TITIRAKI AIKA KAEKAAK MAN TE BAIBARA

E kona n reke te maiu n aki toki?

E maiu te moan aomata are Atam i nanon tienture aika bati. Ma teutana imwin teutana, e a rikirake ni kara ao ni mate. Ni moa man te tai anne, a a tia aomata ni kataia n ukeri aanga ibukin totokoan te kara. Ma bon akea ae kona ni birinako man te mate. Bukin tera? E rikirake ni kara ao ni mate Atam ibukin ana bure are e aki ongeaba iroun te Atua. Ti rikirake naba ni kara man rikiara mairoun Atam ae te bure ao te tuuaa iai bon te mate.—Wareka Karikani Bwaai; I-Rom 5:12.

Ngkana ti kani karekea te maiu n aki toki, ti kainnanoa temanna bwa e na kabwakaa te karea ni kaboomwi ibukira. (Iobi 33:24, 25) Te kaboomwi bon te boo ae kabwakaaki ibukini kainaomataakin temanna ao ti kainnanoa naba kainaomataakira man te mate. (Te Otinako 21:29, 30) E kabwakaa boona Iesu ni matena ibukira.—Wareka Ioane 3:16.

Ti na kanga ni karekea te maiu n aki toki?

A na aki bane aomata ni kainaomataaki man te aoraki ao te kara. Ni koauana, a na boni kabuaa te kakabwaia ae te maiu aomata ake a aki ongeaba iroun te Atua n aron Atam. Bon tii naake a kabwaraaki aia bure aika a na karekea te maiu n aki toki.—Wareka Itaia 33:24; 35: 3-6.

Ti riai ni mwakuria kamaiuara ngkana ti tangiria bwa a na kabwaraaki ara bure. Ti riai ni kinaa raoi te Atua rinanon te ukeuke n reirei n ana Taeka ae te Baibara. Ti reireiaki arora ae e na reke iai maiura ae raoiroi riki, karekean naba akoara iroun te Atua ao te maiu n aki toki.—Wareka Ioane 17:3; Mwakuri 3:19.