Te Maraki ae Korakora ao n Teimatoa

E KARAOA ana kakaae temanna bwa e kan ataia bwa e kanga waakinakon te tai, n rota aia namakin aomata ake a karawawataki ni maten ae tangiraki irouia. E kanakoi titiraki nakoia kaaro aika waniman mwaitiia ake a tia ni mate natiia tabeua te ririki n nako, ma a aki bane ni kaeka. E kabwarabwaraa te karo temanna ae arana Vladimir are mate natina te mwaane nimaua te ririki ma imwaina, bwa e tuai kona ngkai n taekina natina are mate.a

E rangi ni kabuta te rawawata ae wenemaan n aron anne i buakoia kaaro aika rawawata. E korea ae kangai William tebwina te ririki n nako ibukin maten natina te mwaane ae 18 ana ririki ae bwabwa: “I teimatoa ni maraki ni maten natiu ni karokoa ngkai, ao e na aki bua ni kabane au bong ni maiu.” E korea ae kangai Nei Lucy nimaua te ririki imwin buan natina te mwaane n te aoraki ae aki kaantaningaki: “Tao n tabebong, I aki toki n iaiangoia bwa e aki koaua. I taku bwa I miibuaka ao N na waekoa n uti man matuu. Imwin tabeua te tai, I a moanna n ataia bwa ngaia e boni koaua bwa e a aki oki. E mate natiu te mwaane nimaua te ririki n nako, ma n tabetai ngkana tii ngai ao I a mangatang ngkana I uringnga.”

Tera bukin namakinan te rawawata ao te maraki ae maan irouia kaaro aika rawawata n aron Vladimir, William, ao Lucy? Ti na rinanon bukina tabeua.

Bukin Tera Ngkai E Bati te Nanokawaki?

Ngkana e bungiaki te nati i nanon te utu, ao iai aia namakin kaaro ae e aki kona ni kabotauaki ma namakin aika reke man aeka n iraorao ni kabane. Tautauan ma tarataraan natiia ni matuna, ke norakin moangarena ae kakateke, e karekea te kukurei ae korakora ao te raunnano nakoia kaaro. A kawakinia raoi natiia kaaro aika tatangira. A reireinia bwa a na bwaina te katei ae riai ao te akoi. (1 I-Tetaronike 2:7, 11) A kukurei kaaro ngkana a kakairi natiia n reirei aikai, ao a kaantaningai baika raraoi ake a na karaoi natiia.

A mwakuri korakora kaaro ibukin karekean maiuia natiia. A katoatai ni katauraoa te mwane ke bwaai aika manena ake a na kona ni buoka iai natiia ni kateiutu nakon taai aika imwaia. (2 I-Korinto 12:14) E teretere ni banebuakan, te tai, te korakora, ao te mwane bwa a korakora nanoia ni kan kaikawaia natia bwa a na maiu. Akea aia kaantaninga bwa a na moantaai ni mate. Ngkana e mate te teei, e aki koro bukin kaikawaana ao e a matebuaka iai aia kaantaninga kaaro ibukina. E a toki te tangira ae korakora are karikirakea te karo nakon natina, bwa e a tei te oo te atibu i marenaia ae te mate. A a rotakibuaka ngkai nanoia ni buan natiia aika tangiraki aika mate. A namakina te nanokawaki ae korakora kaaro ae kangaanga tokina.

E kakoauaa te Baibara bwa e korakora ao n teimatoa marakia karo ni maten natia. E kabwarabwaraa ae kangai te Baibara ibukin te bwai ae riki nakon Iakoba ngke e ongo ae e tiringaki natina are Ioteba: “Ao Iakoba e raeuai ana kunnikai, ao e kabaea nukana n te kunnikai ae raeroba, ao e kaota nanokawakina i bukin natina ni boong aika bati. Ao a bane natina mwane ma natina aine n tei rake ba a na kabebetea nanona; ma e rawa ni kabebeteaki nanona; ao e kangai, Ba N na ruo nako Tiore [ke te ruanimate] nakon natiu n nanokawaki.” E teimatoa Iakoba n nanokawaki i nanon ririki ake imwina ibukin natina are e taku bwa e mate. (Karikani Bwaai 37:​34, 35; 42:36-38) Te katoto riki teuana man te Baibara, e irekereke ma te aine ae kakaonimaki ae arana Naomi, are a mate natina mwaane aika uoman. E rangi ni korakora nanokawakina n te aro are e a tangiria ni bita arana ae Naomi are nanona “Nei Karewe,” nakon Mara, ae nanona “Nei Maai.”​—Ruta 1:3-5, 20, 21.

Ma e aki tii kakoauaa rawawataia kaaro te Baibara. E kaotaki naba iai bwa e na bon kakorakoraia te koraki aika a rawawata Iehova. N te kaongora ae imwina ao ti na rinanon aanga tabeua ake e katauraoi Iehova ibukin kabebetean nanoia aomata ake a rawawata.

[Kabwarabwara ae nano]