ao taamnein te Atua?

¹⁶ E katuruturua raoi Iesu taekan te reitaki i marenan taamnein te Atua ao te mwakuri n uarongorongo, ngke e tuangia taan rimwina ni kangai: “Ane kam na anganaki te mwaka, ngkana E roko te Tamnei are Raoiroi i aomi: ao ane kam na riki ba taani kaotioti i bukiu . . . ni karokoa tabon aonaba.” (Mwakuri 1:8; Te Kaotioti 22:17) E kakawaki aron karinanakin bwaai ake a riki aika taekinaki n te kibu aei. Te moani bwai, e roko te taamnei ae raoiroi irouia taan rimwin Kristo, ao imwina a a waakina te mwakuri n uarongorongo ni katobibia te aonnaba. Bon tii man boutokaaia iroun taamnein te Atua are e a reke iai korakoraia n nanomwaaka n tataekina “te bwai ni kaotioti nakoia botanaomata ni kabaneia.” (Mataio 24:13, 14; Itaia 61:1, 2) E bon eti ana taeka Iesu ngke e atonga te taamnei ae raoiroi bwa “te tia Buobuoki.” (Ioane 15:26) E taekinna Iesu bwa e na reireia ao ni kairiria taan rimwina, taamnein te Atua.​—Ioane 14:16, 26; 16:13.

17. E na kanga ni buokira te taamnei are raoiroi ngkana ti kaaitara ma te totoko ae korakora?

¹⁷ E buokira n aaro raa, taamnein te Atua ngkana ti kaaitara ma te riribai ae korakora, n ara tai n tataekina te rongorongo ae raoiroi ni boong aikai? E kakorakoraira taamnein te Atua ao e kaaitaraia ake a bwainikirinira. Ibukin kabwarabwaran aei, iangoa te bwai are e riki nakon te Uea are Tauro.

Kaaitaraki Iroun Taamnein te Atua

18. (a) Tera te bitaki ae karina n riki ibukin karaoan te mwakuri ae te kabanea ni buakaka iroun Tauro? (b) Baikara ana aanga Tauro ake e kabonganai ibukin bwainikirinan Tawita?

¹⁸ E nakoraoi ana moani waaki Tauro n rikina bwa te moan uea i aon Iteraera, ma rimwi riki ao e a manga aki-ongeaba iroun Iehova. (1 Tamuera 10:1, 24; 11:14, 15; 15:17-23) N tokina, e a aki manga boutokaa te uea aei taamnein te Atua. E rikirake ni korakora nanobubun Tauro ike e a karaoi iai mwakuri n tiritiri nakon Tawita, are e a tia ni kabiraki bwa e na uea imwina ao are e a boutokaki iroun taamnein te Atua ngkai. (1 Tamuera 16:1, 13, 14) E taraa ni kakai mwane Tawita. Bwa ni koauana, e taua te aabi ao Tauro te kainiwai. N te bong teuana ngke e tabe ni katanga te aabi Tawita, ao “Tauro e bakarerea ana raanti ba e kangai, N na kamatea Tawita ni kanimma ma rarikin te ru. Ao Tawita e kauoua birinakona mai matana.” (1 Tamuera 18:10, 11) Ma imwina riki e ongo Tauro ni bwanan natina ae Ionatan, are raoraon Tawita ao e taetae n tuea ni kangai: “Ngkai iai Iehova, ao e na aki kamateaki [Tawita].” Ma rimwi riki, e a manga “ukoukora te kamatea Tawita ni kani kanimma ma rarikin te ru n te raanti.” Ma e ngae n anne, ao Tawita “e nako mai matan Tauro, ao e bakarerea te raanti nako rarikin te ru.” E rawea maiuna Tawita ma e rimwina Tauro. E rangi ni kamamate te tai anne, ao e a riki taamnein te Atua bwa ana kairiribai Tauro. N te aro raa?​—1 Tamuera 19:6, 10.

19. E kanga ni kamanoa Tawita taamnein te Atua?

¹⁹ E rawea maiuna Tawita ao e nakon te burabeti are Tamuera, ma e a manga kanakoia ana aomata Tauro bwa a na taua. Ngke a a roko aomata aikai n te tabo are e karabaa iai Tawita, “e a roko naba tamnein te Atua i aoia ana man Tauro, ao a taetae ni burabeti naba.” A taonaki nako n taamnein te Atua n te aro are a a mwaninga te bwai are a kanakoaki ibukina. E a manga kanakoia ana man Tauro uoua riki te tai imwin aei, ma bon titeboo te bwai are e riki iai. N tokina, e a boni mwananga te Uea are Tauro ni kawara Tawita, ma e bon aki kona naba ngaia ni kaitaraa taamnein te Atua. E karokoa te aki kona ni kakamwakuri irouna te taamnei are raoiroi, “ni kabanea te ngaina arei ma te bong arei,” n te aro are e a reke iai ana tai Tawita ae tau ibukin rawean maiuna.​—1 Tamuera 19:20-24.

20. Tera reireiara man karakinan aron Tauro ni bwainikirina Tawita?

²⁰ Iai te reirei ae e kakorakoraa te nano ni karakinaia Tauro ao Tawita: A bon aki kona n tokanikai taani bwainikirinia Ana toro te Atua, ngkana a kaaitaraki iroun taamnein te Atua. (Taian Areru 46:11; 125:2) E a tia ni baireia Iehova bwa e na uea Tawita i aon Iteraera. Akea temanna ae kona ni bitia. N ara bong aikai, E a tia Iehova ni baireia bwa “e na tataekinaki euangkerion uean te Atua.” Akea temanna ae kona ni katoka karaoan te mwakuri aei naba.​—Mwakuri 5:40, 42.

21. (a) Tera ae a karaoia taani kakaitara ni boong aikai? (b) Tera ae ti onimakinna?

²¹ A taekin rongorongo aika kewe Aaro tabeua ao taan tautaeka, ao a bwainikirinira n te aro ae iowawa, bwa e aonga n toki ara mwakuri. Ma, n aron Iehova are e a tia ni kamanoa ana onimaki Tawita, e na bon kamanoia naba Ana aomata ni boong aikai. (Maraki 3:6) Mangaia are ti booti bwanara ma Tawita n atonga ae kangai ma te nano n onimaki ni koaua: “I onimakina te Atua, N na aki maku; tera ae a kona aomata ni karaoia nako iu?” (Taian Areru 56:11; 121:1-8; I-Rom 8:31) Ti bia teimatoa n tokanikai n ana ibuobuoki Iehova i aoni kangaanga aika ti kaaitara ma ngaai n ara tai ni karaoa te mwioko are mairoun te Atua, are tataekinan rongorongon te Tautaeka n Uea nakoia botannaomata ni kabane.

[Kabwarabwara ae nano]

Ko Uringnga?

• Bukin tera bwa ti bibitii arora n angareirei?

• E a uki “te mataroa ae warebwe” ni kaineti ma mwioko aika boou?

• Tera ae kabobongaki man karaoan ara mwakuri n uarongorongo n taabo ake e karako iai butimwaean te rongorongo ae raoiroi?

• Bukin tera ngkai akea te tia totoko temanna ae e kona ni katoka uarongorongoan euangkerion te Tautaeka n Uea?

[Te Bwaoki n te iteraniba]

Te Raunnano ae Korakora

“A kukurei ao a rau nanoia n aia mwakuri ibukin Iehova.” Aio e kabwarabwara raoi aron te utu teuana are e mwaing mai Tibein nako Bolivia. E a tia natiia are te mwaane, ni kaman roko iai ni buokiia taari tabeman aika a raroa nako man te ekaretia. A anaaki nanoia ana karo n te kimwareirei ae bati ae a noria iroun natia aei, ao a waekoa ni mwaing nako iai ma natiia mwaane aika aman aika a mena aia ririki i marenan 14 nakon 25, ao ni beku ikekei. Teniman mai buakoia natiia, a karaoa te mwakuri ni bwaiania ngkai, ao natia are e a kaman roko imwaaia e a kaea te Kuura Ibukin Kataneiakiia Minita.

E taku Nei Angelica ae ai 30 ana ririki mai Kanata, are e mwakuri i Eurobe Mainiku: “A rangi ni mwaiti kangaanga, ma e reke raunnanou ni buokaia aomata n te mwakuri ni minita. E rangi n riingaki naba nanou n taeka ni kakaitau aika mwaiti mairouia taani Kakoaua n te tabo anne ake a aki toki ni kaaitauai ibukin rokou ni buokiia.”

A taku taari aika uoman ae ai 20 tabun aia ririki, ake a roko man te United States ake a mwakuri n te Dominican Republic: “A rangi ni mwaiti katein te aba aei aika ti riai ni kataneiaira iai. Ma e ngae n anne, ti nanomwaaka ni mwiokoara ao ai itiman mai buakoia aomata aika ti reirei ma ngaiia n te Baibara ae a a roroko ngkai n taiani bobotaki.” A a tia n ibuobuoki taari aika uoman aikai ni katean te kurubu ibukia taan uarongorongoa te Tautaeka n Uea, n te kaawa ae akea iai te ekaretia.

E taku te tari te aine ae Nei Laura, ae ai 20 tabun ana ririki, are e a tia ni mwakuri n aaba aika ianena i nanon aua te ririki: “I kataia ni kateimatoaa kabebetean aroni maiu. Aei are e a buokiia taan uarongorongo bwa a na noria, bwa te maiu ae bebete, e boto i aon motikan oin nanon te aomata ma wanawanana, ao tiaki kaotan te maiu ni kainnano. Te kona ni buokiia aomata, ao e a moamoa riki rooro-n-rikirake, bon te bwai ni kakimwareirei nakoiu, are e a taobarai taiani kangaanga ake I kaaitara ma ngaai n au tai ni mwakuri ni minita n te aba ae ianena. N na bon aki katoka au mwakuri ni minita n te tabo aei, ibukin mataiakinan te maiu riki teuana, ao N na teimatoa ni karaoia ngkai e kariaia Iehova.”

[Te Bwaoki/Taamnei n iteraniba 26]

Kanoan te Boki ae Uarereke ae Good News for People of All Nations

Iai i nanon te boki ae uarereke ae Good News for People of All Nations te taetae-ni-kawai ae kaka teuana te iteraniba abwakiia, aika katauraoaki n taetae aika 92 aika kakaokoro. A koreaki taetae-ni-kawai aikai n te aro are ngkana e warekia te aomata are e kawaraki, ao titeboo ma ko bon taetae iai nakoina.

Iai mwaben te aonnaba i kunna. Kabongana te mwabe aei ni karekea iai tabekan am taeka nakon te aomata are ana auti anne. Tao ko kona ni kotea te aba are ko mena iai ao imwina kaotia nakoina bwa ko kan ataa abana. Imwin anne, ko a kona ngkanne ni moana am maroro ma ngaia n akea te imamaakin i marenami.

N te moantaeka i nanon te boki aei, ao a karinanaki raoi iai aanga aika ko na karaoi bwa e aonga n uaana am ibuobuoki nakoia aomata ake ko babanga aia taetae. Taiaoka ni wareki raoi aanga aikai ao n iri nanoia.

N te iteraniba are e karinanaki iai kanoan te boki aei, ao e aki tii karinanaki iai taian taetae, ma irarikin taetae aikai ao iai te kanikina ibukin kaotakin te taetae teuana ma teuana. E kona n reke buokam ni mwaake aikai ni kinaa iai bwa te taetae n raa are a boretiaki iai turaeki ao booki riki tabeua mai buakon taetae aika kakaokoro.

[Taamanei]

Ko kakabongana te boki ae uarereke aei n te mwakuri ni minita?

[Taamnei n iteraniba 29]

A a tauraoi ngkai ara boki aika aanaki n te Baibara n taetae aika 400 tabun mwaitiia

GHANA

LAPLAND (SWEDEN)

BIRIBIN

[Taamnei n iteraniba 30]

Ko kona ni mwakuri n te tabo ae e korakora riki iai kainnanoaia taan tataekina rongorongon te Tautaeka n Uea?

ECUADOR

DOMINICAN REPUBLIC