Ko Kona n Onimakini Aaro Aika Irekereke ma te Buaka?

E riki bwa te tautia Alberto n te maan ae kaania tebwina te ririki. E ururing ni kangai: “E kakabwaiaira ara mitinare man taku: ‘E memena iroumi te Atua.’ Ma I iango ni kangai: ‘N nangi nako n tiriaomata ma e taekinaki n te Baibara bwa “ko na tai tiriaomata.”’”

Bon te tautia ngkoa n te manuao Ray n te Kauoua ni Buaka Are Kabutaa Aonnaba. N te taina, e titirakina te mitinare ni kangai: “Ko nakomai bwa ko na tataro i aon te kaibuke ibukia tautia ao ibukin te tokanikai. A aki naba karaoa anne naake ti na kaaitaraia?” E kaekaa te mitinare bwa e karaoi mwakuri te Uea n aanga aika kamimi.

Ngkana e aki rau nanom n te kaeka anne, bon tiaki tii ngkoe n iangoa anne.

TERA ANA REIREI TE BAIBARA?

E taekina ana tua te Atua teuana Iesu ae te kabanea ni kakawaki bwa “ko riai n tangira raom n aomata n aron tangiram i bon iroum.” (Mareko 12:31) E tiana tangiraia raora n aomata Iesu ni kaineti ma aia tabo ni maeka ke tao aia reeti? E bon aki. E taku nakoia taan rimwina: “Ane a na ataingkami aomata ni kabane bwa bon taan rimwiu ngkami, n aei: ngkana kam itangitangiri.” (Ioane 13:34, 35) E na rangi n rianako aia tangira i marenaia bwa anne raoi kanikinaeaia. A aki tiriaomata Kristian ma a kukurei n anga maiuia ibukia aomata.

A kaboraoa maiuia Kristian rimoa ma ana taeka Iesu. E kabwarabwaraaki n te boki ae The Encyclopedia of Religion ni kangai: “A kakoauaa taama n te Aro rimoa n ikotaki naba ma Tertullian ao Origen bwa a tabuaki Kristian n anaa maiun temanna, ae te kaetieti are e tukiia mani kaainakin te taanga ni buaka n Rom.”

A KANGA ANA TIA KAKOAUA IEHOVA NI KAKOROAOA AEI?

Kioina ngkai a a kani buta n angiin aaba nako Ana Tia Kakoaua Iehova, a namakinna aomata ake i buakoia bwa a mena n itera aika uoua ni kaineti ma itabarara i marenaia natannaomata. Ma e ngae n anne, a boni kakorakoraia ni kaotiota kanikinaean te tangira.

N te katoto, a teimatoa n tei i nuka Ana Tia Kakoaua Iehova n te bobuaka are e riki i marenaia baronga aika taian Hutu ma Tutsi i aon Rwanda n 1994. N angiin te tai, a karuanikaia maiuia taani Kakoaua man te baronga teuana ni kamanoia tariia ake n te baronga are teuana. E taku te tautia ae te Hutu Interahamwe ngke e kuneia taani Kakoaua aika uoman aika taian Hutu ni kamanoia taaria aika taian Tutsi: “Kam bon riai ni mate bwa kam buokiia taian Tutsi ni birinako.” E kananokawaki bwa a bon tiringaki taani Kakoaua aika taian Hutu aikai.—Ioane 15:13.

Tera am iango: A boraoi aia mwakuri Ana Tia Kakoaua Iehova ma ana taeka Iesu ni kaineti ma te tangira are te anga boni ngkoe?