“Nori Taamneina!”

Iraua am tai n atonga te taeka anne bon nakoim ke nakoia tabemwaang ngkana ko wareka te kaongora ae boou n te maekatin aei? Iai bukini katauraoan taamnei aika kantara aikai ao ni barongaaki raoi. Boni bwaai n reirei aika a kammwakura ara iango are ti kona n namakina iai te kukurei. A kona n ibuobuoki riki n ara tai ni katauraoi ao n anga ara kaeka n te Reirei n Te Taua-n-Tantani.

N te katoto, karekea am tai teutana n iangoia bwa e aera ngkai e rineaki te moan taamnei ibukini kaongora akanne ni kabane. Tera ae kabwarabwaraaki iai? Tera irekerekena ma atun te kaongora ke te boto n iango man te kibu ae aana te kaongora anne? Iaiangoi aron irekereken taamnei akanne ni kabane ma te reirei ae rinanoaki ao nakoni maium naba.

E kona naba te tia kaira te Reirei ibukin Te Taua-n-Tantani ni karekea aia tai kaain te ekaretia bwa a na anga aia taeka i aon taamnei akanne, tera irekerekena ma te reirei ae rinanoaki ke aron rotakia n te taamnei anne. N tabetai, iai kabwarabwaraan te taamnei are katauraoaki ae irekereke ma te barakirabe teuana. N taamnei ake tabeua riki, e kona te tia kaira te reirei ni bairea maroroakinani barakirabe ake a kaineti riki ma taamnei akanne. Ni karaoan aei, a na bane ni karekei kakabwaiaaia aika bati man te bwai ae karaoaki ibukini buokan te aomata ae wareware bwa e na kataamnei n ana iango taian reirei man Ana Taeka te Atua.

E taekinna te tari te mwaane temanna n aron aei: “Imwini warekan te kaongora ae koreaki n te aro ae rangi n tamaroa, e taraa n ae e a karakaaki riki tamaroana n taian taamnei.”