E moan riki mai ia te oto karaki aei?

Boni mai mwini mateia ana abotoro Iesu ni moan te kauoua n tienture  C.E., ao a a karekea iai kakannatoia Taama n te Aro ni Katorika rimoa. E kabwarabwaraaki ae kangai ibukin aia reirei n te New Catholic Encyclopedia (2003), Volume 6, iteraniba 687: “Te reirei teuana ae rangi n taabangaki reiakinana, are aongkoa iai te bwai teuana ae kitana te rabwata imwini maten te aomata, ao e na anganaki te kimwareirei i karawa, n te tai ae waekoa imwin tian te mwakuri ni kaitiaki nakoina imwini matena.”

Tera ana reirei te Baibara?

“A a kabaia akana nimamanei, ba a na abana te aba.”​—Mataio 5:5.

E ngae ngke e berita Iesu nakoia taan rimwina bwa e na ‘katauraoa nneia’ i karawa, ma e katereterea naba bwa a na aki bane n nako karawa aika a raoiroi. (Ioane 3:13; 14:2, 3) E aki ngkoa tataroia bwa e na karaoaki nanon te Atua “i aonaba, n ai aron tauana i karawa”? (Mataio 6:9, 10) Ni koauana, e mena imwaia aika a raoiroi teuana mai buakoni kakabwaia aika uoua aikai. Tabeman mai buakoia aomata aika raoiroi aikai a na tautaeka i karawa ma Kristo, ma angiina a na tiku ni maekana te aonnaba n aki toki.​—Te Kaotioti 5:10.

I nanon te tai ae maan teutana, e a tia te Aro anne ni bita ana iango ni kaineti ma te bwai ae riai n riki i aon te aba. Ao tera mwina? E taekinaki n te New Encyclopædia Britannica bwa “e a rikirake ni bitaki kantaningaan Ana Tautaeka n Uea te Atua n te Aro ae e a kaman tei.” E kamatoaa korakorana te Aro anne n arona n irekereke ma tautaeka ao ni kakeaa ana taeka Iesu ae rangi ni mataata raoi are bon “tiaki ana bwai te aba” taan rimwina. (Ioane 15:19; 17:14-16; 18:36) I aan ana kairiri te Embera n Rom ae Constantine, a a moanna n aki mutiakinaki ana koaua tabeua te Aro anne, n aron teuana ae irekereke ma aroaron te Atua ni koaua.

Kabotaui kibun te Baibara aikai: Taian Areru 37:10, 11, 29; Ioane 17:3; 2 Timoteo 2:11, 12