Tera Aron Rotakim N Reiakinan Te Koaua Ibukini Moone?

ABOUTOKAA te reirei ae rangi ni kamatauningaa Iehova ae te Atua ao aroarona te koraki ake a kakoauaa bwa moone bon te tabo ni kammarakaki. Ni koauana, e taekinaki n te Baibara ae te Atua e na boni kamaunaia aika buakaka. (2 I-Tetaronike 1:6-9) Ma unin te Atua n te eti bon tiaki aroarona ae te kabanea ni kakawaki.

Bon tiaki te tia kani kammaraki ke te tia kariki kangaanga te Atua. E titiraki naba ni kangai: “Iai au kukurei teutana ni maten te aomata ae buakaka?” (Etekiera 18:23) Ngkana ngaia bwa akea kukurein te Atua ni maten ane e buakaka, e na kanga ngkanne ni kimwareirei n aki totoki n tarataraia te koraki ake a kammarakaki?

Aroaron te Atua ae moan te kakawaki bon te tangira. (1 Ioane 4:8) Ni koauana e rangi n “akoi Iawe nakoia aomata nako, e nanoangaia akana e karikiia.” (Taian Areru 145:9, BK) Ibukin anne, e tangirira naba te Atua bwa ti na karikirakea tangirana ni koaua i nanora.​—Mataio 22:35-38.

Tera ae Kairiko —Maakani Moone ke Tangiran te Atua?

Te reirei ae kammarakaia aomata i moone e karika mamaakan te Atua ae rangi n riao. Ma ni kaitaraan anne, te aomata ae reiakina raoi te koaua ibukin te Atua ao ni karikirakea tangirana i nanona, e na kona ni maakua n te aro ae riai. E kabwarabwaraaki ae kangai n Taian Areru 111:10: “Moan rikin te rabakau maakan Iehova; Bon iai nanowanawanaia ae raoiroi akana toua mwin ana taeka ni kabaneia.” Maakan te Atua aio e aki nanonaki iai bwa e kakamaaku, ma boni kaotan te karinerine ae bati nakon te tia Karikiriki. E kauekea i nanora maakani karaoani baika a na aki kakukureia.

Iangoa aron rotakini maiuni Kathleen ae ai 32 ana ririki ae kakamanenai ngkoa taian drug ngke e reiakina te koaua ibukini moone. E kaatuua maiuna ni botaki ni kakukurei, te tiritiri, bakataeani maiuna, ao ai aroaro riki aika bubuaka. E taku: “I taraa natiu te aine ae teuana ana ririki ao I iango ni kangai, ‘Ani bon taraa te bwai ae I karaoia nakoina, N na boni kabuekaki i moone n te mwakuri aei.’” E kataia Kathleen ni katoka kabonganaan taian drug, ma e bon aki kona n tokanikai. E taekina ae kangai: “I kani karaoa ae raoiroi, ma a bon rangi ni karawawataai baika riki ni maiu ao n te aonnaba aei. Taraan ae ai bon akea uaani karaoan ae raoiroi.”

Imwina riki e a kaitiboo Kathleen ma Ana Tia Kakoaua Iehova. E taekina ae kangai neiei: “I reiakinna bwa bon akea te ai ni moone. A bon rangi n teretere baika a taekinaki n te Baibara. E rangi ni karaunano nakoiu ataakin ae N na aki kabuekaki n te ai ni moone.” Ma e reiakina naba ana berita te Atua are a na bane aomata ni maiu n aki toki n te aonnaba ae ai akea iai aika buakaka. (Taian Areru 37:10, 11, 29; Ruka 23:43) E kukurei ma n taku: “I a karekea ngkai te kantaninga ni koaua ae te maiu n aki toki n te Bwaretaiti n te aonnaba!”

E na boni kona n toki kabonganaan taian drug iroun Kathleen n akea maakakin te kabuekaki n te ai ni moone? E kaeka ni kangai: “Ngkana e roko tangiran kamanenaan taian drug ae korakora irou, ao I tataro nakon Iehova ae te Atua ni bubutiia bwa e na buokai. I iaiangoa ana iango ni kaineti ma aroaro aika kammaira aikai ao I aki tangiria ni kani karawawataa nanona. E kaekai au tataro nako.” (2 I-Korinto 7:1) Maakani karaoani baika a na aki kakukureia te Atua are e a buoka Kathleen bwa e na tokanikai i aoni baika a tautoronna.

Eng, boni karikirakean tangiran te Atua ao maakakina n te aro ae riai are e na kona ni kairira nakoni karaoan nanona ao karekean te kukurei ae aki totoki, ma tiaki ni maakakin te kammarakaki n te ai ni moone. E korea ae kangai te tia areru: “A bane ni kabaia akana maka Iehova, Akana nakonako i nanoni kawaina.”​—Taian Areru 128:1.

[Taamnei n iteraniba 8]

Antai Aika A Na Kaotinakoaki Mai Moone?

Tabeua rairai n te Baibara a karikirakea te mangaongao n rairakin taeka ni Kuriiti aika uoua aika kaokoro nanoia ae Geʹen·na ao Haiʹdes nakon te taeka ae tii teuana ae “moone.” N te Baibara ao e kaineti te taeka ae Geʹen·na ma te kamaunanakoaki are akea iai kantaningaan te mangauti. Ni kaitaraan anne, te koraki ake i Haiʹdes ke Eriti, bon iai irouia kantaningaan te mangauti.

Ai ngaia are imwini maten Iesu ao mangautina, ao e a taetae te abotoro Betero ni karaui nanoia ana taan ongora, bwa ‘e aki kitanaki Iesu i Eriti [“moone,” King James Version].’ (Mwakuri 2:27, 31, 32; Taian Areru 16:10) Te taeka are e rairaki bwa “moone” ae Eriti n te kibu aei bon rairan te taeka ni Kuriiti ae Haiʹdes. E aki nako Iesu nakon te tabo ae e ura iai te ai. Eriti ke “moone” bon te ruanimate. Ma bon tiaki tii Iesu ae kaotinakoaki iroun te Atua mai Eriti.

E taekina ae kangai te Baibara ni kaineti ma te mangauti: “Ao te mate ma Eriti a anga maate ake i nanoia.” (Te Kaotioti 20:13, 14) Kakeaani kaaini “moone” e nanonaki iai manga kaokan te maiu nakoia ake e motikiia te Atua bwa a tau ni karekea te mangauti. (Ioane 5:28, 29; Mwakuri 24:15) Ai bon tamaroara te kantaninga aio ibukin taai aika a na roko, ae noraia raora aika tangiraki iroura ake a tia ni mate bwa a na manga kautaki man ruaia ni mate! E na boni karaoa aei Iehova ae te Atua ae akea tokin ana tangira.