Kakorakorakira N Tokanikai I Aoni Kataaki Nako

“I konai bwaai ni kabane ni karaoi iroun teuare e anganai te korakora.”​—I-BIRIBI 4:13.

1. E aera ngkai a kaaitara ana aomata Iehova ma kangaanga aika rawawata aika bati?

A AKI toki n taonaki ana aomata Iehova ni kangaanga aika rawawata n aekaia nako. A riki kangaanga tabeua man aki kororaoira ke imwini baika riiriki n te waaki ae ngkai ae ti mena iai. A riki ake tabeua man te riribai i marenaia ake a beku ibukin te Atua ao ake a aki. (Karikani Bwaai 3:15) Ni moa mani karikaia aomata, e a tia te Atua ni buokiia ana toro aika kakaonimaki bwa a na nanomwaaka i aani bwainikirinaia ibukin aia Aaro, a na rarawa nakoni kariri aika karuanikai mairouia tabonroroia, ao n nanomwaaka i aani kangaanga riki tabeua aika rawawata n aekaia nako. E kona ni kakorakoraira taamneina ae raoiroi bwa ti na karaoa naba anne.

E Buokira te Taamnei ae Raoiroi n Nanomwaaka i Aani Bwainikirinara Ibukin Ara Aaro

2. Tera raoi bukin te bwainikirinaki ibukin te Aro, ao e kona n reke n aaro raa?

² E nanonaki ni bwainikirinaia aomata ibukin aia Aaro bwa a karawawataaki ke ni kammarakaki ni kaikoakaia ibukin aia onimaki ke aia koaua. Bukin raoi karaoan anne bwa a aonga ni katokaki aeka ni koaua aikai, a na totokoaki butanakoia, ke a na uruakaki kakaonimakia ma te nano ae eti taan onimaki. E kona n reke te bwainikirinaki n aaro aika kakaokoro, tabeua a kona n noraki ao tabeua a raba. E kabotauaki kaitaraakira iroun Tatan n te Baibara ma kaitaraakira iroun te raian te teei ao te naeta ae te atibi.​—Wareka Taian Areru 91:13.

3. Aekara te bwainikirinaki ae kaanga mairoun te raian ao te naeta ae te atibi?

³ E a tia Tatan ni karaoi waaki n totoko n angiin te tai n ai aron te raian ae tiritiri rinanoni mwakuri n tiritiri, kabureaia aomata, ke katabuani waakinan te mwakuri. (Taian Areru 94:20) E ribootinaki n te Yearbook bwa a korakora aeka ni kunemwaan akanne nakon aia mwakuri Ana Tia Kakoaua Iehova n taai aikai. A a tia n iowawa nakoia ana aomata te Atua n taabo aika bati taani kakeru aika urui tuua ao tabeman a kairaki irouia mataniwi n Aaro ke taan tautaeka aika eti matoa. A a tia tabeman ni kitan aia beku ibukin Iehova n niniakia iroun Tatan ae ai aron te raian. E kaaitaraia naba aomata te Riaboro man taabo aika raba n ai aron te atibi bwa e na kabaarekai aia iango ao ni mwamwanaia bwa a na ira nanona. Bukin raoi kaitaraakira aei bwa e na kamamaraaki ke ni kakeaaki ara onimaki. Ma ti kona n nanomwaaka i aan aaro ni bwainikirinaki aika uoua aikai rinanon te taamnei ae raoiroi mairoun te Atua.

4, 5. Tera te kawai ae te kabanea n raoiroi ibukini katauraoara imwain te bwainikirinaki, ao bukin tera? Taekina te katoto.

⁴ Tiaki te kawai ae te kabanea n raoiroi ibukini katauraoara, iaiangoakini bwainikirinara aika kakaokoro aika kona n riki n taai aika imwaira. Ni koauana, ti aki kona n ataa te bwainikirinaki ae ti na rinanona, ngaia are e karako buokara man raraomaeakinani baika tao a aki kona n riki. Ma e ngae n anne, iai te bwai ae ti kona ni karaoia. A a tia angiia aomata n tokanikai n nanomwaaka i aan te bwainikirinaki ibukina bwa a kananoi aia iango i aon aia katoto ana toro Iehova aika kakaonimaki ma te nano ae eti n aron ae e taekinaki n te Baibara, n ikotaki naba ma ana reirei ao ana katoto Iesu. E a kona anne ni kakorakoraa tangiran Iehova irouia. Ao a a buokaki n te tangira anne bwa a na rarawa nakoni kataaki nako ake a kaaitarai.

⁵ Iangoa aia katoto taari aine aika uoman i Malawi. A kakorakoraia te koraki ake a iowawa ni kairoroiia bwa a na kabooi aia beeba ibukini boutokaan te tautaeka n te aro are a oreiia, a bubwaiia, ao a kakamaakuia bwa a na tauia. A kewenia naba bwa aongkoa a a tia kaain te utu ni Betaera ni karekei beeba akanne. Tera aia kaeka taari aikai? A taku: “Ti beku tii ibukin Iehova ae te Atua. Ngaia are ngkana a a tia ni kabooi aia beeba taari ake n te aobiti n tararua, bon akea naba bitakin ara kaeka. Ti na bon aki kakeaa ara onimaki e ngae naba ngkana kam tiringira!” A a kainaomataaki taari aikai imwin ninikoriaia.

6, 7. E kanga ni kakorakoraia ana toro Iehova ngkana a kaitaraa te bwainikirinaki?

⁶ E ataia te abotoro Bauro bwa a butimwaea rongorongon te koaua Kristian ake i Tetaronike “i buakon te rawawata ae bati ma te kimwareirei are reke rinanon te taamnei ae raoiroi.” (1 I-Tetaronike 1:6) Ni koauana, a bati Kristian rimoa ao ngkai aika a kaaitara ma te bwainikirinaki ao n tokanikai i aona, ake a ribootinna bwa ni kaitaraaia ni kataaki aika rangi ni kangaanga, a namakina iai te raunnano ae uaan te taamnei ae raoiroi mairoun te Atua. (I-Karatia 5:22) A buokaki ni kawakin nanoia ao aia iango n te rau anne. Eng, e kamanena mwaakana ae mwamwakuri Iehova ni kakorakoraia ana toro bwa a na kekeiaki ribuakoni kataaki ao ni kaotiota te wanawana ngkana a taonaki ni kangaanga aika rawawata.a

⁷ A rangi ni mimi taani mataku n aia motinnano ana aomata te Atua are a kateimatoa kakaonimakia ma te nano ae eti, e ngae naba ngke a kaaitara ma te bwainikirinaki ae raonaki n te tiritiri. A kaonaki taani Kakoaua n te korakora ae riaoni korakoraia aomata, ao e boni koaua aei. E karau nanora te abotoro Betero ni kangai: “Ngkana kam kabuakakaaki ibukin arani Kristo, ao kam a kukurei, ibukina bwa e a mena i aomi taamnein te mimitong ae taamnein te Atua.” (1 Betero 4:14) E kaotaki bwa ti karekea akoara mairoun te Atua ni bwainikirinara ibukini boutokaani kaetieti aika raraoi. (Mataio 5:10-​12; Ioane 15:20) Ai kakimwareireira te bwai ni kakoaua aei ae ti kakabwaiaaki iroun Iehova!

Ti Buokaki n Rarawa Nakon Aia Kariri Tabonrorora

8. (a) Tera ae buokiia Iotua ao Kareba n rarawa nakon aia kariri tabonroroia? (b) Tera reireiara man aia katoto Iotua ao Kareba?

⁸ Te aeka ni kakaaitara ae raba are a riai n nanomwaaka i aana Kristian, boni kariri aika karuanikai mairouia tabonroroia. Mangaia are ngkai e rangi ni mwaaka riki taamnein Iehova nakon nanon aon te aba, ti a kona iai n rarawa nakoia aomata ake a kakanikoira, a kabutaanako rongorongora aika aki koaua, ke a kataia ni kairoroira bwa ti na tou mwin aia kaetieti. N te katoto, tera are e kaira Iotua ao Kareba bwa a na bobuaka aia iango ma raoia aika tengaun ake a kanakoaki bwa a na tuoa te aba ae Kanaan? E kauekeaki i nanoia “te nano,” ke te iango ae kaokoro rinanon te taamnei ae raoiroi.​—Wareka Warekaia Iteraera 13:30; 14:6-10, 24, BG.

9. E aera ngkai a riai Kristian ni kukurei ni kaokoroia mairouia angiia aomata?

⁹ N aron naba anne, e kakorakoraia ana abotoro Iesu te taamnei ae raoiroi bwa a na ongeaba riki iroun te Atua nakon are a na ongeaba irouia ake a karineaki bwa taan reiakina te Aro ae koaua irouia aomata aika bati. (Mwakuri 4:21, 31; 5:29, 32) Angiia aomata a kani karaoi riki mwakuri aika a kakaraoaki irouia aomata ake a mena i buakoia ibukin totokoan te ikakaiwi ke te itabarara. Ma a aki toki n tei ibukin te bae a ataia bwa e eti Kristian ni koaua. Ma e ngae n anne, a kakaitau ibukin te korakora ae a anganaki ni mwaakan te Atua ae mwamwakuri bwa a aikoa maaku ni kaokoroia. (2 Timoteo 1:7) Iangoa te itera teuana ae ti riai n aki taonakinako iai n aia kariri tabonrorora.

10. Tera te bwai ae a kona n tikimaurekaki iai aia iango Kristian tabeman?

¹⁰ A kona n tikimaurekaki aia iango rooro n rikirake tabeman, ngkana a ataia ae e a tia raoraoia ni kakaraoa te mwakuri ae aki boraoi ma ana reirei te Baibara. A kona n iangoia bwa e na bua onimakinaia n ukerani buokan raoraoia mairouia unimwaane n te ekaretia, ngaia are a rawa ni kaota arona anne bwa n aia iango a riai ni karabaa, e ngae ngke a aki kukurei ake a a irekereke iai. E kona naba ni kariria raoraona te tia bure bwa a na karabaa ana bure. Ni koauana, tiaki tii rooro n rikirake aika a aitara ma te kangaanga aei. A kona n namakinna tabeman ikawai bwa e kangaanga naba kaotan ana bure raoraoia ke kaain aia utu temanna nakoia unimwaane n te ekaretia. Ma tera aroia Kristian ni koaua ae a riai ni karaoia n te kariri anne?

11, 12. Tera arom ae te kabanea n tamaroa ngkana e kaumakiko temanna kaain te ekaretia bwa ko na karabaa ana bure ao bukin tera?

¹¹ Iangoa te bae riki aei. Iangoia bwa aongkoa e a ataia te tari te mwaane ae te roro n rikirake ae Alex ae anuan raoraona n te ekaretia are Steve, bon te mamataku n te bwaitingako. E tuangaki Steve iroun Alex bwa e rangi n tabeaianga n te bae e kakaraoia. Ma e aki bati n tabe ma ana taeka raoraona aei Steve. Ngke e kaumakaki iroun Alex bwa e na maroro ma unimwaane n te ekaretia ibukin aei ao e kaekaa Steve bwa ngkana bon raoraona ni koaua ao e na aki kaotia nakoia unimwaane. E riai Alex ni maaka buan ana iraorao ma raoraona? Tao e bae n iangoia teuaei bwa antai ae a na kakoauaa unimwaane ngkana e karabai bwaai nako Steve. Ma e aki kona n nakoraoi te kangaanga anne ngkana e aki kaotia Alex. Ni koauana, e kona ni bua ana iraorao Steve ma Iehova. E wanawana Alex ngkana e ururinga are “e karokoa te ao-ni-katatai makan te aomata: Ma ane onimakina Iehova ao e na kamaiuaki.” (Taeka N Rabakau 29:25, BG) Tera riki ae e kona ni karaoia Alex? Tao e kona ni manga kawara Steve ao n taetae ma te akoi ni maroroakina ana kangaanga aei ma ngaia. E kainnanoaki te ninikoria ni karaoan aei. Tao e na kukurei ngkai Steve n reken te tai ni maroro aei ibukin ana kangaanga. E riai Alex ni kaungaa riki teuaei bwa e na kawariia unimwaane ao e na tuangnga naba bwa ngkana e aki karaoa aei i nanon te tai ae tau maanna, ngkanne e nang kaongoia unimwaane.​—Nakoaia Ibonga 5:1.

¹² Ni karaoan anne, e bae n aki kaitauko ibukin am ibuobuoki raoraom n te moantai. Ma imwin tabeua te tai, e a kona n ota bwa ko karaoa ae moan te tamaroa ibukina. Ngkana e anganaki te tia bure te ibuobuoki ao e butimwaeia, e na bae ni kaitauko n taai nako ibukin ninikoriam ao kakaonimakim ni koaua. N te itera teuana, ngkana e teimatoa n un iroum ibukin tuangakia unimwaane buokana, bon te rao ni koaua ngkanne ae ko na tangiria? Kakukureian Raoraora ae te kabanea ni kakannato ae Iehova, bon te bwai ae eti ae ti riai ni karaoia. Ngkana ti moanibwaia, a na karaoa ae riai nakoira ibukini kakaonimakira ni koaua tabemwaang ake a tangiria, ike ti a riki iai bwa raao ni koaua. Ti riai n aki kakatokaa boran te Riaboro i nanon te ekaretia ni Kristian. Ngkana ti katokaa borana, ti a boni karawawataa iai te taamnei ae raoiroi mairoun Iehova. Ma ti karaoa ae boraoi ma te taamnei ae raoiroi ngkana ti kateimatoa itiakin te ekaretia ni Kristian.​—I-Ebeto 4:27, 30.

Kakorakorakira n Nanomwaaka i Aani Kangaanga n Aekaia Nako

13. Aekakira kangaanga aika rawawata ake a kaaitarai ana aomata Iehova, ao bukin tera bwa a rangi n taotira baikanne?

¹³ A kona n roko kangaanga aika rawawata n aaro aika bati n aron te bitaki ae korakora n ara karekemwane, buan ara mwakuri, te kabuanibwai ae karina, maten ae tangiraki iroura, taonakira n te aoraki ae kakaiaki, ao a a bati riki. Kioina ngkai ti maiu n “taai aika okoro aika karuanikai,” e kantaningaaki ngkanne bwa n te tai ae waekoa ke rimwi riki ao ti na bane n kaaitara ma te aeka ni kataaki teuana. (2 Timoteo 3:1) E kakawaki bwa ti na aki buannano ngkana e riki anne. E kona ni kakorakoraira te taamnei ae raoiroi bwa ti na nanomwaaka i aani kangaanga aika rawawata n aekaia nako.

14. Tera are e kakorakoraaki iai Iobi bwa e na nanomwaaka i aan ana kangaanga aika rawawata?

¹⁴ E taonaki Iobi n te kangaanga ae rawawata teuana imwin teuana. E bua mweraoina, natina, raoraona, marurungina, ao e bua naba onimakinan Iehova irouni buuna. (Iobi 1:13-19; 2:7-9) Ma e ngae n anne, e noria Iobi bwa Eriu bon te tia kabebetenano ni koaua. E kangai ana rongorongo Eriu, n ikotaki naba ma te reirei ae kakawaki n ana taeka Iehova nakon Iobi: “Tei moa, ao iangoi ana makuri te Atua aika kamimi.” (Iobi 37:14, BG) Tera are e buoka Iobi n nanomwaaka i aani kataakina? Ao tera naba ae kona ni buokira n nanomwaaka i aani kataakira? Bon ururingan ao iaiangoani baika kakaokoro ake e kaotiotii ana mwakuri te taamnei ae raoiroi mairoun Iehova ao mwaakana. (Iobi 38:1-41; 42:1, 2) Ti bae n uringi taai ake rimoa i nanoni maiura ngke ti nora te bwai ni kakoaua ae kaota tabeakinara n tatabemanira nako iroun te Atua. E bon teimatoa n tabeakinira.

15. Tera are e kakorakoraaki iai te abotoro Bauro bwa e na nanomwaaka i aani kataaki?

¹⁵ E nanomwaaka te abotoro Bauro i aani kangaanga aika rawawata ake a karuanikaia maiuna ibukin ana onimaki. (2 I-Korinto 11:23-28) E kanga ni kateimatoa te aroaro ni maiu ae riai ao mweraoina ribuakoni kangaanga aika korakora? Boni man onimakinan Iehova n te tatataro ma nanona. E korea ae kangai Bauro n tain tuoana are e a roko n tokina ni matena ibukin ana onimaki: “E tei i rarikiu te Uea ao e karina te mwaaka i nanou, bwa I aonga ni kakororaoa raoi tataekinan te rongorongo ae raoiroi ao a na bane n ongora iai botannaomata nako, ao I kamaiuaki mani win te raian.” (2 Timoteo 4:17) Mangaia are man te bare e rinanona Bauro, e a kona ni kakoauaa iai nakoia raona n te onimaki bwa a aki riai n “raraomaeakina te bwai teuana.”​—Wareka I-Biribi 4:6, 7, 13.

16, 17. Taekina te katoto n aron Iehova ni kakorakoraia ana aomata ibukini kaitaraani kangaanga aika rawawata ni boong aikai.

¹⁶ E a tia te bwaiania ae Roxana n namakina aron Iehova n tabeakinia raoi ana aomata. Ngke e butiia ana mataniwi neiei bwa e na motirawa tabebong ibukin irakin teuana mai buakon ara bwabwaro, e a kaekaa teuaei ni bwanaa n un ao n tuangnga bwa ngkana e nako ao e na kabanea. Ma e bon nako naba Roxana ao e kakorakoraa n tataro bwa e na aki kabaneaki. Imwin anne, e a namakina te raunnano. E kabaneaki neiei iroun ana bwaoti n te Moanibong are imwin te bwabwaro n aron raoi are e a tia n tuangnga. E a rangi n raraoma Roxana. E kainnanoa ana mwakuri arei ibukini buokaia kaain ana utu, e ngae naba ngke e uarereke boona iai. E a manga tataro riki neiei ao e iaiangoa te koaua ae e a tia te Atua ni katauraoi baike e kainnanoi ibukin ana onimaki n te bwabwaro, ngaia are e kona naba ni katauraoi baika e kainnanoi ibukini maiuna. Ngke e okira ana auti, ao e a nora te katanoata ae kangai: “E Kainnanoaki Aia Ibuobuoki” aika a mwaatai ni kabonganai mitiin n te tabo ni karaobwai. Maikanne are e a korea iai ana reta ni bubutii ibukin ana mwakuri. E a ataia te manatia bwa akea ana atatai neiei n te mwakuri aei ma e boni kateirakea naba ao e kuri n taboro boona nakon are mai mwaina. E a namakinna ngkai Roxana bwa a kaekaaki ana tataro. Ma e ngae n anne, te kakabwaia ae te kabanea ni kakawaki, e a kona n tibwaa te rongorongo ae raoiroi nakoia raona ni mwakuri tabeman. Niman mai buakoia, a butimwaea te koaua ao a bwabetitoaki ao temanna mai buakoia bon te manatia.

¹⁷ N tabetai, a kona n taraa n aki kaekaaki ara tataro tao ngkekei naba ke n aron ae ti kantaningaia. Ngkana ngaia anne ae riki, akea te nanououa bwa iai bukina ae riai. E ataa bukina Iehova, ma tao e na rikirake ni mataata riki nakoira n taai aika imwaira. Ma te bwai ae ti kakoauaa raoi, e bon aki kona ni kitania ana toro aika kakaonimaki te Atua.​—I-Ebera 6:10.

Te Ibuobuoki n Tokanikai i Aoni Kataaki ao Kariri

18, 19. (a) E aera ngkai ti kona ni kantaningai kataaki ao kariri? (b) Ko na kanga n tokanikai i aoni kataaki?

¹⁸ A aki mimi ana aomata Iehova ngkai a kaaitara ma te kariri, te bwarannano, te bwainikirinaki, ao aia kariri tabonroroia. A bon riribaira kaain te aonnaba. (Ioane 15:17-19) Ma e kona ni buokira te taamnei ae raoiroi n tokanikai i aoni kangaanga nako ake tao ti kaaitarai, ngkai ti beku ibukin te Atua. E na aki kariaia Iehova bwa ti na kaririaki n ae riaon ara kona. (1 I-Korinto 10:13) E na bon aki kaakira ke ni kitanira. (I-Ebera 13:5) Ti kamanoaki ao ni kakorakoraaki n te ongeaba nakon ana Taeka ae kairaki koreana rinanon te taamnei. Irarikin anne, e kona taamnein te Atua ni kaumakiia raora n te onimaki bwa a na anganira te ibuobuoki ae riai n te tai ae ti rangi ni kainnanoia iai.

¹⁹ Ti bia bane n teimatoa n ukoukora te taamnei ae raoiroi rinanon te tatataro ao te ukeuke n reirei n te Baibara. Ti bia teimatoa ni ‘kakorakoraaki n te mwaaka ae ti kainnanoia ae reke mani mimitongini mwaakana, bwa ti aonga n nanomwaaka ni bwaai ni kabane ao n taotaon nanora n te kimwareirei.’​—I-Korote 1:11.

[Kabwarabwara ae nano]

Ko na Kanga ni Kaeka?

• Ko na kanga n katauraoiko bwa ko na nanomwaaka i aan te bwainikirinaki?

• Tera ae ko na karaoia ngkana iai ae kaumakiko bwa ko na karabaa ana mwakuri ae bure?

• Tera ae ko kona ni kakoauaa ngkana ko kaaitarai aeka ni kangaanga aika korakora?

[Taamnei n iteraniba 30]

Tera reireiara mairoun Iotua ao Kareba?

[Taamnei n iteraniba 31]

Ko na kanga ni buoka raoraom ae e karaoa te bure?