Ko Kona ni Kinaa te Atua n Arana?
Bon te kakabwaia tuangakim bwa ko na kamaura te aomata ae kakannato ao ni weteia n arana. N angin te tai, a kona ni weteaki aomata aika bwakuaku n nakoaia n aron “te Beretitenti,” “te Uea,” ke “te Tia Moti ae Ko Karineaki.” Mangaia are ngkana e tuangko temanna ae bwakuaku ni kangai: “Taiaoka ni weteai n arau,” ko na bon namakinna ae ko a kakabwaiaaki.
E TUANGIRA ni kangai te Atua ae koaua n ana Taeka ae te Baibara: “Bon Iehova Ngai; bon arau aei.” (Itaia 42:8, BG) E ngae ngke e bati nakoana n aron “te tia Karikiriki,” “Teuare Moan te Mwaaka,” ao “te Uea ae Moan te Rietata,” ma e boni karineia ana toro aika kakaonimaki n taai nako n arona ni kariaia bwa a na weteia n arana.
N te katoto, e a tia Mote are te burabeti ni butiia te Atua n te taina ni kangai: “Taiaoka Iehova.” (Te Otinako 4:10, NW) E kauka ana tataro ni katabuan te tembora are i Ierutarem te Uea are Toromon ni kangai: “Iehova.” (1 Uea 8:22, 23, BG) Ngke e wetea te Atua te burabeti are Itaia ibukin te botannaomata ae Iteraera, ao e taku: “Iehova, bon Tamara Ngkoe.” (Itaia 63:16, BG) E mataata bwa e bon tuangira Tamara are i karawa bwa ti na weteia n arana.
Ngkai e kakawaki wetean Iehova n arana, e bati riki iai te bwai ae irekereke ma kinaakina raoi n arana. E beritana ae kangai Iehova ni kaineti ma ane e tangiria ao n onimakinna: ‘I a kamaiua ngkai e ataa arau.’ (Taian Areru 91:14, BG) E mataata bwa a bati baika irekereke ma ataakin aran te Atua, kioina ngkai bon aio te kiing ae kakawaki ibukini karekean ana kamanomano. Tera ngkanne ae kainnanoaki mairoum bwa ko aonga n kinaa Iehova n arana?