Te Kaaua N Oto Karaki: Te Atua Bon Te Temanna N Teniman

E moan riki mai ia te oto karaki aei?

“E kona n iangoaki te reirei ae te Temanna n teniman bwa e moanaki karioana n te kabanea n ukeuke n reirei are karaoaki n raabanen te kaaua n tienture. N aron iangoana, e koaua aei . . . E aki kamatoaaki ao ni butimwaeaki taekan ‘te Atua ae tii temanna i nanoia teniman Aomata’ i nanoni maiuia ao n aia onimaki Kristian ni karokoa tokin te kaaua n tienture.”​—New Catholic Encyclopedia (1967), Volume 14, iteraniba 299.

“E karaoaki te Kaboowi n Nicaea ni Mei 20, 325 [C.E.]. E atuna te botaki Constantine ni kairan te maroro, ao boni ngaia naba ae tabeka . . . aan te kabwarabwara are taekani Kristo ao te Atua n te kaboowi, bwa ‘titeboo rabwatani [Kristo] ma rabwatan te Tama.’ . . . Ibukini maakan te embera, angia ebikobo, a a tiainaa te reirei arei, e ngae ngke a bati mai buakoia aika a aki kukurei iai. Tii uoman mai buakoia aika a rawa ni butimwaeia ao n tiainaia.”​—Encyclopædia Britannica (1970), Volume 6, iteraniba 386.

Tera ana reirei te Baibara?

“E on n te Tamnei are Raoiroi [Tetebano], ao e taratara rake nako karawa, ao e nora mimitongin te Atua, ma Iesu ba E tei i angaatain te Atua, ao e taku, Akea ba I nora karawa ba e kaukaki, ao Natin te Aomata ba E tei i angaatain te Atua.”​—Mwakuri 7:55, 56.

Tera ae kaotaraeaki n te miitara aei? Ngke e kaonaki Tetebano ni mwaakan te Atua ae mwamwakuri ao e a nora Iesu bwa “E tei i angaatain te Atua.” E teretere raoi ngkanne bwa e aki manga riki Iesu bwa te Atua imwini waerakena nako karawa, ma e bon tii onikaki nakon te taamnei ae kaokoro ma te Atua. Ao e aki naba mwaneweaki taekan te kateniman n aomata irarikin te Atua n te rongorongo aei. N aki ongei taiani kakorakora n ukorani kiibu n te Baibara ake a na boutokaa te reirei ae te Temanna n teniman, e korea ae kangai te mitinare man te Dominican Republic ae Marie-Émile Boismard n ana boki ae À l’aube du christianisme​—La naissance des dogmes (At the Dawn of Christianity​—The Birth of Dogmas): “E bon aki kona ni kuneaki i nanon te Nu Tetemanti . . . te kibuntaeka ae teniman aomata i nanon temanna te Atua.”

Te reirei ae matoa are e karikirakea Constantine, e karaoaki ibukini katokan te unraa n te Aro n te kaaua n tienture. Ma e ngae n anne, e a manga kauekea te titiraki teuana ae kangai: E koaua bwa Maria are e bungia Iesu, boni ngaia “Tinan te Atua”?

Kabotaui kibun te Baibara aikai: Mataio 26:39; Ioane 14:28; 1 I-Korinto 15:27, 28; I-Korote 1:15, 16