Te Kaonoua N Oto Karaki: E Kariaia Te Atua Kamanenaani Katotongani Bwaai Ma Banna N Te Taromauri

E moan riki mai ia te oto karaki aei?

“A aki kakabonganaaki katotongani bwaai n aia taromauri Kristian rimoa . . . E kariaiakaki rinin katotongani bwaai n te Aro i nanon te kaaua ao te kanimaua n tienture, i aan te iango are aongkoa a kona aomata aika aki wanawana n reiakina riki te koaua ibukin te Aro ni Kristian mani baikai, nakon ae a na kona n reiakinna man taiani kabwarabwara ke booki.”​—Cyclopedia of Biblical, Theological, and Ecclesiastical Literature, te boki ae koreaki irouia McClintock and Strong, Volume 4, iteraniba 503 ao 504.

Tera ana reirei te Baibara?

“Ko na tai karaoa am bwai te boua ae kaaraki, ao katotongan te bwai teuana are i karawa i eta, ao ae i aon te aba ae i nano, ao are n te ran are i aan te aba: ko na tai katorobubua ni bobaraki nako ia, ao ko na tai toro i rouia.” (Te Otinako 20:4, 5) E koroboki te abotoro Ioane nakoia Kristian ake n te moan tienture ni kangai: “Ataei, kawakiningkami mani bouananti.”​—1 Ioane 5:21, BK.

E koaua ae katotongani bwaai bon tii te anga teuana ibukini kawaran ao karineani baike a tei ibukia, n aron ae a taku Aaro? E taekina ae kangai te Encyclopedia of Religion: “N te moantai, a a riki katotongani bwaai bwa bwaai n reirei [ke n angareirei] ao bwaai ni katamaroa; ao tii anne bukini kariaiakani kamanenaaia. Ma n te tai ae waekoa, a a manga riki bwa baika a kakabonganaaki n te taromauri. Ao e a rangi ni koaua riki aei ni kaineti ma banna ake a a riki bwa kanikina aika kai ataaki ibukia kaain te Aro n Orthodox n te aono ni mainiku.” Ma e ngae n anne, e bon eti te burabeti are Itaia ngke e kangai: “E na kabotauaki te Atua ma antai? E na kaikonakaki ma tera?”​—Itaia 40:18, BK.

Kabotaui kibun te Baibara aikai: Itaia 44:13-19; Mwakuri 10:25, 26; 17:29; 2 I-Korinto 5:7