Ukeran te Koaua Ibukini Karawa

Ai anai nanora te kantaninga ibukin te nako karawa ae ti ongoraeia! E boutokaaki te kantaninga ibukin te maiu imwin te mate n aanga tabeua aika kakaokoro n Aaro ni Mutirim, Hindu, Buddhist, kaain Aaro ake aongkoa Kristian ngaiia, ao aomata naba aika bati ake a aki nano n te Aro. E aki toki n iangoaki karawa bwa te tabo ae rangi n tamaroa ao ni kakukurei ike a kabebeteaki iai aomata man te rawawata ao ni manga katiteuanaaki ma “raoia aika tangiraki ake a a tia ni mate.” Ma e ngae n anne, a kakoauaa angia aomata te taetae rimoa ae okioki ae kangai: A bane aomata ni kan nako karawa, ma akea ae kani mate bwa a aonga n roko iai. Bukin tera?

Ngkana ti karikaki bwa ti na mate ao n nako karawa, tiaki a na bati riki aomata aika a na ingainga nako iai n aroni korakoran ingaingan te teei ni kan ikawai ke ingaingan te roro n rikirake nakon te mare? Ma a aki kani ni mate angia aomata.

E ngae n anne, a taekinna mataniwi n Aaro bwa ti karikaki bwa ti na maeka i karawa imwini maekara i aon te aba n te tai ae kimototo. N te katoto, e mwaneweaki ana taeka Theodore Edgar Cardinal McCarrick, ae te akebikobo ae e a tia n ritaea i Washington, D.C., ae kangai: “Ti aki karikaki bwa ti na maiu n aron ae ti maiu iai ngkai ma ti karikaki bwa ti na maiu i karawa.” N aron naba anne, e mwaneweaki ana taeka te beretitenti rimoa n te U.S. National Association of Evangelicals ae Ted Haggard, ae kangai: “Te kantaninga ibukin te maiu bon ibukin neboan te Atua ao te nako karawa . . . ibukina bwa karawa boni mwengara.”

N angiin te tai, e boto aia onimaki te koraki ake a kakoauaa te maiu i karawa imwin te mate i aon aia atatai ae karako. E kunea George Barna, ae te beretitenti n te kambwana ae tabe ma neneran aia koaua Aaro, bwa a bati aomata ake a anai bwa aia koaua “iango aika kaineti ma te maiu ae ngkai ao are imwin te mate, aika boto i aon iango aika reke mani baika kakaokoro, n aron taian taamnei, katangitang ao booki ni karaki.” E mwaneweaki ana taeka mataniwin te Aro ae te Episcopalian i Florida ae kangai: “Akea te bae ti ataia ibukini karawa ma ti tii ataia ae ana tabo te Atua.”

Ma e ngae n anne, karawa bon te reirei ae kakawaki n te Baibara. Tera aroni karawa n aron ae taekinaki n Ana Taeka te Atua? E karikaki te aomata bwa e na maeka i karawa? Ngkana a na nako karawa aomata, tera ae a na karaoia ikekei?

[Kabwarabwaraan n iteraniba 3]

E aera ngkai a bati aika kan nako karawa, ma a karako aika kani mate bwa a aonga n roko iai?