Kaania Te Atua

“E Tekateka Temanna ae Iai ma Ngkoangkoa”

E TAEKINAKI ae kangai n te Baibara: “Akea te aomata ae e a tia n nora te Atua n te tai teuana.” (Ioane 1:18) E rangi ni mimitong taraakin te Atua n te aro are akea ana karikibwai ae te iriko ma te rara ae kona ni maiu ngkana e taraia. (Te Otinako 33:20) Ma n rongorongo tabeua ake a ribootinaki, e angania mwaane ake e rineiia Iehova te miitara ibukini karawa. Temanna mai buakoia bon te burabeti are Taniera. Akea te nanououa n te baere e noria bwa e kaonaki iai ao ngaira naba bwa ti na kaotiota te karinerine ae korakora. Nora aron Taniera ni kabwarabwaraa te baere e kakabwaiaaki iai n noran te miitara.a​—Wareka Taniera 7:​9, 10, BG.

“Temanna ae Iai ma Ngkoangkoa.” E kaotaki n atun te rongorongo aei “Temanna ae Iai ma Ngkoangkoa” are tii Taniera ae kamanena, bwa “e a rangi bati ana ririki te Atua (ke e a rangi n ikawai).” (Taniera 7:​9, 13, 22, BG) Tao ai rorora ngkai Iehova? Kioina ngkai bon “te Uea ae akea tokina” e a kaman riki ma ngkoangkoa ao e maiu n aki totoki. (1 Timoteo 1:17; Iuta 25) A karauaki nanora ngkai akea tiani wanawanan te Atua, bwa e taekinaki n te Baibara ae e irekereke wanawanana ma ana ririki ni maiu. (Iobi 12:12) Ni koauana, ngkai e tianaki ara atatai e na kangaanga otara n te iango are e maiu n aki totoki. Ma e koaua bwa ti riai ni kantaningaia bwa ti na ota raoi ni wanawanan te Atua ae akea kabotauana?​—I-Rom 11:​33, 34.

Noria bwa “e tekateka” Temanna ae Iai ma Ngkoangkoa. Bukin tera? A ibuobuoki kiibu akana i rarikina ni kaotii iango ake a kamanenaaki n te taeka ae “te kabowi” ao “te motiki-taeka.” (Taniera 7:​10, 22, 26, BK) Ngaia are n te miitara, e tekateka Iehova bwa te tia Moti. Antai ake e na motiki taekaia? Bon te natannaomata mai aon te aba ake a tei ibukia maan aika tiritiri ake a kaotaki mai mwaina n te miitara are e anganaki Taniera. (Taniera 7:​1-8) Te aeka n tia Moti raa Iehova?

“E mainaina kunnikaina n ai aron te tinoo, ao iran atuna ai aroni buraen te tiibu ae itiaki.” E tei te mainaina ibukin te raoiroi ao te itiaki. A kona ni mainaina buraeia tiibu tabeman. Mangaia are e na mainaina naba te irannatu ae ai aroni buraen te tiibu. Ko kona n iangoia bwa tera are e noria Taniera? Ko a nora te tia Moti ae mainaina irannatuna n aron te tino, ae e kunnikainna n te kunnikai ae mainaina? A karauaki nanora bwa a kaotaki ni kaikonaki aikai raoiroin ao wanawanan ana motikitaeka Iehova. Bon te tia Moti ae ti riai n rangi n onimakinna ao ni karinea.

“A bebeku tenga tenga i Rouna, ao a tei i matana terebu terebu.” Antai tabonibai aika i karawa aikai? E kaotaki n te Baibara bwa “ana tabonibai” te Atua bon anera. (Taian Areru 104:​4, BG) A mwaitikurikuri ana anera te Atua bwa tao mirion ma mirion mwaitiia ake a katabetabeia ni “kakoroa bukin ana taeka” ao “ni ira nanona.” (Taian Areru 103:​20, 21, BK) Tiaki anne te bwai ni kakoaua riki ibukini wanawanan te Atua ae akea tiana? Bon akea irarikin Iehova ae kona n teimatoa ni baireia taanga ni buaka aika mwaitikurikuri i karawa, ao n rangi n tabetabe ni mwakuri i nanon te tai ae rangi ni maan.

E karikirakeaki onimakinan Iehova ae Temanna ae Iai ma Ngkoangkoa n te miitara are e anganaki Taniera. A raraoi ana motikitaeka, ao e onimakinaki wanawanana. Bukin tera bwa ko aki reiakina arom ni kona ni kaaniaki riki ma te Atua ae moan te wanawana?

[Te Kabwarabwara mai nano]

[Te reirei ae kakawaki 32]

Bon te tia Moti ae ti riai n rangi n onimakinna ao ni karinea