1 Te Atua Bon te Miterio e Koaua Anne?

Tao ko a tia n ongongo aei: “Bon te miterio ana mwakuri nako te Atua.”

E kabwarabwaraaki n te boki ae The Athanasian Creed taekan te Temanna n teniman are a aanga reirei i aona Aaro ake aongkoa Kristian ngaia aika bati ni boong aikai bwa, “e kangaanga te ota i aon taekan te Tama, te Nati ao te Taamnei ae Raoiroi.

Ana reirei te Baibara: E taku Iesu bwa a na karekea kakabwaiaaia akana a ‘ataa te Atua ae tii temanna ae koaua.’ (Ioane 17:3) Ma ti na kanga ni karekea ataakin te Atua, ngkana bon te miterio ngaia ae e aki kona ni kabwarabwaraaki? Ni koauana, e aki karabaa te Atua mairoura, ma e tangiriia aomata nako bwa a na kinaa.—Ieremia 31:34.

Ni koauana, ti aki kona n atai bwaai ni kabane ibukin te Atua. E riai ni kakoauaaki aei bwa a rietata riki ana iango ao aroarona nakoira.—Te Minita 3:11; Itaia 55:8, 9.

Buokam n ataan te koaua: Ngkana te miterio te Atua ae e aki kona ni kinaaki, bon te kabanetai ngkanne te kekeiaki ni karekea ataakina. Ma, e boni buokira te Atua bwa ti na kinaa ao ni karekea naba ara iraorao ae kaani ma ngaia. E taekina Aberaam te Atua bwa ‘raoraona’ ao e korea ae kangai Uean Iteraera ae Tawita: “E mena nanon Iehova ae raba irouia akana makua.”—Itaia 41:8 BK; Taian Areru 25:14, BG.

E kangaanga iroum kakoauaan ae ti kona ni karekei ara iraorao aika kaani ma te Atua? Tao e kona n riki anne, ma nora ae taekinaki ni Mwakuri 17:27: “E bon aki raroa [te Atua] mairoura n tatabemanira nako.” N te aro raa? E katauraoi baika ti kainnanoi te Atua n te Baibara bwa ti aonga ni kinaa raoi.a

E tuangira arana ae Iehova. (Itaia 42:8) E a tia ni korei taekan ana mwakuri ibukin te botannaomata bwa ti aonga n atai raoi aroarona. Ma ae kakawaki riki nakon anne, e kaotaraea naba ana namakin. E on n ‘te atataiaomata ao te akoi, e iremwe n un ao e bati te nanoanga ao te koaua irouna.’ (Te Otinako 34:6, BG) E kona n rotaki n aroarora. N te katoto, a “kamaraka nanona” te botannaomata ngkoa are Iteraera n aroia ni karitei nakoina, ma a kakimwareireia akana a wanawana n ongeaba irouna.—Taian Areru 78:40 BK; Taeka N Rabakau 27:11.

[Kabwarabwara ae nano]

[Kabwarabwaraan n iteraniba 4]

Ti na kanga ni kinaa raoi te Atua ngkana te miterio ae Temanna n teniman?

[Picture Credit Line n iteraniba 4]

The Trinity c.1500, Flemish School, (16th century)/H. Shickman Gallery, New York, USA/The Bridgeman Art Library International