“Bon Tiaki Au Tai ni Mate Aei”
E bwakee nako ana bwe te turaiua n te kaa ni maange ae rangi ni buburakaei. E buti te kaa aei n ri tinanikun te kawai ao n okinakoia te taangana ao te mwaane ae 23 ana ririki ni maiu. Ni kaineti ma ae taekinaki n te nuutibeeba teuana mai New York City, a mate te taanga arei n te tai naba arei ao te teinimwaane arei e ntongitong ao n aki namakinaaba. Ngke e uti teuaei ao n ataa te bwai ae riki ao aei ana moan iango: ‘I aki kona ni kakoauaa bwa e riki aei. Taiaoka te Atua, ma buokai ni kakorakoraai.’ E taku: “Bon tiaki au tai ni mate aei.”
KO A boni bae n tia n ongo karaki aika aron aikai. Ngkana iai ae kuri ni mate man te kabuanibwai ao a kangai aomata, ‘Bon tiaki ana tai,’ ma ngkana e mate n te kabuanibwai ae karina n riki ao a iango ni kangai, ‘E a bon roko ana tai’ ke ‘Bon ana babaire te Atua.’ E ngae ngkana a taku bwa e riki aei ibukina bwa a a kamani baireaki baika a na riki n te mwaaka teuana, ke tao bon tekeraoia, ke boni katauaia mairoun te Atua anne ma bon titeboo aia iango ni kabane. A bati aika a kakoauaa bwa a a kamani baireaki baika a na riki ni maiuia ao mwiia n te aro are akea te bwai ae a kona ni karaoia iai. Ao te aeka n namakin aei e aki kaonotaki tii nakon te mate ao kabuanibwai aika karina n riki. E aki naba kaonotaki tii nakoni boong aikai.
N te katoto, a kakoauaa I-Baburon rimoa bwa a kairiraki aia waaki aomata n taian itoi ao butiia. Mangaia are, a tarataraa karawa ibukini kanikina ao banna aika aongkoa a kaotii baika a tuai n riki ibukini kairiraia. A taromaurii Atua aika aine I-Kuriiti ao I-Rom rimoa ake a a kamani bairei bwaai ni kabane ni mwaakaia ni katekeraoia ke ni katekebuakaia aomata. Ao n taai tabetai mwaakaia Atua aika aine aikai e taonaanako nanoia Atuaia aika kakannato riki aika Zeus ao Jupiter.
N te aono n Atia, a kakoauaa taian Hindu ao Buddhist bwa baika a rinanoi ni maiuia ae ngkai a riki imwin maiuia are ngkoa, ao aia mwakuri ni maiuia ae ngkai a na baireaki iai baika a na riki nakoia n te maiu ae e na roko naba. A boni butimwaei naba koaua ake a aki kona ni bitii baika a na riki Aaro tabeua n ikotaki ma Aaro ake aongkoa Kristian ngaiia aika bati, ibukin aia reirei ae a a kamani baireaki bwaai ake a na karaoi aomata.
Ti na aki mimi ngkanne bwa a teimatoa aomata aika bati ni kakoauaa bwa aroia ni maiu, mwin aia mwakuri ni katoa bong ao tokini maiuia, a a tia ni baireaki n te mwaaka ae bairei baika a na riki. Ao a iangoia bwa akea te bwai teuana ae a kona ni karaoia bwa e na bitaki iai, e ngae ngke a maeka n taai aika rikirake iai rabakauia aomata ni kaineti ma baika riiriki. Anne naba am namakin ni kaineti ma te maiu? E koaua bwa a a tia ni kamani baireaki bwaai ni kabane aika riiriki n te maiu aei, tokanikaia ao konaakia aomata, n ikotaki naba ma te bung ao te mate? E koaua bwa e tautaekanaki maium n te mwaaka ae kamani bairei baika a na riki nakoim? Ti na nora aron te Baibara ni buokira ni kaekai titiraki aikai.
[Picture Credit Line n iteraniba 3]
Ken Murray/New York Daily News