Karekea Reireiam Man Ana Taeka te Atua

Tera ae na Riki Nakoia Botaki n Aro?

Iai titiraki n te kaongora aei ake ko bae n tia n tabeki, ao a kaotaki naba kaekaaia n am Baibara. A kukurei Ana Tia Kakoaua Iehova ni maroroakini kaekaaia ma ngkoe.

1. A bane n raoiroi botaki n Aro?

Ni koauana, iai aomata aika raoiroi nanoia ni botaki n Aro nako, ake a kani kakukureia te Atua. E noriia aomata akanne ao e tabeakinia. Ma e kananokawaki, bwa iai tabeman aika a karaoi mwakuri aika bubuaka ibukin aran te Atua. A a tia naba mataniwi n Aaro ni karawawataia taani kaaitaraia n te aro ae riao rimoa. (2 I-Korinto 4:​3, 4; 11:​13-​15) Ni boong aikai, a kaungai mwakuri n iowawa aika tiritiri mataniwi n Aaro tabeua, ke a boutokaa te buaka ke a irekereke ma mwakuri n tangako nakoia ataei.​—Wareka Mataio 24:​3-5, 11, 12.

A reireinaki aomata n te Baibara bwa iai uoua aekakin Aaro, bwa te Aro ae koaua ao te Aro ae kewe. E aki reireinia aomata te koaua ibukin te Atua te Aro ae kewe. Ma e ngae n anne, e tangiriia aomata Iehova bwa a na ataa te koaua ibukina.​—Wareka 1 Timoteo 2:​3-5.

2. Tera ae na riki nakoia botaki n Aro?

E aki tangiria te Atua bwa a na mwamwanaaki aomata irouia botaki n Aro, ake a taku bwa a tangiria ma a bon aki reirei te koaua ibukina. Ni koauana, a kan iraorao kaain Aaro akanne ma te aonnaba ae tautaekanaki iroun Tatan te Riaboro. (Iakobo 4:4; 1 Ioane 5:​19) E kabwarabwaraaki n Ana Taeka te Atua bwa a kakaonimaki Aaro nakon aia waaki n tautaeka aomata, kaanga ai aron te kabekaau, n oneani mwin are a na kakaonimaki nakon te Atua. E aranaki te kabekaau aei n te Baibara bwa “Baburon ae Kakannato,” bwa e ingoanaki n te kaawa rimoa are e moani waakinaki iai te Aro ae kewe imwin te Ieka are n ana tai Noa. E na kamaunai Aaro aika mwamwanaia ao ni karawawataia botannaomata te Atua n te tai ae waekoa.​—Wareka Te Kaotioti 17:​1, 2, 5, 17; 18:​8, 23, 24.

3. E na kanga ni karekea te kimwareirei te Atua nakoia kaain te aonnaba ni kabutaa?

Bon te rongorongo ae kakukurei motikan taekaia Aaro aika kewe n te tai ae e a kaan roko. E na reke iai te kabebeteaki man te karawawataaki ni kabutaa te aonnaba. A na aki manga mwamwanaia aomata Aaro aika kewe ao ni karekea te iraraure i marenaia botannaomata. A na bane aomata n te tai anne, ni katiteuanaaki n taromauria te Atua ae tii temanna ae koaua.​—Wareka Itaia 11:9; Te Kaotioti 18:​20, 21; 21:​3, 4.

4. Tera te bwai ae a riai ni karaoia aomata aika raoiroi nanoia?

E aki mwanuokinia aomata aika raoiroi nanoia Iehova, ake i buakoia Aaro aika kewe ni katobibia te aonnaba. E a tabe ngkai ni bobotiia aeka n aomata akanne, bwa a na katiteuanaaki rinanon reiakinaia te koaua.​—Wareka Mika 4:​2, 5.

E butimwaeia Iehova te koraki ake a kan toro irouna nakon ana botaki. E ngae ngkana a un iroura raoraora ao ara “utu” ni moanakin ara beku ibukin Iehova, ma e bati riki ae ti kona ni karekea. E a reke ara iraorao ma te Atua, ara utu ae boou ae a itangitangiri kaaina, ao kantaningaan te maiu n aki toki.​—Wareka Mareko 10:​29, 30; 2 I-Korinto 6:​17, 18.

Ibukin rongorongona riki, nora mwakoro 15 ao 16 n te boki Tera Ana Reirei ni Koaua Te Baibara?, aei ae boreetiaki irouia Ana Tia Kakoaua Iehova.

[Taamnei n iteraniba 26]

The Complete Encyclopedia of Illustration/J. G. Heck