Titiraki Mairouia Taani Wareware

E karenakoaki n ningai Tatan mai karawa?​—Te Kaotioti 12:1-9.

E ngae ngke e aki koteaki ni bokin te Baibara ae Te Kaotioti te tai raoi are e karenakoaki iai Tatan mai karawa, ma e bon taekini baike a waakinako n riiriki teuana imwin teuana, ake a kona ni buokira ni katautaua bwa e karenakoaki n ningai mai karawa. Te moanibwai i buakoni baike a riiriki, boni moani katean te Tautaeka n Uea iroun te Mesia. Bon imwin naba anne, “e riki te buaka i karawa,” ike e a konaaki iai Tatan ao n tokina e a karenakoaki mai karawa.

E kateretereaki raoi te ririki ae 1914 n te Baibara bwa te ririki are e a toki iai “aia bong Tientaire” ao e katea naba iai te Tautaeka n Uea.a (Ruka 21:24) Maanra imwin tokin aia bong Tientaire ao e a riki naba te buaka i karawa ike e a karenakoaki iai Tatan?

E taekinaki ae kangai n Te Kaotioti 12:4: “E tei te rakon [ae Tatan] i matan te aine are nangi bung, ba e na kana natina ngkana e a tia ni bung.” E oti man aei bwa Tatan e kani waekoa ni kamauna matan te Tautaeka n Uea n te tai naba are e a tibwa kateaki iai ngkana e kona. E ngae ngke e totokoa Tatan Iehova mani kakororaoan ana iango ae buakaka, ma e boni motika nanona Tatan ao ni botumwaaka ni kakorakoraa ni kataia n urua te Tautaeka n Uea are e a tibwa tei. E teretere ngkanne bwa a na aki kabanetai “Mikaera ma ana anera” ni kamwawaan “te rakon ma ana anera” mai karawa bwa a aonga n aki urua te Tautaeka n Uea. E kona n nanonaki n aei bwa e konaaki Tatan ao ni karenakoaki bon imwin naba katean te Tautaeka n Uea n 1914.

Te bwai riki teuana ae ti riai n iangoia boni mangautiia Kristian aika kabiraki, are e moanaki n te tai ae waekoa imwini katean te Tautaeka n Uea ao e kakoauaaki ni baika a taekinaki n te Baibara.b (Te Kaotioti 20:6) Kioina ngkai akea taekaia tarini Kristo aika kabiraki n raona Iesu ngke e buakana te rakon ma ana anera, ngkanne te buaka are i karawa ao karenakoan Tatan ma ana taimonio, e na bae n tia raoi n te tai are e a moanaki iai kautaia tarini Kristo.

E ngae ngke e aki koteaki n te Baibara te tai raoi are e karenakoaki iai Tatan ma ana taimonio mai karawa, ma e kakoauaaki bwa e karenakoaki Tatan ma ana taimonio n taorimwin raoi tokan Iesu Kristo i aon ana kaintokanuea i karawa n 1914.

[Kabwarabwara ae nano]