A Riai Ataei n Reiakina Taekan te Atua?

“Iai ara Aaro ma e karekea te itabarara ma e aki karekea te itangitangiri.”​—JONATHAN SWIFT, AE TE TIA KOREA TE BOKI N TE INGIRITI.

E KABWARABWARAA te iango anne Swift n te 18th tienture, ma a bati ni boong aikai aika boraoi n iango ma ngaia. Ni koauana, a kakoauaa tabeman bwa a bon aki kariaiakaki kaaro bwa a na reiakinia natiia taekan te Atua. A a iangoia bwa a tekebuaka ataei aika a kaikawaaki n te utu ae taua te aro.

Tera am iango? E nga ae moan te kakawaki mai buakoni kibuntaeka aikai?

● A aki kariaiakaki kaaro bwa a na reiakinia natiia taekan te Atua.

● A riai kaaro n taningaa ikawaia natiia ao a tibwa maroroakina taekan te Atua ma ngaiia.

● A riai kaaro n reiakinia natiia man ua­rerekeia oin aia koaua ibukin te Atua. Ma ngkana a ikawai riki, a riai ni kaungaia bwa a na iangoa raoi bukin aia koaua.

● A riai ataei ni butimwaea aia koaua aia karo ibukin te Atua n aki titiraki moa.

E Karawawataia Ataei te Aro?

Bon akea te karo ae mwamwannano ae kani karawawataa natina. Ma a boutokai aia iango koraki ake a tukia ataei man reiakinaia taekan te Atua koaua aikai? I nanon ririki aika bati ngkai, a a tia taani kakaae ni kakorakoraia n ukeuke i aon rotakia ataei n aia koaua kaaro n onimakinan aia Aro. Tera mwin aia ukeuke?

A kunea taani kakaae bwa e kona te Aro ni karekea uaana ae raoiroi ni kaikawaan te teei, n oneani mwin are e na karawawataaki. E taekinaki ae kangai n te ribooti are e boreetiaki n te beeba ni kaongora ae te Social Science Researcha n 2008: “E kaotaki n te Aro bwa rikiraken te itoman i marenaia kaaro ao ataei bon irouia tiina ma taama.” E taekinaki riki ae kangai n te ribooti aei: “E kona n riki te Aro ao te onimaki bwa te bwai ae kakawaki ni maiuia ataei ni kabane ao n rangi ni kakawaki naba ibukin te itoman n te utu.” Nora boraoin te kukune anne ma ae e taekinna Iesu aei: “A a kukurei akana ataia bwa a kainnanoa te Atua.”​—Mataio 5:3.

Tera aron te iango are a riai ataei ni kaikawaaki moa ao a tibwa kona n reiakinaki taekan te Atua ao taekan te Aro? E kaitaraa te koaua aei te iango anne: Ana iango te teei ai aron te bwaketi ae akea kanoana are e tataningaa kanoaakina. Ni koauana, a a kaaitara kaaro ma te motinnano ni kanoaan te bwaketi anne ni booto n reirei ibukin te maiu ae riai, ao koaua aika a iangoia bwa a eti ni mwengaia, ke ni kariaia karinan iango aika ioo mai tinanikun te mwenga n ana iango ao nanon te teei.

Tera te Bwai ae Raba?

E kakoauaaki n rongorongon rimoa bwa a kona aomata ni kamanenai aia reirei man Aaro ibukini karekean te inanonano ao te itabarara. Ngaia are a na kanga kaaro n totokoa mwin te baere e kabwarabwaraa Jonathan Swift? A na kanga n reiakinia natiia koaua ake a na buokiia bwa a na itangitangiri?

E kona n reke te bwai ae raba ngkana a kaekaaki titiraki aika tenua aikai: (1) Tera ae a riai n reiakinna ataei? (2) Antai ae a riai n reiakinia ataei? (3) Tera te anga ae tamaroa ibukin te mwakuri n angareirei?

[Kabwarabwara ae nano]