Karekean te Atatai i Aon Taekan te Atua N te Aro Raa?

A kona n nanououa tabeman bwa e kukurei te atua ni kaotia nakoia aomata ke e aki. ngkana ngaia bwa e kukurei, tera ngkanne arona ni karaoia?

N TE KA-16 n tienture, ao e taekinna te tia Boutokaa te Aro ni Borotetanti ae John Calvin, bwa a aki kona n ataa te Atua aomata ni bon oini korakoraia, ma tii ngkana e kaotia nakoia. Ma tabeman, a kona n iangoia bwa e boni kukurei te Atua ni kaotia nakoia aomata ke e aki. Ao ngkana e kukurei, tera ngkanne arona ni karaoia?

Iai bukini karaoan ana mwakuri ni kabane Iehova, ae te “tia Karikiriki.” E kona ni kakoroi raoi bukin ana kaantaninga ngkai bon te “Atua ae Moan te Mwaka” ngaia. (Te Minita 12:1; Te Otinako 6:3) Ti kona ni kakoauaa raoi bwa e korakora nanona ni kani kaotii ana kaantaninga nakoia aomata, kioina ngkai e kaira ana burabeti are Amota bwa e na korea ae kangai: “E na bon aki karaoa te bwai teuana te Uea ae Iehova, ngkana e aki kaota moa nanona ae raba nakoia ana toro aika burabeti.” Ma noria, e taekinaki bwa e a tia te Atua ni kaotii ana kaantaninga tii nakoia ana toro ao te koraki ake a tangiria ma nanoia. E aki ngkanne eti anne? Ko taekin rongorongom aika raba nakon antai? Nakoia aomata ni kabane ke tii nakon raoraom ae te kabanea ni kaan ma ngkoe?—Amota 3:7; Itaia 40:13, 27, 28.

A kaonaki n te kani karinea te Atua te koraki aika nanorinano ake e a reke irouia te wanawana ao te atatai mairouna. Ma e ngae n anne, ao e aki tau te nano ni kani karinea te Atua n tii ngaia, ngkana ti kani kakabwaiaki n te wanawana ao te atatai mairoun te Atua. E kamataataa te Baibara bwa ngkana ti kan reiakina ana iango te Atua, ti kainnanoa te nanorinano: ‘Kaiko au tua nako iroum. Katanimaia taningam nakon te ataibwai. Raira nanom nakon te ataibwai. Kanenea bwanam nakon te ataibwai. Ukoukoria ba kaanga te tirewa.’—Taeka N Rabakau 2:1-4.

Ni koauana, e na boni kona ni kinaa raoi te Atua te aomata ae nanorinano ae kekeiaki mwaaka n te itera aei. E reitaki nako te kibu ae Taeka N Rabakau ni kangai: “E anganga te rabakau Iehova; e oti nako te atatai ma te ataibwai mai wina.” Eng, a kona aomata aika ukoukora te koaua ma nanoia ni koaua, n “ata iai te raoiroi, ma te motiki-taeka ae eti, ma te aro ae riai, ma kawai aika raraoi ni kabane.”—Taeka N Rabakau 2:6-9.

Ukoukoran te Koaua

E taekinaki ae kangai n The Encyclopedia of Religion: “Aroia aomata, a kainnanoa ataakin te kaokoro i marenan te bwai ae koaua ao ae aki, ae korakora ke e ngore, ae koaua ke e kewe, ae itiaki ke e bareka, ae mataata ke e mangaongao, ao te rabakau n ota naba ni bwaai aika aki rangi ni mataata.” Ibukin kani karekean raunnanoia n te itera aei, a a tia aomata n ukoukora te koaua i nanon te tai ae maan. E a reke irouia aomata aika ukera taekan Iehova ae taekinaki iroun te tia areru bwa “te Atua ni koaua” te atatai ae boraoi abwakina ma korakoran aia kakaae.—Taian Areru 31:5.

Nanon te ara ae Iehova, “E Karaoia bwa e na Riki.” (Karikani Bwaai 2:4) Mangaia are nanon aran te Atua e katereterea nakoana ae te tia Karikiriki, ma ana kaantaninga. Ni koauana, ataakin ao kamanenan te ara ae Iehova boni kanikinaean te Aro ae koaua. E teretere bwa e kakoauaa naba te iango anne Iesu. E taekina ae kangai ni kaineti ma taan rimwina, ngke e tataro nakon te Atua: “I a kamani kaota aram nako ia, ao N na boni kaotia; ba e na mena i nanoia te tangira are Ko tangirai iai, ao Ngai i nanoia.”—Ioane 17:26.

E taetae ma te aki nanokokoraki te I-Ebera temanna ngkoa ae arana Ioteba, ibukin onimakinan ana iraorao ma te Atua, ngke e kaaitara ma te tibwanga ae kaotan nanon taiani mii, ao e taku: “Tiaki bon ana bwai te Atua kaotan nanoni mi?”—Karikani Bwaai 40:8; 41:15, 16.

Tabeua te tienture imwina, ao e mii Uean Baburon ae Nebukaneta, ao a aki kona ni kaota nanona ana tia rabakau. E taku te burabeti ae Taniera nakon te uea: “Bon iai te Atua i karawa ae kakaotioti baika raba, ao E kaota ae na roko ni boong aika kaitira nakon te uea ae Nebukaneta.”—Taniera 2:28.

E kaotaki n aia katoto Ioteba ao Taniera bwa e kona n reke te wanawana ao te atatai i aon taekan te Atua, tii irouia akana beku ibukina. Te koaua, bwa reken akoara iroun te Atua e kona ni kainnanoaki iai kakeaan koaua tabeua ake ti boutokai rimoa. Ngaia are a karaoia I-Iutaia ake n te moan tienture ake a a riki bwa Kristian. A kaikawaki rake bwa a na karinei man ongeaba nakon tuua ake a kateaki i aan te waaki n Iutaia, mangaia are a kainnanoa teutana te tai ibukin butimwaean Iesu bwa bon te Mesia. E roko ni kakoroa nanon te Tua Rinanon Mote, ae e riki bwa “tamneini baika raraoi aika na roko.” (Ebera 10:1; Mataio 5:17; Ruka 24:44, 45) E oneaki mwina n “ana tua Kristo,” are e rangi ni kakawaki riki nakon te Tua Rinanon Mote.—I-Karatia 6:2; I-Rom 13:10; Iakobo 2:8.

Ti a bane n tia ni bungiaki nakon te aonnaba ae ianena mairoun te Atua. Ibukin te bure are rikiara mairouia ara moani karo, ti a bungiaki bwa ana kairiribai te Atua, aika akea aia atatai ae eti i aon ana kaantaninga. Iai naba rikiara ae nanora ae mwamwanaira. (Ieremia 17:9; I-Ebeto 2:12; 4:18; I-Korote 1:21) Ibukin ngkanne karekean ara iraorao ma te Atua, ti riai n rabakau ni bitii ara iango nakon aron te Atua n iango. E kangaanga karaoan aei.

Tao e na kangaanga kaakean iango ao mwakuri man Aaro aika kewe, riki ngkana ti a kaman reiakinaki iai man uarerekera. Ma te koaua bwa ti wanawana ngkana ti teimatoa n nakonako n te kawai ae bure? Ti bon aki! Ti wanawana riki ngkana ti bitii arora n iaiango bwa ti aonga ni karekea akoara iroun te Atua.

Ataakin Ana Kawai te Atua n Reirei

Ti na karekea iia buokara ibukin ataakin te Taeka ae koaua ao maiuakinana imwina? I aon Iteraera ngkoa, ao e karaoa te kairiri te Atua rinanoia aomata ake e mwiokoia ake a kakaonimaki ma n onimakinaki. Kristo bon Atun te ekaretia ni Kristian ni boong aikai, ao n aron anne, e kairia te koraki ake a ukoukora te koaua ma nanoia ni koaua. E karaoa aei rinanoia taan rimwina aika kakaonimaki ma n onimakinaki ake a riki bwa te rabwata ae mwiokoaki ni kairaia ao kamanoaia taan ukoukora te koaua. (Mataio 24:45-47; I-Korote 1:18) Ma e na kanga temanna ni kona ni kinaa kawain te Atua n anga reirei aei?

A kataia taan rimwin Iesu Kristo ni koaua ni kaotiotii aroaron Iesu ake e kaotiotii ngke e riki n aomata. N te aonnaba ae rikirake te waaki ae buakaka iai, a kai kinaaki taan rimwin Kristo aikai ngkai a kaotiotii aroaroia ni Kristian. (Nora te bwaoki n iteraniba 6.) A kaotiotaki aroaro aikai n am Aro ae ko kaainna ngkai ke n aia Aro kaain rarikim? E na manena ibukim kakaaean te koaua i aon aei ni kabotaua aia waaki Aaro tabeua ma ae e taekinaki n te Baibara.

Ti kaoko, ngkoe ae ko wareware, bwa ko na karaoa aei rinanon reiakinan te Baibara. N te ririki ae nako ao a a tia ni kamanena te babaire aei aomata aika 6,000,000 mwaitiia ao utu naba ni moana reiakinan te Baibara ma Ana Tia Kakoaua Iehova n aaba aika 235 mwaitiia. Karekean te wanawana ao te atatai i aon taekan te Atua bon te mwakuri ae akea tokina, e karaunano ao e karekei kakabwaia. E aera bwa ko a aki moana karekean te wanawana ao te atatai i aon taekan te Atua? Bon te bwai ae ko na aki uringaaba iai ngkana ko a tia ni waakinna. Eng, ti boni kona ni karekea kinaakin te Atua!

[Bwaoki n te iteraniba 6]

AKANA KARAOA AE BORAOI MA NANON TE ATUA . . .

a teimatoa n tei i nuka n taai n itabarara i marenan tautaeka.​—Itaia 2:4.

a kariki uaa aika raraoi man karaoan nanon te Atua.​—Mataio 7:13-23.

a kaotiota te tangira ni koaua i marenaia.​—Ioane 13:35; 1 Ioane 4:20.

a taetae n te nano ae tii teuana n taabo nako ike a mena iai.​—Mika 2:12.

a aki kakairi n aroaroia ao kateiia kaain te aonnaba ae otabwaninia aika bure.​—Ioane 17:16.

a tataekina te koaua ao ni karekeia taan rimwin Kristo.​—Mataio 24:14; 28:19, 20.

a bobotaki ni katoatai ibukin te uaia n ikaungaunga.​—Ebera 10:25.

a ikoikotaki n te botaki teuana ae katobibia te aonnaba ni kamoamoaa te Atua.​—Te Kaotioti 7:9, 10.

[Taamnei n iteraniba 7]

E kona n reke te atatai i aon taekan te Atua irouia aomata n tatabemania nako, n te utu, ao n te ekaretia