Titiraki Aika Kaekaaki Man Te Baibara

A kona n ota aomata ni kanoan te Baibara?

Te Baibara bon ana Taeka te Atua. Titeboo ma ana reta te tama ae tatangira. (2 Timoteo 3:16) Inanon te Baibara ao e kabwarabwaraa te Atua arora ae ti na kakukureia iai, bukin aki katokan te buakaka ao te bwai ae na karaoia ibukia te botannaomata nakon taai aika imwaira. Ma a a tia taan angareirei man Aaro nako ni kabwaoua ana reirei te Baibara, ao n tokina a a bati aomata ake a taku bwa a bon aki kona n ota iai.​—Mwakuri 20:​29, 30.

E tangirira Iehova ae te Atua bwa ti na ataa te koaua ibukina. Ao ibukin anne, e anganira te boki ae ti na kona n ota ni kanoana.​—Wareka 1 Timoteo 2:​3, 4.

Ko na kanga n ota ni kanoan te Baibara?

Irarikin anganakira te Baibara, e anga naba te ibuobuoki Iehova bwa ti na ota iai. E kanakoa Iesu bwa e na reireinira. (Ruka 4:​16-21) A buokaki taan ongora iroun Iesu bwa a na ota ni kanoan te Baibara ni kabonganaani kiibu teuana imwin teuana.​—Wareka Ruka 24:​27, 32, 45.

E katea te ekaretia ni Kristian Iesu bwa a na waakinaanako te mwakuri are e moani waakinna. (Mataio 28:​19, 20) Ni boong aikai, a buokiia aomata taan rimwin Iesu ni koaua, bwa a na ota ni baike a reiakinaki man te Baibara ibukin te Atua. Ngkana ko kan ota ni kanoan te Baibara, a kukurei ni buokiko Ana Tia Kakoaua Iehova.​—Wareka Mwakuri 8:​30, 31.