Te Reirei Raa ae Kona ni Kanakoraoa Maium?

KO A TIA n taonaki nako n taiani kangaanga n te aro are titeboo ma ko a namakinna ae ko a kani bwabwa? Iangoa korakoran te rawawata ae e na riki nakoim ngkana e kairua arom ni kaitaraa teuana te kangaanga mai buakon aikai! Akea te aomata ae bungiaki ma te konabwai ni kaaitarai kangaanga ni kabane, ke ni karaoi motinnano aika raraoi n taai nako. Aio bukina ae ti kainnanoa iai reiakinara. E ngaa te tabo ae ko kona n reireiaki iai arom n tokanikai ni kaitaraan am kangaanga ni maium?

A mwaiti aomata aika ataei ao kaara aika a taku bwa moan te kakawaki te reirei ae reke man taiani kuura. A taku taan rabakau tabeman bwa a “kakoauaa raoi bwa e aki kona n reke te mwakuri ae manena ngkana akea te beeba ni bwaati man te reirei ae rietata.” Ma e ngae n anne, bon iai naba baika kainnanoaki irouia aomata aika a aki kona n reke man te reirei ke te mwakuri. N te katoto, te koaua bwa e na buokiko te reirei ae rietata, bwa ko na riki bwa te karo, te buu, ke te rao ae raoiroi? Ni koauana, a kona aomata aika mataiakinaki ibukin wanawanaia ni mwakuri, ni karikirakei aroaro aika a aki kakukurei, a kabwaka ni kaira aia utu, ke a kona naba ni bakabureiia.

A onimakina te Aro tabeman ibukin kairiraia, ao kaanga nibwan te reirei, ma a manga rikirake ni maraki nanoia ibukin aki reken te ibuobuoki ae manena ibukin kaitaraan aia kangaanga ni maiuiia. Ibukin kabwarabwaran aei, e taku Emiliaa mai Mexico: “I motika nanou 15 te ririki n nako, bwa I a aki kona n tiku riki ma kainnabau. Ti a bon ununun naba n taai nako. I aki kona ni katoka moi mangingina, ao I aki toki ni kitania natira aika uarereke ibukin kakaaeana. I a bon taonaki n te bwarannano ae korakora. N taai tabetai I nako n ira te taromauri ni kakaaea iai te anga ae e na kona n reke iai buokau. E ngae ngke e kabonganaki te Baibara n taai tabetai, ma I tuai man ongo te reirei teuana ae e kaineti raoi ma au kangaanga; ao akea naba ae e a tia ni kawarai n tuangai arou ae I riai ni karaoia. Bon akea raunnanou ae reke man tekatekau i nanon te umwantabu, ao kaokiokan tataro tabeua.” A aki rauaki nanoia tabeman n noran mataniwin aia Aro ngkai a aki kaakaraoa te katoto ae moanibaan te tamaroa ni maiuiia. Ao ibukin anne, a a mwaiti aika a aikoa onimakina te Aro bwa ngaia nibwan te kataneiai ke te reirei ae kona ni kanakoraoa aroni maiuiia.

Mangaia are ko kona n titirakiniko ni kangai, ‘Te reirei raa ae e kona ni kanakoraoa maiu?’ Te koaua bwa maiuakinan te aroaro ni Kristian ni koaua, e kona ni kaekaa te titiraki ae kakawaki aei? E na rinanoaki aei n te kaongora are imwina.

[Kabwarabwara ae nano]