Te Ota Raoi N Ana Mwakuri Iesu Ae Okoro N Ana Kantaninga Te Atua

“Boni Ngai te kawai, ao te koaua, ao te maiu: akea ane nako n te Tama, ba ti i Rou.”​—IOANE 14:6.

1, 2. E aera ngkai e riai ni kakawaki iroura neneran ana mwakuri Iesu ae okoro n ana kantaninga te Atua?

I NANON ririki aika bati, ao a mwaiti ake a a tia ni kakorakoraia ni kaokoroia ma aomata ake irarikia ma tii tabeman ake a tokanikai iai. A a tia naba tabeman n tau n taekinna bwa a boni kaokoro n aaro aika kakawaki. Ma e bon okoro n aaro aika bati Iesu Kristo, ae Natin te Atua.

² E aera ngkai e riai ni kakawaki iroura ana mwakuri Iesu ae okoro? Ibukina bwa e irekereke iai ara itoman ma Tamara are i karawa, ae Iehova! E taku Iesu: “Boni Ngai te kawai, ao te koaua, ao te maiu: akea ane nako n te Tama, ba ti i Rou.” (Ioane 14:6; 17:3) Ti na neneri ngkai aaro tabeua ake e okoro iai Iesu. Ni karaoan aei, e na rikirake iai otara raoi n ana mwakuri n ana kantaninga te Atua.

“Natina ae te Rikitemanna”

3, 4. (a) E aera ngkai ti kona n taekinna bwa e okoro ana mwakuri Iesu ngkai bon te Nati ae te rikitemanna ngaia? (b) E kanga n okoro ana mwakuri ni karikibwai Iesu?

³ E ngae ngke Iesu bon temanna naba mai buokoia ‘natin te Atua‘ ma e bon rangi n okoro. Anne are e taekinna Tatan ibukin Iesu ngke e kariria. (Mataio 4:3, 6) E bon tau n atongaki Iesu bwa “Natin te Atua ae te rikitemanna.” (Ioane 3:16, 18) E a tia te taetae ni Kuriiti ae rairaki bwa “riki-temanna” ni kabwarabwaraaki bwa “okoro n tii ngaia.” Iai natin Iehova anera aika mwaane aika bubua ma bubua te mirion mwaitiia. N te aro raa ngkanne ae e a riki iai Iesu n “okoro n tii ngaia”?

⁴ E okoro Iesu kioina ngkai boni ngaia ana moan Nati ae karikaki iroun Tamana n tii ngaia. Ni koauana, boni ngaia “te moa ni bung i buakoni baika karikaki ni bane.” (I-Korote 1:15) Boni “Moaia aika karikaki iroun te Atua.” (Te Kaotioti 3:14) E okoro naba ana mwakuri ni karikibwai te Nati ae te rikitemanna aei. Tiaki ngaia te tia Karikiriki, ke Teuare e moani kariki bwaai, ma e kabongana Iehova bwa ana tia mwakuri, ke e nanonaki iai bwa rinanona ao a a riki bwaai ni kabane ake nikirana. (Wareka Ioane 1:3.) E korea ae kangai te abotoro Bauro: “Ti temanna te Atua i roura, ae te Tama, ae a bane n riki bwaai mai Rouna, ao ana bwai naba ngaira; ao ti temanna te Uea are Iesu Kristo, are a bane n riki bwaai i Rouna, ao ngaira naba i Rouna.”​—1 I-Korinto 8:6.

5. A kanga ni kamatataaki n te Baibara aaro tabeua ake e okoro iai Iesu?

⁵ Ma a bati riki baika a irekereke ma okoron Iesu. E anganaki nakoa ke aara aika bati n te Baibara ake a kamataataa okoron ana mwakuri n ana kantaninga te Atua. Ti na neneri ngkai nimaua riki mai buakoni baikai, ake a kaineti ma Iesu aika n te Koroboki ni Kristian ae Tabu n te Taetae ni Kuriiti.a

“Te Taeka”

6. E aera ngkai e tau n aranaki Iesu bwa “te Taeka”?

⁶ Wareka Ioane 1:14, BK. E aera ngkai e aranaki Iesu bwa “te Taeka” ke te Rokou? E kaotaki n te nakoa aei te mwakuri are e a tia ni karaoia ni moa mani karikani baika wanawana. E kabongana Natina Iehova bwa e na karorokoi ana rongorongo ma ana kaetieti nakoia natina ake tabeman riki aika anera, n aron naba are e a tia ni kabongana Natina te Atua bwa e na karokoa Ana rongorongo nakoia aomata i aon te aba. E kaotiotaki te koaua ae Iesu bon te Taeka, ke Ana tia Taetae te Atua, n ana taeka Kristo nakoia I-Iutaia ake a ongora irouna ngke e kangai: “Tiaki au bwai au reirei, ma bon ana reirei Teuare kanakomaiai. Ngkana e kan toua mwin ana taeka Teuarei te aomata, ao e na ata te reirei, ba tao mairoun te Atua, ke tao I taetae mai Rou.” (Ioane 7:16, 17) E teimatoa Iesu ni kakororaoa nakoana ae “Ana Taeka te Atua” ni karokoa ao imwin okina nako karawa ike e a neboaki iai.​—Te Kaotioti 19:11, 13 (BK), 16.

7. Ti na kanga ni kakairi n te nanorinano are e kaotia Iesu n ana mwakuri ae “te Taeka”?

⁷ Iangoia moa bwa tera ae irekereke ma te nakoa aei. E ngae ngke te kabanea ni wanawana Iesu mai buakon ana karikibwai ni kabane Iehova, ma e bon aki onimakina oin wanawanana. E taekina are e tuangnga Tamana. E kairi aia iango aomata n taai nako nakon Iehova ao tiaki nakoina. (Ioane 12:50) Ai tamaroara te katoto aei ibukira bwa ti na kakairi iai! Ti a tia naba ngaira ni mwiokoaki n te mwakuri ae rine bwa ti na “uarongorongoi baika raraoi!” (I-Rom 10:15) Ti riai ni kaungaaki n otara n ana katoto Iesu ae raoiroi ni kaineti ma te nanorinano bwa ti na rarawa n taekin oin nanora. Ngkana ti uouota te rongorongo ni kakamaiu ae n te Baibara, ti aki kan “ri aoni baike a koreaki.”​—1 I-Korinto 4:6.

“Te Amene”

8, 9. (a) Tera nanon te taeka ae “amene” ao e aera ngkai e aranaki Iesu bwa “te Amene”? (b) E kanga Iesu ni kakoroa nanon ana mwakuri ae “te Amene”?

⁸ Wareka Te Kaotioti 3:14. E aera ngkai e aranaki Iesu bwa “te Amene”? Te taeka ae rairaki bwa “amene” bon rairan te taetae n Ebera ae nanona “e na karaoaki n aron anne,” ke “e koaua raoi anne.” Te taetae n Ebera ae nako mai iai te taeka aei, e nanonaki iai “kakaonimaki” ke “onimakinaki.” E kamanenaaki naba te taeka aei ni kabwarabwaraani kakaonimakin Iehova. (Te Tua-Kaua 7:9; Itaia 49:7) Mangaia are n te aro raa ngkanne ae e okoro iai Iesu ngke e aranaki bwa “te Amene”? Nora kaekaana n 2 I-Korinto 1:19, 20 ae kangai: “Natin te Atua, are Iesu Kristo, are tataekinaki nako imi . . . , E aki nanououa i marenan te Eng, ao te Tiaki, ma bon ti te Eng i Rouna. Ba ngkai a boni bati ana taeka n akoi te Atua, ao bon i nanon Iesu te Eng are a bane ni kakoauaki iai; ao i Rouna naba te Amene are E a neboaki te Atua iai i roura.”

⁹ Iesu bon “te Amene” n ana berita te Atua ni kabane. E kamatoaaki ao n reke angani kakoroani bukin ana berita ni bane Iehova ae te Atua, mani maiun Iesu ae kororaoi i aon te aba, n ikotaki naba ma matena bwa te karea ni kaboomwi. Ibukin teimatoan Iesu ni kakaonimaki, e a oti naba iai kewen ana bukibuki Tatan are koreaki n te boki ae Iobi, are a na bon rarawa nakon te Atua ana toro man aki tauni marikeia, karawawataaia ao kataakia. (Iobi 1:6-​12; 2:2-7) Mai buakon ana karikibwai ni kabane te Atua, e kona te moan Nati n anga te kaeka nakon te bukibuki anne ae aki kona ni kakeweaki. Irarikina, e katauraoa te bwai ni kakoaua ae te kabanea n tamaroa Iesu ibukini boutokaan ana itera Tamana, n te bukibuki ae matoatoa ni kaineti ma riaini mwaakana Iehova n tautaeka i aoni bwaai ni kabane.

10. Ti na kanga ni kona ni kakairi iroun Iesu n ana mwakuri ae okoro ae “te Amene”?

¹⁰ Ti na kanga ni kona ni kakairi iroun Iesu n ana mwakuri ae okoro ngkai “te Amene” ngaia? Boni ngkana ti teimatoa ni kakaonimaki nakon Iehova ao ni boutokaa riaini mwaakana n tautaeka i aoni bwaai ni kabane. Ni karaoan aei, ti na boni kukurei iai ni kaekaa te bubutii ae koreaki n Taeka N Rabakau 27:11 ae kangai: “Natiu, ko na wanawana, ao kakukureia nanou, Ba I aonga ni kaeka ane kakanikoai.”

“Te Tia Raoi n te Berita Nabangkai”

11, 12. E kanga n okoro ana mwakuri Iesu ae te tia Raoi?

¹¹ Wareka 1 Timoteo 2:5, 6. “Ti temanna te tia raoi i marenan te Atua ma aomata,” bwa Iesu. Boni ngaia “te tia raoi n te berita nabangkai.” (Ebera 9:15; 12:24) E taekinaki naba ngkoa Mote bwa te tia raoi n te berita n Tua. (I-Karatia 3:19) E na kanga n okoro ana mwakuri Iesu ae te tia Raoi?

¹² Te moan taetae ae rairaki bwa “te tia raoi” bon te taetae ae riai i aan te tua. E nanonaki iai bwa Iesu bon te tia Raoi ae riai i aan te tua (ke tao ai aron te rooia) n te berita nabangkai are e a karekea angan rikin te natannaomata ae boou, ae “ana Iteraera te Atua.” (I-Karatia 6:16) E kaainaki te natannaomata ae boou aei irouia Kristian aika kabiraki, ake a na riki bwa “ibonga n uea” i karawa. (1 Betero 2:9; Te Otinako 19:6) E aki kona ni karekea te natannaomata ae aekan anne te Tua ni berita rinanoni Mote, ngke e riki bwa te tia raoi.

13. Tera ae irekereke ma ana mwakuri Iesu ae te tia Raoi?

¹³ Tera ae irekereke ma ana mwakuri Iesu ae te tia Raoi? Ni koauana, e kamanena kakawakin raraan Iesu Iehova nakoia te koraki ake a karinaki n te berita nabangkai. N te aro aei, a a karaoiroaki iai iroun Iehova n aki kabooaki i aan te tua. (I-Rom 3:24; Ebera 9:15) E kona te Atua ni karinia n te berita nabangkai ma kantaningaan are a na riki bwa uea ma ibonga i karawa! Ngkai Iesu aia tia Raoi, e a buokiia ngkanne bwa a na teimatoa n itiaki i matan te Atua.​—Ebera 2:16.

14. Bukin tera bwa a riai Kristian ni kabane ni kakorakoraa karinean ana mwakuri Iesu ae te tia Raoi, n aki ongeia bwa tera ae a kantaningaia?

¹⁴ Tera aroia te koraki ake tiaki kaain te berita nabangkai, ae te koraki ake a kantaningaa te maiu n aki toki i aon te aba ao tiaki i karawa? E ngae ngke tiaki ngaiia kaain te berita nabangkai ma a boni kakabwaiaaki naba mai iai. E reke kabwaraan aia bure ao a taekinaki bwa a raoiroi ngkai a a riki bwa raoraon te Atua. (Iakobo 2:23; 1 Ioane 2:1, 2) Ngkana tao ti kantaningaa te nako karawa ke te maiu i aon te aba, ma bon iai bukina ae ti riai ngaira ni kabane ni kakorakoraa karinean ana mwakuri Iesu ae te tia Raoi n te berita nabangkai.

“Te Ibonga ae Rietata”

15. E kanga n okoro ana mwakuri Iesu ae te Ibonga ae Rietata ma mwaane ni kabane ake a a tia naba ni beku bwa ibonga aika rietata?

¹⁵ A mwaiti mwaane ake a a tia ni beku bwa ibonga aika rietata rimoa, ma e ngae n anne e bon rangi n okoro ana mwakuri Iesu ae te Ibonga ae Rietata. N te aro raa? E kabwarabwaraa Bauro ni kangai: “E aki riai i Rouna ba E na anga karea n te bong ae koraki, n ai aroia mataniwiia ibonga akekei, n anga moa i bukin oin ana bure, ao rimwi i bukin aia bure aomata: ba ti teuana karaoan aei i Rouna, ngke E anga Ngaia. Ba te Tua e karaoiia aomata aika mamara ba mataniwiia ibonga; ma te taeka are te taeka n tuea are i mwin te Tua, e rinea te Nati ba te ibonga ae koro raoi n aki toki.”​—Ebera 7:27, 28.b

16. E aera ngkai e bon okoro raoi ana anga karea Iesu?

¹⁶ Bon te aomata ae kororaoi Iesu ae titeboo raoi ma Atam imwaini burena. (1 I-Korinto 15:45) Ibukin anne, bon tii Iesu te aomata ae tau n anga te karea ae kororaoi, ae te aeka n anga karea ae aki riai n okioki ni karaoaki. E anganga karea ngkoa te aba ni katoa bong i aan te Tua Rinanon Mote. Aeka ni karea aikai ni kabane ao mwakuri n ibonga bon tii bannan baika e na kakororaoi Iesu. (Ebera 8:5; 10:1) Ngaia are ibukina bwa e kona ni kakororaoi baika bati riki Iesu nakoia ibonga aika rietata akekei ao ni beku n aki toki n ana mwakuri aei, e a bon okoro iai ngkanne ana mwakuri ae te Ibonga ae Rietata.

17. E aera ngkai ti riai n ota raoi n ana mwakuri Iesu ae ara Ibonga ae Rietata, ao ti na kanga ni kona ni karaoa anne?

¹⁷ Ti kainnanoi ana mwakuri Iesu ngkai te Ibonga ae Rietata ngaia bwa ti na buokaki iai n tei i matan te Atua n aroia aomata aika raoiroi. Ai raoiroira ara Ibonga ae Rietata aei! E korea ae kangai Bauro: “Ara ibonga ae te mataniwi bon tiaki ae aki kona te nanoangaira i bukini mamarara, ma bon ae kaririaki ni bwaai ni kabane n ai arora, ma E aki bure.” (Ebera 4:15) Ni koauana, e riai otara raoi i aon te koaua aei ni kairira bwa ti na ‘aki manga kabane maiura ibukira, ma ti na kabane maiura ibukin Teuare mate ibukira.’​—2 I-Korinto 5:14, 15; Ruka 9:23.

Te “Kariki” Are Taetae ni Burabetinaki

18. Tera te taetae ni burabeti are e taekinaki imwini buren Atam, ao tera ae kaotaki nakoia aomata rimwi riki ibukin te taetae ni burabeti aei?

¹⁸ E taetae ni burabetina te tia Kamaiuia aomata Iehova ae te Atua i Eten ngkoa. E karaoa aei ngke a a taraa ni bua bwaai ni kabane mairouia botannaomata n aron te tei n itiaki i matan te Atua, te maiu n aki toki, te kukurei ao te Bwaretaiti. E aranaki te aomata aei bwa te “kariki.” (Karikani Bwaai 3:15) E riki te Kariki ae aki kaotaki arana aei bwa te boto n iango n taetae ni burabeti aika rangi ni mwaiti n te Baibara i nanon ririki aika bati. E riai n roko mani kanoan Aberaam, Itaaka ao Iakoba. E riai naba n roko man ana utu te Uea ae Tawita.​—Karikani Bwaai 21:12; 22:16-​18; 28:14; 2 Tamuera 7:12-​16.

19, 20. (a) Antai te Kariki ae beritanaki? (b) E aera ngkai e kona n taekinaki bwa tiaki tii Iesu te kariki ae beritanaki?

¹⁹ Antai te Kariki ae beritanaki aei? E kona n noraki kaekaan te titiraki aei n I-Karatia 3:16. (Warekia.) Ma rimwi riki ni bon te mwakoro naba aei, e reitia nako te abotoro Bauro ni kangai nakoia Kristian aika kabiraki: “Ma ngkana ana bwai Kristo ngkami, ao ana kariki naba Aberaam ngkami, ao taan ababa n ai aron te taeka n akoi.” (I-Karatia 3:29) E kanga n riki ae Kristo bon te Kariki ae beritanaki, ao manga iai tabeman riki aika karinaki irarikina?

²⁰ A taku aomata aika mirion ma mirion mwaitiia bwa a nako man te kanoa ae Aberaam, ao a a tia naba tabeman ni karaoi aia mwakuri burabeti. Bon te bwai ae rangi ni kakawaki irouia Aaro tabeua aia taeka are a roko aia burabeti man te kanoa ae Aberaam. Ma te koaua bwa aomata aikai ni kabane boni kaain te Kariki ae beritanaki? A aki. N aron ae e katerea raoi te abotoro Bauro i aani kairana iroun taamnein te Atua, a aki kona n taekinna kanoan Aberaam ni kabane bwa ngaiia te Kariki ae beritanaki. A bon aki karikaki kanoan natin Aberaam ake tabeman riki ibukini kakabwaiaan te botannaomata. Te kariki are e kakabwaiaa te aba bon tii are rinanon Itaaka. (Ebera 11:18) Ao n tokina, bon tii temanna te aomata ae Iesu Kristo ae kanoan Aberaam ae koreaki rongorongona n te Baibara, ae moani uaan te kariki ae beritanaki anne.c Ake nikirana, a bane n riki imwina riki bwa kauouan uaan ana kariki Aberaam ibukina bwa “ana bwai Kristo” ngaiia. Eng e bon rangi n okoro ana mwakuri Iesu ni kaineti ma kakoroani bukin te taetae ni burabeti aei.

21. Tera ae anaaki iai nanom man aron Iesu n tia ni kakoroa bukin ana mwakuri ae okoro n ana kantaninga Iehova?

²¹ Tera reireiara man te kauring ae kimototo aei, i aon ana mwakuri Iesu ae okoro n ana kantaninga Iehova? Mani moani karikana ni karokoa ngkai, e a tia n rangi n okoro n tii ngaia Natin te Atua ae ana rikitemanna. Ma Natin te Atua ae okoro are riki bwa Iesu, e a tia n nananorinano ni kakaraoa ae boraoi ma nanon Tamana, n akea te tai ae e ukoukora iai kamoamoaana. (Ioane 5:41; 8:50) Ai rianakora te katoto aei ibukira ni boong aikai! N aron Iesu, ti bia katea naba tiara ae ti na “karaoi bwaai ni kabane i bukin neboakin te Atua.”​—1 I-Korinto 10:31.

[Footnotes]

Ko Uringnga?

• Tera reireiam ibukin nakoa ao aara ni kaineti ma ana mwakuri Iesu ae okoro? (Nora te bwaoki.)

• Ko na kanga ni kakairi n ana katoto Natin Iehova ae okoro?

[Bwaoki/​Taamnei n iteraniba 24]

Nakoa Tabeua Aika Kaotiota Okoron Ana Mwakuri Iesu n Ana Kantaninga te Atua

◼ Natina ae te Rikitemanna. (Ioane 1:3) E karikaki Iesu tii iroun Tamana.

◼ Te Taeka. (Ioane 1:14) E kamanena Natina Iehova bwa ana tia Taetae are e na karorokoi ana rongorongo ao ana kaetieti irouia ana karikibwai nako.

◼ Te Amene. (Te Kaotioti 3:14) E kamatoaaki ao n reke angani kakoroani bukin ana berita Iehova ae te Atua mani maiun Iesu ae kororaoi i aon te aba, n ikotaki naba ma matena bwa te karea ni kaboomwi.

◼ Te Tia Raoi n te Berita Nabangkai. (1 Timoteo 2:5, 6) Ngkai te tia Raoi Iesu ae riai i aan te tua, e a karekea iai angan rikin te natannaomata ae boou ae “ana Iteraera te Atua,” ae kaainaki irouia Kristian ake a na riki bwa “ibonga n uea” i karawa.​—I-Karatia 6:16; 1 Betero 2:9.

◼ Te Ibonga ae Rietata. (Ebera 7:27, 28) Bon tii Iesu te aomata ae tau n anga te karea ae kororaoi, ae aki riai n okioki ni karaoaki. E kona ni kaitiakira man te bure ao ni kainaomataira man mwina ae te mate.

◼ Te Kariki ae Beritanaki. (Karikani Bwaai 3:15) Tii temanna te aomata ae Iesu Kristo ae moan uaan te kariki ae beritanaki. Ake nikirana, a bane n riki imwina bwa kauouan uaan ana kariki Aberaam ibukina bwa “ana bwai Kristo” ngaiia.​—I-Karatia 3:29.