Titiraki Mairouia Taani Wareware
Tera ae kona ni karaoia te aomata ae karawawataki irouia taimonio, bwa e aonga ni kabebeteaki?
E kaotaki n ana Taeka te Atua bwa a kona ni kabebeteaki aika a karawawataki irouia taimonio. E kakawaki te tataro ibukin kainaaomatakira man aei. (Mareko 9:25-29) Ma tao e riai naba te aomata ae karawawataki irouia taimonio, ni karaoi mwakuri riki tabeua. E oti mani bwaai ake a irekereke iai Kristian ake n te moan tienture, taekan baika a kainnanoaki riki.
A irekereke ma taimonio tabeman kaain Ebeto rimoa, imwain rikiia bwa taan rimwin Kristo. Ma imwin motikan nanoia bwa a na beku iroun te Atua, “ao taan tabunea aika bati, a ikoti aia boki, ao a kabuoki i mataia aomata ni kabaneia.” (Mwakuri 19:19) Man kabuekan aia boki n tabunea, te koraki ake a a tibwa kaaina te onimaki i Ebeto, a a katea iai te banna ni katoto nakon ane e kani kainaaomataki man aia kakumekume taimonio ni boong aikai. E bon rangi ni kakawaki ibukia aomata aikai bwa a na kanakoi bwaai ni kabane aika irekereke ma te tabunea. E nanonaki n aei, booki, maekatin, birim, rongorongo man te Internet, katangitang aika a na karekea iangoan te tabunea, n ikotaki naba ma bunna ke bwaai riki tabeua aika kakamanenaki ibukin “te kamanomano” ke aika iai rekerekeia ma te tabunea.—Te Tua-Kaua 7:25, 26; 1 I-Korinto 10:21.
Tabeua te ririki imwin tiaia Kristian ake i Ebeto ni kamaunai aia boki n tabunea, ao e a korea ae kangai te abotoro Bauro: “Ti kaunrabata . . . ma taanga n tamnei aika buakaka.” (I-Ebeto 6:12) E kaumakia Kristian Bauro ni kangai: “Kam na karin ami bwai ni buaka nako ake mairoun te Atua, ba kam aonga ni kona n teimatoa n eki nako ana bwai n nanowanawana te riaboro.” (I-Ebeto 6:11) E boni kaineti naba ma ara bong aikai te taeka n reirei anne. A riai Kristian ni kakorakorai aia bwai ni buaka ibukin te onimaki bwa a aonga ni kamanoaki mairouia taamnei aika buakaka. E kamataataa Bauro ni kangai: “Kam na uouota naba te otanga are te onimaki, ba raoni baikai ni kabane, are kam kona iai ni kabane n tiring ana kai ni bakarere teuare buakaka aika uramwaka.” (I-Ebeto 6:16) E kakorakoraki ana onimaki te aomata rinanon te reirei n te Baibara. (I-Rom 10:17; I-Korote 2:6, 7) Mangaia are, e buokira reiakinan te Baibara ni karikirakea ara onimaki are e a riki bwa bwaini kamanoara man aia kariri taamnei aika buakaka.—Taian Areru 91:4; 1 Ioane 5:5.
A kainnanoa karaoan teuana riki te mwaneka ae kakawaki Kristian ake i Ebeto. E tuangia Bauro ni kangai: “Kam na tataro n aki toki n taian tataro ni kabane ma bubuti . . . kamarurungingkami nako iai n te botumwaka ni kabanea.” (I-Ebeto 6:18) Eng, a riai te koraki ake a kani kainaaomataki man aia kakumekume taimonio ni boong aikai, ni kakorakoraia n tataro nakon Iehova ibukin kamanoaia. (Taeka N Rabakau 18:10; Mataio 6:13; 1 Ioane 5:18, 19) E tonuraoi ana taeka te Baibara ae kangai: “Ma ngaia ae kam na irira nanon te Atua; ma kam na rarawa nakon te riaboro, ao ane e na biri nako mai roumi iai.”—Iakobo 4:7.
Ngkai e riai te aomata are taniaki irouia taimonio ni kakorakoraa n tataro, a kona naba Kristian ni koaua ake tabeman, n tataro ibukia aomata ake a korakora nanoia ni kani beku iroun Iehova ao ni kakorakoraia naba ni kararoaia mairouia taamnei aika buakaka. A kona ni butiia te Atua ibukin kakorakorakin ana onimaki te aomata ae taniaki irouia taimonio, bwa e aonga n tokanikai man aia mwakuri n iowawa. Kioina ngkai e taekinna Ana Taeka te Atua bwa “e bati ni mwaka ana tataro te aomata ae raoiroi, ngkana e tataro ma nanona,” a na boni kakabwaiaki aomata aika karawawataki irouia taimonio ake a kabanei korakoraia n “rarawa nakon te riaboro,” man aia tataro Ana toro te Atua.—Iakobo 5:16.
[Taamnei n iteraniba 27]
A urui aia boki n tabunea taan onimaki i Ebeto