Iai ae E Boutokai Mwakuri ni Kabane Aika Buakaka?

“I IOBAI ma te Riaboro.” Aio ana taeka mataniwin te taanga ni buaka n Aia Botaki te Botannaomata i Rwanda, ni kaotiota kabwakani katokan tiringaia kaain te reeti n te aba anne n te 1994. E taekina ae kangai te mwaane temanna ngke e anga ana taeka i aon te tiritiri ae akea kabotauana n te tai anne: “Ngkana iai ae e kakewea ae iai Tatan, ao ke e kaitiboo ma ngai n te ruanimate ae mwaitikurikuri kaaina i Rwanda.” Te koaua bwa bon ana waaki raoi te Riaboro mwakuri aika kakamaaku aikai?

A aki iangoia angiia aomata bwa mwakuri n tiritiri ao n iowawa aika riao, bon ana waaki te anera ae buakaka ae aki nonoraki. A bati aomata aika a iangoia bwa a riki baikai man te buakaka ae rikiaia aomata ao bukin rikin te buakaka anne boni man te nano ni bangaomata. A kakoauaa tabeman bwa te botaki ae kaubwai ao ni korakora, ae kanga ai aron te reitaki ae raba ni katobibia te aonnaba, e kairiia aomata i nanon ririki aika bati bwa a aonga n tautaekana te aonnaba. Ni koauana, iai ake a bukina te tautaeka ao taani kairiri ibukin te bangaomata ao te rawawata ae a noria.

Tera ae ko kakoauaa? Bukin tera ngkai e a korakora rikiraken te buakaka, te iowawa, mwakuri aika kammaira ao te rawawata n te aonnaba ni bong aikai, n aki ongei kakorakora ibukini kauarerekeaia? Bukin tera ngkai a taraa ni kanenei aomata nakon te waaki ae a nang kamaunaia iai i bon irouia, ao ni katannakoi taningaia mani kauring aika okioki n taekinaki? Iai ae e boutokai mwakuri aikai ni kabane? Antai raoi ae e tautaekana te aonnaba? Ko kona ni mimi n te kaeka.