A Na Kamoamoaa Te Atua N Aki Toki Akana Raoiroi

“E na ururingaki n aki toki te aomata ae raoiroi. E tei matoa ana raoiroi n aki toki.”​—TAIAN ARERU 112:6, 9.

1. (a) Baikara kanoan taai aika a na roko aika kakukurei ake a kantaningai aomata ni kabane ake a taraaki iroun te Atua bwa a raoiroi? (b) Tera te titiraki ae tabekaki?

AI TAMAROARA kanoan taai aika a na roko ake a kantaningaia aomata ni kabane aika taraaki iroun te Atua bwa a raoiroi! A na boni kimwareirei n aki toki n reiakina ae bati riki ibukin aroaron Iehova aika tamaroa. E na taonako mai nanoia kamoamoaan te Atua ngkai a a reiakina ae bati riki ni kaineti ma baike e a tia ni kariki. Teuana mai buakoni baika moani kakawaki ae riai n reke iroura bwa ti aonga n nori taai aika a na roko aika kamimi, bon te “raoiroi” are e katuruturuaki n Taian Areru 112. Ma e na kanga te Atua ae Iehova ae tabu ao n raoiroi ni kona n taraia aomata aika bubure bwa a raoiroi? E ngae ngke ti kakorakoraira ni kakaraoa ae eti, ma ti boni kakairua naba ao n tabetai a a rangi ni kakaiaki ara bure.​—I-Rom 3:23; Iakobo 3:2.

2. Baikara kakai aika uoua ake e karaoi Iehova ibukin tangirara irouna?

² E tatangira Iehova bwa e a tia ni katauraoa te anga teuana ae kororaoi are e na kona iai n taraia aomata aika bubure bwa a raoiroi. E kanga ni karaoa anne? Te moan, bon rinanon te kakai are e a kamwainga iai maiun Natina ae moan te tangiraki irouna are i karawa nakoni biroton te teinnaine bwa e aonga ni kona ni bungiaki bwa te aomata ae kororaoi. (Ruka 1:30-​35) Ao imwin tiringan Iesu irouia ana kairiribai, e a manga karaoa te kakai riki teuana ae rianako Iehova ike e a kauta iai Iesu nakoni maiuna n taamnei ae mimitong.​—1 Betero 3:18.

3. Bukin tera bwa e kukurei te Atua n angan Natina kaniwangana ae te maiu i karawa?

³ E anganaki kaniwangana Iesu iroun Iehova ae te bwai are akea ngkoa iroun Natina imwain rikina bwa te aomata, ae te maiu ae aki mamate i karawa. (Ebera 7:15-​17, 28) E kukurei ni karaoa aei Iehova ibukina bwa e a tia n teimatoa ni kakaonimaki n te aro ae eti Iesu i aani kataaki aika kakaiaki. Ai ngaia are e a anga iai te kaeka ae tabwanin raoi ae te kabanea n tamaroa Iesu nakon Tamana. Bon aei kaekaan ana kewe Tatan are e taku bwa a toro aomata iroun te Atua tii ibukini kani kakabwaiaaia, ao tiaki ibukin aia tangira ae aki kona ni mauna.​—Taeka N Rabakau 27:11.

4. (a) Tera are e karaoia Iesu ibukira ngke e okira karawa ao tera aron Iehova iai? (b) Tera aron rotakim ibukini bwaai aika a a tia ni karaoia ibukim Iehova ao Iesu?

⁴ E bati riki are e karaoia Iesu i karawa. E ‘kaoti i matan te Atua ibukira’ ma manenan “oin raraana.” E kukurei Tamara ae tatangira are i karawa ni butimwaea ana karea Iesu ae manena ae “te kareanraoi ni kabara ara bure.” Ngaia are ngkai a a ‘itiaki mataniwin nanora,’ ti a kona ngkanne n “toro iroun te Atua ae maiu.” Ibukin aei, ti a riai ngkanne ni kakairi n taeka aika ni moan Taian Areru 112 aikai, “Kam na kamoamoa [Iah] Iehova”!​—Ebera 9:12-​14, 24; 1 Ioane 2:2.

5. (a) Tera ae ti riai ni karaoia ngkana ti kani kateimatoa taraakira ae raoiroi i matan te Atua? (b) A kanga ni baireaki raoi korean Taian Areru 111 ao Taian Areru 112?

⁵ Ngkana ti kani kateimatoa taraakira iroun te Atua bwa ti raoiroi, ti riai n teimatoa n onimakina raraan Iesu are e a tia ni kawawaeaki. Bon akea te bong teuana ae ti na aki kaitaua iai Iehova ibukin ana tangira ae korakora ibukira. (Ioane 3:16) Ti riai naba n teimatoa n ukeuke n reirei n Ana Taeka te Atua ao ni kaboraoi maiura ma te rongorongo ae i nanona n aron ara kabanea n raoiroi. Iai n Taian Areru 112 reirei aika manena ibukia aomata ni kabane ake a kani kateimatoai itiakin mataniwin nanoia i matan te Atua. E toma raoi te areru aei ma Taian Areru 111. A kaai ni moanaki areru aika uoua aikai n te New World Translation of the Holy Scriptures ma te taeka aei: “Kam na kamoamoa Iehova” ke “Areruia,” ao a taorimwiaki taeka aikai n rain aika 22 mwaitiia ake a bane ni moanaki ma teuana manin te taetae n Ebera aika karinanaki raoi n aron teini manin te taetae anne.a

Aan te Kakukurei

6. E kanga ni kakabwaiaaki “te aomata” are maaka te Atua ae kabwarabwaraaki n Taian Areru 112?

⁶ “E a kabaia te aomata ae maaka Iehova, Ae bati n tangiri ana tua. A na korakora ana kariki i aonaba: E na kabaia aia roro akana a eti aroia.” (Taian Areru 112:1, 2) Noria bwa ni moan te areru aei ao e taekina “te aomata” ae tii temanna te tia areru ao imwina e a manga bitia nakon ae mwaiti ngke e kangai ni kabaneani kibuna 2 “akana a eti aroia.” E kaotaki iai bwa e kona n nanonaki n Taian Areru 112 te kurubu ae mwaiti kaaina. Ibukini boutokaan te iango aei, e a kairaki te abotoro Bauro rinanon te taamnei bwa e na taekina Taian Areru 112:9 ni kaineti ma Kristian n te moan tienture. (Wareka 2 I-Korinto 9:8, 9.) E bon rangi ni mataata n te areru aei aroia taan rimwini Kristo aika i aon te aba ni boong aikai ni kona ni karekea kukureia!

7. E aera ngkai a riai ana toro te Atua ni maakua ma te nano ni karinerine, ao tera am namakin ibukin ana kaetieti te Atua?

⁷ N aron ae taekinaki n Taian Areru 112:1 a namakina te kukurei ae korakora Kristian ni koaua kioina ngkai a nakonako ma ‘maakan Iehova.’ A buokaki bwa a na rarawa nakon nanon ana aonnaba Tatan ngkai iai irouia te maaku ma te nano ni karinerine are a aikoa kani kananokawaka iai te Atua. A “bati n tangiri” Ana Taeka te Atua n ukeuke n reirei i nanona ao n ongeaba nakon ana tua nako. E nanonaki naba n anne te kaetieti ibukin tataekinan te rongorongo ae raoiroi ibukin te Tautaeka n Uea ni kabutaa aon te aba. A kekeiaki ni karekeia taan rimwini Kristo mai buakoia natannaomata ni kabane ni kauringaaia aomata aika buakaka rokon ana bong ni motikitaeka te Atua.​—Etekiera 3:17, 18; Mataio 28:19, 20.

8. (a) A kanga n tia n anganaki kaniwangaia ibukin ingaingan nanoia ana aomata te Atua aika kakaonimaki ni boong aikai? (b) Baikara kakabwaia nakon taai aika a na roko aika kariariai te koraki ake a kantaningaa te maiu i aon te aba?

⁸ Ibukin ongeabaia ana toro te Atua nakoni kaetieti akanne, ai itua ngkai tabun te mirion mwaitiia i aon te aba ni boong aikai. Antai ae kona ni kakewea ae a a tia n riki ni ‘korakora i aonnaba’ ana aomata te Atua? (Ioane 10:16; Te Kaotioti 7:9, 14) Ao ai batira ‘kakabwaiaaia’ ngkana e a waakina kakoroani bukin ana kantaninga te Atua! A na kamaiuaki ana aomata Iehova n ana botaki ake a kantaningaa te maiu i aon te aba n rokon te “rawawata ae korakora” ao a nang riki bwa kaain te “aonaba nabangkai, ake e mena iai te raoiroi.” Imwin tabeua te tai, ao a “na kabaia” n te aro ae raka riki te koraki ake a kamaiuaki man Aremaketon. A nang tauraoi ni kamauriia mirion ma mirion aomata ake a na kautaki. Ai kakukureira te kantaninga aei! N tokina, a nang rikirake ni kororaoi te koraki ake a “bati n tangiri” ana kaetieti te Atua ao ni karekea “te kainaomataki are ana bwai neboakiia natin te Atua” n aki toki.​—2 Betero 3:13; I-Rom 8:21.

Kamanenaan te Kaubwai ma te Wanawana

9, 10. A kanga Kristian ni koaua ni kamanenai kaubwaia n taamnei, ao e na kanga n teimatoa n aki toki raoiroia?

⁹ “E mena te kaumane ma te kaubwai i nanon ana auti: Ao e tei matoa ana raoiroi n aki toki. E oti te oota i buakon te ro nakoia akana a eti aroia: E atataiaomata, ao e bati n nanoanga, ao e raoiroi.” (Taian Areru 112:3, 4) N taai ake e koreaki iai te Baibara, ao a rangi ni kinaaki ana toro te Atua tabeman ibukini kaubwaia ni bwain te aonnaba. Ao n te aro riki teuana, a noraki te koraki ake e tangiriia ni koaua te Atua bwa a rikirake ni kaubwai, e ngae naba ngkana tiaki ni bwain te aonnaba. Ni koauana, angia te koraki ake a motinnanoia bwa a na nanorinano i matan te Atua tao a maiu ni kainnano ao n riribaaki n aron naba are e noraki n ana bong Iesu. (Ruka 4:18; 7:22; Ioane 7:49) Ma ngkana tao a bati ke a karako ana bwai ni bwain te aonnaba te aomata, ma e boni kona ni kaubwai naba n te aro n taamnei ngkana e reke irouna te wanawana are mairoun te Atua ao te atatai ibukina.​—Mataio 6:20; 1 Timoteo 6:18, 19; wareka Iakobo 2:5.

¹⁰ A aki taui kaubwaia n te aro n taamnei i bon ibukia, Kristian aika kabiraki ao n ikotaki naba ma raoia. Ma a a tia n riki bwa kaanga “oota” n ana waaki Tatan ae rotongitong ae ‘te oota nakoia akana a eti aroia.’ A karaoa aei rinanoni buokaia aomata nako bwa a na karekei kakabwaiaaia mani kaubwai n taamnei aika kakawaki n aron te wanawana ao te atatai ibukin te Atua. A a tia taani kakaaitara ni kataia ni katoka uarongorongoan te Tautaeka n Uea ma a boni konaaki. Ao n oneani mwin anne e na ‘teimatoa n aki toki’ uaan te mwakuri ae raoiroi aei. Man aroia n nanomwaaka ni kakaraoa ae raoiroi i aan taiani kataaki, a kona iai n reke raun nanoia ana toro te Atua ngkai a nang maiu n aki toki ao n ‘teimatoa n aki toki.’

11, 12. Baikara aanga tabeua ake a a kamanenai iai oin aia bwai ana aomata te Atua?

¹¹ A a tia ni kakoauaaki bwa a tituaraoi n anganga aia bwai ana aomata te Atua, ae te koraki n toro ae kabiraki ao kaain te “koraki ae uanao.” E taekinaki ae kangai n Taian Areru 112:9: “E kamrara, e anganga bwaai n tituaraoi nakoia akana akea aia bwai.” Ni boong aikai ao a aki toki Kristian ni koaua n anga aia bwaintangira aika bwain te aonnaba nakoia raoia ni Kristian ao nakoia naba raoia aika a kainnanoi buokaia. A kamanenai naba kaubwaia ni boutokai iai waaki n ibuobuoki n taai ni kabuanibwai. N aron ae kaotia Iesu, bon anne naba nibwan te kakukurei.​—Wareka Mwakuri 20:35; 2 I-Korinto 9:7.

¹² Irarikin anne, iangoa te kabane mwane ibukini boreetian te maekatin aei n taetae aika 172, ake a a mwaiti mai iai aia taetae aomata aika rangi ni maiu ni kainnano. Iangoia naba bwa e rairaki te maekatin aei nakon taian taetae n te bai aika kakaokoro ake a kamanenaaki irouia bonotaninga. E rairaki naba nakon te koroboki ni Braille are a a kona iai mataki ni warekia.

Te Atataiaomata ao te Kaetitaeka ae Riai

13. Antai aika a katei banna ni katoto aika kabanea n tamaroa ibukin te angabwai ma te atataiaomata, ao ti na kanga ni kona ni kakairi n aia katoto?

¹³ “E a kabaia te aomata ae akoi ae anganga bwaai n tangoaki.” (Taian Areru 112:5) Tao ko a bae n tia n noria bwa aomata aika ibuobuoki nakoia tabeman, a bon aki atataiaomata n taai nako. A angabwai tabeman ibukini kani kaotan ae a bati riki aia bwai nakoia raoia ke a rawa n anga ma a anga tii ibukin te katei. Akea kakukurein te ibuobuoki mairoun te aomata ae karekea nakoim namakinan ae ko a rangi ni mangori, ko a rangi ni kabatiaa te kakumekume ke ko a riki bwa te bwai ni karawawata. Ma ni kaitaraan anne, e rangi ni kakukurei reken te ibuobuoki mairoun te aomata ae atataiaomata. Bon te banna ni katoto ae rianako Iehova ibukin te atataiaomata, ao bon te tia Anga ae kukukurei. (1 Timoteo 1:11; Iakobo 1:5, 17) E kororaoi aron Iesu Kristo ni kaotiota ana katoto Tamana ae atataiaomata. (Mareko 1:40-​42) Mangaia are ngkana ti kan taraaki iroun te Atua bwa ti raoiroi, ti angangabwai ma te kukurei ao te nano ae atataiaomata, ao e a moamoa riki n te mwakuri ni minita ngkana ti anga ngaira ibukini buokaia aomata bwa a na kinaa Iehova.

14. Baikara aanga tabeua ake ti a kona iai ni ‘kawakin ara bwai n te kaetitaeka ae riai’?

¹⁴ ‘E na kawakin ana bwai n te kaetitaeka ae riai.’ (Taian Areru 112:5) N aron ae e a kaman taekinaki, e tararuaaki ana bwai te Toka iroun te koraki n touati ae kakaonimaki ae wanawana n te aro ae boraoi ma ana kaetitaeka ae riai Iehova. (Wareka Ruka 12:42-​44.) E kaotiotaki aei n te kairiri man te Baibara are a anganaki unimwaane n te ekaretia, ake a riai n rinanoi buure aika kakaiaki n te ekaretia n taai tabetai. E noraki te aro ni kaetitaeka ae riai iroun te koraki n toro ibukin rinanoan aaro nako ao n te kairiri ibukin te mwakuri ae boto i aon te Baibara ake a katauraoaki ibukia ekaretia ni kabane, auti ibukia mitinare ao auti ni Betaera. E riai bwainan te kaetitaeka ae riai tiaki tii irouia unimwaane n te ekaretia ma irouia naba Kristian n aroaroia i marenaia ao n aroia naba nakoia aomata aika tiaki kaain te onimaki, n ikotaki naba ma aroia ni bitineti.​—Wareka Mika 6:8, 11.

Kakabwaia lbukia Aika Raoiroi

15, 16. (a) Tera aron rotakia aomata aika raoiroi n rongorongon te aonnaba ae buakaka? (b) Tera ae a motinnanoia ana toro te Atua bwa a na teimatoa ni kakaraoia?

¹⁵ “Ba e na bon aki mwemwe; E na ururingaki n aki toki te aomata ae raoiroi. E na aki maku n te rongorongo ae buakaka: E tei matoa nanona, ngkae e onimakina Iehova. E kamatoaki nanona, e na aki mamaku, Ni karokoa noran te bwai ae e tangiria ba aia bwai aiana.” (Taian Areru 112:6-8) Akea n rongorongon rimoa taekani baika bati aika bubuaka n aroni buaka, mwakuri n iowawa aika tiritiri, aoraki aika boou ao aoraki rimoa aika tabaokioki, te kakeru, te maiu ni kainnano ao baarekan te otabwanin ae urubwai. A aki kona ni birinako man rotaki buakaia n rongorongo aika bubuaka aikai te koraki ake a taraaki iroun te Atua bwa a raoiroi, ma a bon aki roko n te bwara nanoia ibukini maakuia. A “tei matoa” ao ni “kamatoaki” nanoia ngkai a kariariai taai aika a na roko ma te aki nanokokoraki, bwa a ataia ae e a kaan ana waaki te Atua ae boou ae raoiroi i aon te aba. Ngkana e riki te kabuanibwai, a a kona n nanomwaaka riki i aani baikai ibukina bwa a onimakina boutokaaia iroun Iehova. E na bon aki kariaia ana aomata aika raoiroi bwa a na “mwemwe” nako bwa e na buokiia ni kakorakoraia n nanomwaaka.​—I-Biribi 4:13.

¹⁶ A riai n nanomwaaka naba ana aomata te Atua aika raoiroi i aan ribaakia ao uaraoakia aika a kabutaki nako irouia taani kakaaitara. Bwa karaoani mwakuri aikai, e na bon aki kaini wiia Kristian ni koaua. Ma e ngae n anne, a na bon teimatoa n aki kaingingaki ana toro te Atua n te mwakuri are a a tia ni mwiokoaki iai iroun Iehova ae tataekinan rongorongon te Tautaeka n Uea. Ao karekeaia naba taan rimwini Kristo mai buakoia aomata ni kabane ake a kan ongora. Akea te nanououa bwa a na bae n aitara ma rikiraken te kakaaitara aomata aika raoiroi ngkai e a uakaan te toki. E na roko ni korakorana te riribai ngkana e a buakanaki Tatan te Riaboro ni katobibia te aonnaba n nakoana ae Koka mai Makoka. Ao ngkanne, ti nang ‘nora te bwai ae ti tangiria bwa aia bwai aiara’ ngkana a a konaaki ao ni kamaamaeaki. Ai kakamatakura ngkana ti nang nora katabuan aran te Atua ae Iehova n te aro ae tabwanin raoi!​—Etekiera 38:18, 22, 23.

‘E na Karietataaki ma ni Karineaki’

17. E na kanga ni ‘karietataaki ma ni karineaki’ ane e raoiroi?

¹⁷ Ai kakukureira ngkana ti a katiteuanaaki ni kamoamoaa Iehova n akea te kakaaitara mairoun te Riaboro ma ana koraki! A na bane aomata ake a kateimatoai taraiia ae raoiroi i matan te Atua ni kukurei ni kamoamoaa Iehova n aki toki. A na bon aki kamaamaeaki ao ni konaaki bwa e berita Iehova bwa e na ‘karietataaki ma ni karineaki’ ‘koron’ ane raoiroi irouna. (Taian Areru 112:9) E na kakatonga ane raoiroi i matan Iehova ibukin te tokanikai ngkana e a noriia te koraki ake a karitei nakoni mwaakan Iehova n tautaeka bwa a bane ni bwaka.

18. E na kanga ni kakoroaki bukin taeka ake ni kabanean Taian Areru 112?

¹⁸ “E na noria ane buakaka, ao e na nanomaraki; E na kangengei wina, ao e na neinei ni mauna: E na mauna te bae tangiraki irouia akana buakaka.” (Taian Areru 112:10) A na waekoa n riki n ‘neinei ao ni mauna nako’ aomata ni kabane aika teimatoa ni kaaitaraia ana aomata te Atua ibukin aia bakantang ao aia riribai. A na maunanako ma nanoia ni kan nora tokin ara mwakuri n rokon ‘te rawawata ae bati.’​—Mataio 24:21.

19. Tera ae ti kona n onimakinna?

¹⁹ Ko na mena i buakoia ake a na kukurei ni kamaiuaia imwin te tokanikai ae kakannato anne? Ke tao ngkana arona bwa ko mate imwain tokin ana waaki Tatan ibukin te aoraki ke te kara, ko na mena naba i buakoia “akana raoiroi” ake a na kautaki? (Mwakuri 24:15) Ko kona ni kangai eng ngkana ko teimatoa n onimakina ana karea ni kaboomwi Iesu ao ni kakairi iroun Iehova, n aroia te koraki ake e tei ibukia “te aomata” ae raoiroi ae taekinaki n Taian Areru 112. (Wareka I-Ebeto 5:1, 2.) E na bon taraia raoi Iehova bwa e na aki mwanuokaki ‘uringakia’ aeka n aomata akanne ao n aki naba tarariaoaki aia mwakuri aika raraoi. A na bon ururingaki ao n tangiraki iroun Iehova n aki totoki.​—Taian Areru 112:3, 6, 9.

[Kabwarabwara ae nano]

Titiraki Aika Kananoa te Iango

• Baikara riki bukina tabeua ae ti riai iai n takarua ni kangai “Areruia”?

• Tera te rikirake ni boong aikai ae a rangi ni kukurei iai Kristian ni koaua?

• Aekakira te tia angabwai ae tangiria Iehova?

[Taamnei n iteraniba 25]

Ti riai n onimakina raraan Iesu are e a tia ni kawawaeaki ngkana ti kan teimatoa n taraaki iroun te Atua bwa ti raoiroi

[Taamnei n iteraniba 26]

A rangi ni manena angabwai aika nako man te nano ni kan anga ibukini boutokaan te mwakuri n ibuobuoki ao tibwatibwaani booki aika aanaki n te Baibara