Tera Ana Kaantaninga Te Atua Ibukin Te Aonnaba?
E AERA ngkai ko kukurei n nakonako n taabo ni kaukiang ke ibuakon uee aika boiarara? Bukin tera bwa ko kakatonga ao e kaungaaki nanom ngkana ko tarataraa te nama ae maaborabora ma bikena ae takamainaina? E aera ngkai e kakukurei noran iika aika bati aika kibakiba i aon taari? Ao bukin tera bwa e kakukurei tarataraan taian nii aika mwaeiei n te ang mwaitoro?
Tii teuana te kaeka nakon titiraki aikai ni kabane. Ti karikaki bwa ti na maeka n te Baretaiti! Te tabo are a moani maeka iai Atam ao Ewa. E reke nanora ni kani maeka n te Baretaiti mairouia, ao ngaiia, a karekea mairoun te tia Karikiriki ae Iehova ae te Atua. E ataia ae a na kukurei aomata n te Baretaiti ibukina bwa e karikira ma aroaro ibukin karekean te kukurei n te aonnaba ae moan te tikauarerei.
Tera bukin karikan te aonnaba iroun Iehova? E “karaoia ba e na maekanaki.” (Itaia 45:18) E angania Atam ao Ewa te baretaiti ae tikauarerei bwa mwengaia, “te tia Karaoa aonnaba.” (Ieremia 10:12, NW; Karikani Bwaai 2:7-9, 15, 21, 22) Ai kukureira ngaiia ni karanga, uee, ao kain aona! A nori mannikiba aika kantara i karawa, ao maan aika kakaokoro aika mwamwae i aon te aba, aika manana. A biribiri iika ao maan riki tabeua i nanon te ran ae itiaki. Ma ae moan te kakawaki riki, a unga Atam ao Ewa ngkai ngaiia uoman. A kona ni karikiia natiia ao ni karakaa nako te Baretaiti ma te kukurei n aia utu ae e a ririkirake.
E ngae ngkai e a aki baretaiti te aonnaba ni boong aikai, ma e kona naba ni kabotauaki ma mwengan te utu ae kakukurei ae tamaroa. A tauraoi baika ti kainnanoi ni mwengara ae taabangaki aei mairoun te Atua, n aron te oota, te riringa, te ran, ao amwarake. A kakawaki iroura ootan taai ma te riringa ao maamaan namwakaina n te tairiki! (Karikani Bwaai 1:14-18) Iai te bwaa i nanon te tano, n aron te kooro ao te oera ae ibukin karekean te kabuebue. Ti a kona ni karekea te ran man rokon te karau ao butina nakoni karanga, naama ao taari aika bane n tomaaki, ao manga rikina ni buane bwa te nang ae na manga bwaka bwa te karau. Ao iai naba nangoan aontano uteute aika mawawa.
N aron ae e kona ni kawakinaki te amwarake n te kabwate, te aonnaba ngkanne e a riki naba bwa ai aron te kabwate ae a rangi ni mwaiti amwarake iai. Ngkai iai kaai ao uanikai i nanon oo-n-aroka, e ‘anganira te karau mai karawa ma boongi ni mari aika abwabwaki Iehova ao e kaon nanora n te amwarake ma te kimwareirei.’ (Mwakuri 14:16, 17) Kioina ngkai ti namakinna ngkai bwa te aonnaba bon te mwenga ae tamaroa, iangoia bwa tera ngkanne arona ngkana e a bitia “te Atua ae kukukurei” ae Iehova nakon te baretaiti!—1 Timoteo 1:11, NW.