TITIRAKI MAIROUIA TAANI WAREWARE
Antai “natin te Atua aika mwane” aika taekinaki ni Karikani Bwaai 6:2, 4, (BG) bwa a maiu imwain te Ieka?
E kakoauaaki bwa e kaineti anne nakoia natin te Atua aika mwaane aika anera. Ma tera ae kaotaki iai?
E warekaki ae kangai ni moani mwakoroni kiibu akanne: “Ao natin te Atua aika mwane a noria natiia aomata aika aine ba a raraoi taraaia; ao a karekeia buia mai buakoia nakekei ni kabaneia ake a rineiia.”—Karikani Bwaai 6:2, BG.
A a oti taeka aika “natin te Atua aika mwane” ao “natin te Atua” n te Koroboki ae Tabu n te Taetae n Ebera ni Karikani Bwaai 6:2, 4, (BG); Iobi 1:6; 2:1; 38:7, (BG) ao Taian Areru 89:6, (NW). Tera ae kaotaki ni kiibu aikai ibukia “natin te Atua”?
E kateretereaki n te kibu are ti warekia n Iobi 1:6, (BG) bwa “natin te Atua” bon anera aika a botaki i matan te Atua. E boni mena i buakoia Tatan are e “nako man te tiotio nako i aonaba.” (Iobi 1:7; 2:1, 2, BG) Tii te arona naba ma are ti warekia n Iobi 38:4-7, ae taekaia “natin te Atua” aika “takaakaa ni kakatonga” ngke e ‘kawenea atibuni maninganingan’ te aonnaba te Atua. A boni bae ni karikaki natin te Atua aika anera aikai ngke a tuai ni karikaki aomata. “Natin te Atua” ake a taekinaki n Taian Areru 89:6, (NW) bon taekaia anera ake raon te Atua i karawa ma tiaki aomata.
Antai ngkanne “natin te Atua aika mwaane” ake a taekinaki n te rongorongo ae ni Karikani Bwaai 6:2, 4, (BG)? Ni kaineti ma koaua man te Baibara ake mai mwaina, e eti iangoan ae te rongorongo anne bon taekaia natin te Atua aika anera ake a roko i aon te aba.
A noria tabeman bwa e kangaanga kakoauaan ae a kani wene n taanga anera. E kaotaki n ana taeka Iesu ni Mataio 22:30, bwa akea te mare ao te wene n taanga i karawa. Ma e ngae n anne, iai te tai teuana are a a manga karin rabwataia n aomata anera ao n amwarake ma ni moi naba ma aomata. (Karikani Bwaai 18:1-8; 19:1-3) Ngaia are e eti iangoan ae a kona ni wene ni bure ma aine n rabwataia anne.
Iai bukina n te Baibara ae kakoauaaki iai bwa a karaoa anne anera tabeman. E kabotauaki n Iuta 6, 7 aia bure kaain Totom ake a katoki nanoia ni kaibwabwaru ma “anera ake a kakeaa mwiokoaia ngkoa ma ni kitana oini mwengaia ae riai.” Titeboo anera ao kaain Totom, bwa a uaia ni “kabatiaa naba te wene ni bure ao ni katoki nanoia ni kaibwabwaru.” Ai tii te arona naba anne ma te rongorongo ae n 1 Betero 3:19, 20 ae kaineti ma anera ake a aki ongeaba “n ana bong Noa.” (2 Betero 2:4, 5) Ibukin anne, e a kona ni kabotauaki aia bure kaain Totom ma Komora ma aia mwakuri n aki ongeaba anera ake n ana bong Noa.
E eti te iango are “natin te Atua aika mwane” ake a mwaneweaki taekaia ni Karikani Bwaai 6:2, 4, (BG) bon anera ake a karini rabwataia n aomata ao ni wene ni bure ma aine.
E taekinaki n te Baibara bwa e “tataekina te rongorongo [Iesu] nakoia taamnei ake a karabuutinaki.” (1 Betero 3:19) Tera ae nanonaki n aei?
E taekinna te abotoro Betero bwa anera aikai bon te koraki ake “a aki ongeaba ngkoa ngke e taotaona nanona te Atua n tataninga, n ana bong Noa.” (1 Betero 3:20) E teretere bwa Betero e bon taekinia anera ake a motinnanoia bwa a na raona Tatan ni karitei. E taekinia anera Iuta “ake a kakeaa mwiokoaia ngkoa ma ni kitana oini mwengaia ae riai,” bwa ‘e kabaeia te Atua n taian taurekereke n aki toki n te rotongitong imwaini kakororaoan are motikaki ibukia, n te bong are kakannato.’—Iuta 6.
A karitei n te aro raa anera ake n ana bong Noa? Imwain te Ieka, a karin rabwataia n aomata anera aika buakaka aikai, ae te bwai ae tiaki katauaia mairoun te Atua. (Karikani Bwaai 6:2, 4) Irarikin anne, a wene ni bure anera ake a karin rabwataia n aomata ma aine, ao a a boni karaoa iai te bwai ae a aki katauaki nako iai. E aki karikia anera te Atua bwa a na wene n taanga ma aine. (Karikani Bwaai 5:2) A na boni kamaunaaki anera aika buakaka ao ni karitei aikai n ana tai te Atua are e a tia n namatia. Ma ngkai moa, n aron are e koreia Iuta, a a mena n te “rotongitong” ae te karabuuti n te aro n taamnei ao ni kabaeaki.
N ningai ao n te aro raa are e tataekina iai te rongorongo Iesu nakoia “taamnei ake a karabuutinaki”? E koreia Betero bwa e riki aei imwini manga ‘kamaiuakin Iesu nakon te rabwata n taamnei.’ (1 Betero 3:18, 19) Noria naba bwa e taekinna Betero are e a tia Iesu n “tataekina te rongorongo.” E bon taetae Betero ni kamanenaan taeka ake e kaotaki iai te bwai ae e a tia n riki ae nanona bwa e tataekinaki te rongorongo imwaini korean ana moan reta. E taraa ngkanne n ae tabeua te tai imwini kautan Iesu, ao e nako ni katanoata nakoia anera ake a buakaka ibukini katuuaaeaia are e bon riai n roko i aoia. Bon tiaki tataekinan te rongorongo are e na reke iai aia kantaninga ma boni motikan taekaia. (Iona 1:1, 2) Ngke e a tia Iesu ni kaotiota ana onimaki ao kakaonimakina ni koaua ni karokoa matena ao ni manga kautaki, e a kaotia iai bwa e bon aki kona n tokanikai i aona te Riaboro. Ao e a noraki bwa e bon riai Iesu ni katanoataa kabuakakaaia.—Ioane 14:30; 16:8-11.
N taai aika imwaira, a na kabaeaki ao ni karenakoaki Tatan ao anera akanne nako nanon te kinono iroun Iesu. (Ruka 8:30, 31; Te Kaotioti 20:1-3) Mangkai ni karokoa te tai anne, a a mena anera aika karitei aikai n te tabo teuana ae rotongitong n te aro n taamnei ao a na boni kamaunaaki.—Te Kaotioti 20:7-10.