E Katuuaaeira te Atua?
E taekina ae kangai te tia kairiri n te tautaeka temanna i Tiaban imwin rokon te mwaeiei iai ae 9.0 korakorana, ao te tsunami ni Maati 2011: “I taku bwa bon te tuuaa mairoun te Atua, ma I rangi n nanokawaki ibukia ake a rotakibuaka n te kabuanibwai.”
E taekinna te tia kanakorongorongo n te terewitin ae rangi ni kinaaki bwa mateia aomata aika e raka i aon 220, 000 mwaitiia n te mwaeiei are e orea Haiti n Tianuare 2010, bon ibukina bwa “a kakaraoi ana mwakuri te riaboro” ao a riai n “rairaki nakon te Atua.”
E taku te berebitero temanna ngke a mate aomata aika 79 mwaitiia n te ientaka ni biriaitua i aoni Manila i Biribin: “E kani kamarurunga mataniwin nanora te Atua aika mamaara ao n aki bwerengaki.” E taekinaki n aia nuutibeeba bwa “uabwi ma teuana te katebubua mwaitiia ikawai aika a kakoauaa bwa e kaota unna te Atua n ungunakoni maunga, angibuaka, ao ai kabuanibwai riki tabeua” aika okioki n orea te aba anne.
E TATANEIAI te aba ma te koaua are e karokoi kabuanibwai te Atua ibukini katuuaaeaia aomata aika buakaka. Imwini mateia aomata aika 60,000 tabun n te mwaeiei, n te urarake, ao n naao aika ririeta n te ririki 1755 are e orea Lisbon i Botukare, e a titiraki ni kangai te tia karioiango ae Voltaire ae rangi ni kinaaki: “A bati riki taani kakaraoa ae buakaka aika a noraki i aon Lisbon i Botukare nakon are i Paris ae te aba ni kaubwai?” Ni koauana, mirion ma mirion aomata aika mimi ngkana bon te Atua ae karokoi kabuanibwai aika karina ni katuuaaeia iai aomata. A taekinaki kabuanibwai akanne n aaba aika bati bwa bon ana mwakuri te Atua.
N iangoan baikai ni kabane, ti riai n titirakinira ni kangai: E koaua bwa te Atua ae karokoi kabuanibwai aika karina ni katuuaaeia iai aomata? E koaua bwa karawawata aika a rangi ni bati n taai aikai boni katuuaaeara mairoun te Atua?
A waekoa ni bukina te Atua bwa e karokoa te kamaunanakoaki rinanoni baike a riiriki, ibukin rongorongo ake a taekinaki n te Baibara. (Karikani Bwaai 7:17-22; 18:20; 19:24, 25; Warekaia Iteraera 16:31-35) Ma e kaotaki man neneran rongorongo ni kabane aika n te Baibara bwa iai bwaai ni kakoaua aika tenua ibukini kaokoroni koaua aikai. Te moanibwai, iai taiani kauring imwain rikia. Te kauoua, e bon rineia aika e na kamaunaia te Atua, tiaki n aroni kabuanibwai aika karina n riki ni boong aikai, ake a mate iai aomata aika raoiroi ao aika buakaka. Bon tii aomata aika buakaka ke ake a rawa ni butimwaei kauring aika a na kamaunaaki. Te katenua, e karekea te anga teuana te Atua are e na kamanoia iai aomata aika raoiroi.—Karikani Bwaai 7:1, 23; 19:15-17; Warekaia Iteraera 16:23-27.
Bon akea te bwai ni kakoaua bwa e kariki kabuanibwai aika mwaitikurikuri te Atua, ake a a bua iai maiuia aomata aika mirion ma mirion ni boong aikai. Tera ngkanne bukin rikirakeni kabuanibwai akanne? Ti na kanga ni kekeiaki ribuakoni baikanne? Ao iai te tai teuana ae a nang akea iai kabuanibwai? Ko na nori kaekaan titiraki aikai n te kaongora ae imwina.