Maretha du Raan E ‘Uouotii Uotau n te Bong ae Koraki’ Iehova
E ngae ngke n taai tabetai I taonaki n te rawawata n te aro I aki kantaningaia n aaro aika bati ibukin aorakin rabwatau ae kakaiaki, ma I namakina ana tangira ma ana boutoka Tamara are i karawa ni maiu ni kabane. Ao I namakina naba te kimwareirei ae okoro ngke I beku bwa te bwaiania ibukin Iehova n te maan ae raka i aon 20 te ririki.
I bungiaki n 1956 ma te aoraki ae kakaiaki ae te spina bifida. Ibukin aorakin riin nukau ae kakaiaki anne, e a kangaanga iai nakonakou ao e karikii naba aorakiu aika kakaiaki tabeua riki.
Tabeua te tai imwaini bungiakiu ao a moana aia reirei n te Baibara au karo ma taanga ni mitinare aika Ana Tia Kakoaua Iehova. Ngke I uarereke, bon tii tabeman taan uarongorongo ake a maeka n aia auti aika uamaenako n au kaawa ae Usakos i Namibia. Kioina ngkai akea te ekaretia n te tai anne, ti rinanoi kanoan te kaetieti ibukini bobotaki n ara utu. Ngke ai itua au ririki, I a rinanon te korokoro ae te urostomy ike e a karaoaki iai te bwangabwanga teuana n rabwatau are N na kona ni mim mai iai. Ngke ai 14 au ririki, I a katikitiki. I a aki kona ni kabanea au reirei ibukina bwa te kuura ae rietata ae te kabanea ni kaan ma ngaira, e bon rangi n raroa nako naba ao I kainnanoa tararuaakiu ae okoro irouia au karo.
Ma e ngae n anne, I iangoia bwa N nang kakorakoraa au iraorao ma Iehova. A bon tuai ngkanne n tauraoi ara boki ni Kristian aika bati aika aanaki man te Baibara n te taetae n Afrikaan are I ikawai iai. Ai ngaia are I a reiakina te taetae n Ingiriti bwa I aonga ni kona n ukeuke n reirei n ara boki aika bati. I riki bwa te tia uarongorongoa te Tautaeka n Uea ao ni bwabetitoaki ngke ai 19 au ririki. Inanon ririki aika aua ake imwina, I a taonaki n aoraki riki tabeua aika bati ao kangaanga ake e a rotaki iai au iango. Irarikin anne, n au kaawa are a rangi ni kaan iai aia itoman i marenaia aomata, e a tukaki ingaingau n uataboa te mwakuri ni minita ibukini maakakia.
Ngke ai tibwa 20 tabun au ririki, ti a mwaing mai Namibia n nako Aberika Maiaki, ao ai bon au moantai anne ni kona ni bobotaki ma kaain te ekaretia. Ai boni kakukureira anne! Ma e ngae n anne, I bon riai n rinanon te korokoro riki teuana, ma n te tai aei ai bon te colostomy ae karaoan te bwangabwanga are N na nakotinaniku iai.
Tabeua te tai imwin anne, I a ongora te reirei ibukin te bwaiania n ana kabwarabwara te mataniwi n te aono ae uarereke. E bon ringaki nanou n ana kabwarabwara. I ataia bwa e karako marurungiu ao e na kangaanga irou te bwaiania, ma I a bon tia n nora aron Iehova n uouotii uotau rinanon au kangaanga aika bati. Ai ngaia are I a kororeta bwa I kan regular bwaiania. Ma ibukini mamaaran rabwatau, a baenikai unimwaane n te ekaretia ni butimwaea au bubutii.
Ma e ngae n anne, I a iangoia bwa N na karaoa au kabanea ni kona n uarongorongoa te Tautaeka n Uea. I a kona n uarongorongo n aron ana aoa te bwaiania n te maan ae raka i aon onoua te namwakaina man ana ibuobuoki tinau ao tabeman riki. E kaotaki man anne nanou ae korakora ni kani bwaiania ao e oti naba iai bwa I boni kona ni karaoa anne n aki ongea mamaaran rabwatau. I a manga kororeta riki, ma n te tai aei e a butimwaeaki au bubutii. N Tebetembwa 1, 1988, I a riki bwa te regular bwaiania.
Ngkai I a bwaiania, I bon namakina ana boutoka Iehova n taai nako. N oneani mwin ae N na kaatuua au iango n aorakiu, I a kamanoaki n reiakinaia aika boou te koaua ao ao ni buokaki iai bwa N na kakorakoraa riki au iraorao ma Iehova. I a rangi ni kukurei ni buokiia aomata aika bati bwa a na katabui maiuia ao ni bwabetitoaki.
I teimatoa naba n nanououa ni marurungin rabwatau. Ma e bon ‘uouotii uotau n te bong ae koraki’ Iehova. (Taian Areru 68:19, BG) E karaoa ae bati riki nakon are N na nanomwaaka ni maiu ao I riai n rangi ni kakaitaua ngkai I maiu!