Antai ae A Riai n Reiakinia Ataei Taekan te Atua?
“E aki kakannato riki nakon ana tia reirei te aomata are reireinaki, ma aomata nako ake e kororaoi reireiaia a na katotonga raoi aia tia reirei.”—RUKA 6:40.
A NAMAKINNA kaaro tabeman bwa a aki tau n reiakinia natiia taekan te Atua. Tao a iangoia bwa e aki tau aia reirei ke e aki tau aia atatai ibukin taekan te Aro are a na riki bwa taan reirei aika mwaatai. Ibukin anne, a bae ni katuka te mwioko ae kakawaki aei nakon aia koraki ke te mataniwi n Aaro.
Antai ngkanne ae bon tabena ni koaua reiakinaia ataei taiani koaua ibukin te Aro, ao kaetieti ibukini booto n reirei? Iangoa te bae e taekinaki n te Baibara ibukin te reirei aei, ao kabotaui taeka aikai ma aia kukune taani kakaae.
Tera Taben te Tama?
Te bae reiakinaki n te Baibara: “Taama, tai kauekea te un irouia natimi, ma kaikawaiia i nanon te reirei ni kataneiai ao ni kaetietiia i nanon te Uea.”—I-Ebeto 6:4, “Holman Christian Standard Bible.”
Aia kukune taani kakaae: A na kanga taama ni buokaki ngkana a karikirakea matoatoan aia koaua n aia Aaro? E taekinaki ae kangai n te kaongora ae Fathers’ Religious Involvement and Early Childhood Behavior, are e boreetiaki n 2009: “A kona ni buokaki mwaane bwa a na riki bwa taama aika raoiroi ngkana a bobotaki ma aomata aika titeboo aia onimaki ma ngaiia. E kona te Aro ni karekea te boutoka ao te kairiri n ikotaki naba ma reirei ao kaetieti ibukini kanakoraoani maiuia aomata n tatabemania nako.”
E rangi ni kaatuuaki n te Baibara kakawakin taben te tama ibukini kaikawaaia, ao anganakia ataei te reirei ni kataneiai. (Taeka N Rabakau 4:1; I-Korote 3:21; I-Ebera 12:9) Ma e manena te reirei ni kairiri anne ni boong aikai? N 2009 ao e boreetia te kaongora te reirei ae Rietata i Florida are maroroakina iai rotakia naati irouia tamaia. A kunea taani kakaae bwa ataei aika a kaikawaaki ma n tabeakinaki raoi irouia naba tamaia, a kona ni bwaina te atataiaomata ao ni karekea te maiu ae raoiroi. Tao a na ongeaba riki ataeinimwaane ao a na kona n iangoia riki ataeinnaine bwa a manena. Ni koauana, e teimatoa ni manena taeka n reirei n te Baibara.
Tera Aroni Kakawakin Taben te Tina?
Te bae e reiakinaki n te Baibara: “Tai kaki ana tua tinam.”—Taeka N Rabakau 1:8, BG.
Aia kukune taani kakaae: E noraki n te Handbook of Child Psychology n 2006 bwa a bati riki aia tai tiina ae a kabanea ma natiia nakoia taama, ike a kakaraki iai ma natiia ao n reitaki. E riiriki ae aron aei n aaba aika kakaokoro aika bati.” E kona ni korakora rotakin aron te teei i nanon ana tai n ikawairake mwaitin te tai n reitaki anne, ana taetae ni kawai te tina, ana mwakuri, ao aroarona.
Ngkana a uaia te tina ao te tama n reiakinia natiia te koaua ibukin te Atua, a angania iai bwaintangira aika kakawaki aika uoua. Te moan, a karekea angaia ataei n iraorao ma Tamaia i karawa, ae te iraorao are e kona ni kakabwaiaia ni maiuia ni kabane. Te kauoua, a karekea reireiaia ataei rinanon ana katoto te buu te mwaane ao te buu te aine n uaia n reitaki n uaiakin tiia aika kakawaki. (I-Korote 3:18-20) Kioina ngkai tao a kona tabemwaang ni buoka te tama ao te tina, ma bon tabeia kaaro bwa a na reiakinia natiia taekan te Atua ao aron te Atua n tangira te utu bwa e na waaki raoi.
A na kanga ngkanne kaaro n reiakinia natiia? Baikara aanga aika tao a na nakoraoi riki?