Arom ni Kona n Ota Raoi ni Kanoan te Baibara

2. Warekia Ma Kauka Raoi Am Iango

Iai raoraom ae e a tia ni kabuakakaa te aomata temanna nakoim ae ko tuai mani bobo ma ngaia mai mwaina? Ao ngke ko a kaitiboo ma te aomata anne, e koaua bwa e a kamaabubuaki arom ni kona n nori ana tarena ma aroaron te aomata anne aika raoiroi, man ana kabuakaka raoraom arei? E kona naba n riki ae titeboo ma anne ni kaineti ma te Baibara.

E KAURING te abotoro Bauro ni kaineti ma te bwai ae kona n riki ngkana ti kabwaka ni wareka te Baibara mani kauki raoi ara iango. E korea ae kangai Bauro ni kaineti ma I-Iutaia ake tabeman ake n ana bong: “I kaotiotiia ba bon iai tangiran te Atua ae korakora i rouia, ma tiaki aron te atatai” ae eti.​—I-Rom 10:2.

Iai I-Iutaia tabeman n te moan tienture aika a rawa ni butimwaea te koaua ae Iesu bon te Mesia, e ngae ngke e boni kabwarabwaraaki raoi n te Koroboki ae Tabu n te Taetae n Ebera. A bane n tonu raoi baika a taekinaki n te Baibara ibukin Iesu are te I-Natareta ao e kakoroi naba nanon taetae ni burabeti ni kaineti ma baike e na karaoi ni kabane te Mesia. Ma e ngae n anne, a totokoaki I-Iutaia aika bati ake n ana tai Iesu ibukini koaua ake a a kamani bwaini ngkoa, bwa a aonga n aki ota n Ana Taeka te Atua.

Tera ae ti kona n reiakinna man te rongorongo aei? E kakawaki warekan te Baibara ma te iango ae uki raoi. A kona n totokoaki taani wareware n te Baibara bwa a na ota raoi ni koaua ake iai, man te inanonano ao koaua ake a bwaini ngkoa.

N te katoto, e kabwarabwaraa temanna te tia rabakau n te Aro, are e reirei i North Carolina i U.S.A., bwa te Baibara “bon aia boki aomata, kanoana bon aia iango aomata ao a bati mai buakona aika a untaba i marenaia, ao akea ae kona n anganira te kairiri ae eti raoi ibukini maiura.” Ngke arona bwa e a kaman iangoaki te Baibara bwa e koreaki irouia aomata ao tiaki te Atua, a na bae ngkanne n rawa nakoni kairiri ma booto n reirei ake a aki boraoi ma ake a tangiria ni maiuakinna.

Ma ni kaitaraan anne, ti a kaungaaki man te Baibara bwa ti na taningamarau n ukeuke n reirei iai. E taekinaki ae kangai n te Baibara ni kaineti ma kaaini Beroia ake n ana bong Bauro: “A kani kaki i nanoia ana taeka te Atua, n ukeuke n te Baibara n te bong ae koraki ba tao a koaua baikekei ke a aki.” (Mwakuri 17:11) N ai aroia taani wareware akekei, ko na bae naba ni kani kaaki te inanonano ke te kabuakaka, are e na kona ni kamaabubua otam raoi ni kanoan te Baibara. Wareka Ana Taeka te Atua mani kauka raoi am iango ao bwaina te ingaingannano ni kan ataa ana rongorongo ae rangi ni kakukurei te tia Korea te Baibara.