Te Taetae ni Burabeti ae Moan te Kakawaki
“E na tataekinaki te rongorongo ae raoiroi aei ae taekan te tautaeka n uea, n te aonnaba ni kabutaa bwa te bwai ni kaotioti nakoia botannaomata ni kabaneia, ao ngkanne e a roko naba te toki.”—MATAIO 24:14.
A KAKOAUAA taan rabakau bwa e rangi ni kakawaki te kibu anne. E kakawaki ibukina bwa e kabwarabwaraa te mwakuri ae riai ni karaoaki ni katobibia te aonnaba. Ao e kakawaki aei ibukina bwa e taekina te bae a riai ni karaoia ao n tataekinna Kristian ae te mwakuri n uarongorongo imwain te bwai ae rangi ni kakawaki ae a bati aika a na rotakibuaka iai, are e aranna Iesu bwa “te toki.”
E tabe ni kakororaoaki te taetae ni burabeti anne ni boong aikai. Ko irekereke iai ibukina bwa iai te kakao ao te kauring n te rongorongo ae raoiroi aei. E anganiko am tai n rinea ae ko tangiria, bwa ko na butimwaea Ana Tautaeka n Uea te Atua ke ko na rawa. E na bon rotaki maium n te bae ko rineia.
Iangoa te rongorongo aei. Tabeua te bong imwain taurakin Iesu i aon te kai, a a kawaria taan rimwina n titirakinna ibukin taai ake imwaia. A rangi ni kan ataa te tai ibukini katean Ana Tautaeka n Uea te Atua, are e tataekinna Iesu n angiin te tai. A kan ataa naba “tokin te waaki ae ngkai i aon te aba,” ke n aron ae taekinaki n rairai tabeua bwa “tokin aonaba.”—Mataio 24:3, BK.
Ni kaekaan anne iroun Iesu, e taetae ni burabetinna bwa a na taabangaki buaka, roongo, aoraki aika kamamate ao mwaeiei aika korakora. E taekinna naba bwa e na rikirake riaoan te tua, a na mwamwanaia aomata aika bati taan angareirei man Aaro aika kewe, ao a na ribaaki ma ni bwainikirinaki Kristian ni koaua. A bane ni kananokawaki rongorongo aikai.—Mataio 24:4-13; Ruka 21:11.
Ma bon iai naba rongorongo aika kakukurei. Imwina e taekin taeka akana a mwaneweaki mai eta ake a kammwakuri aia iango aomata ibukin te bae e nanonaki iai, ao e angania te kantaninga are e na kaungaia i nanon tienture aika bati. E ngae ngke a boraoi n iango aomata ibukini kakawakin ana taeka Iesu, ma a aki kakoauaa nanona. Tera raoi ae nanonaki n te rongorongo ae raoiroi aei? Tera te Tautaeka n Uea? N ningai are e na kakororaoaki te taetae ni burabeti aei ao iroun antai? Ao tera “te toki”? Ti na noria.
[Taamnei n iteraniba 2]
Katotongan Te Washington Manuscript Ae Taian Euangkerio Aika Aua Man 1912. E Katuruturuaki Mataio 24:14
[Te Kabwarabwaraan te Taamnei]
Man te boki ae te Facsimile of the Washington Manuscript of the Four Gospels in the Freer Collection 1912