Ti Kanga n Roko Ikai?

E kabwarabwaraaki moan rikin te iuniweeti ni moani bokin te Baibara ae Karikani Bwaai n taeka aika tii tabeua ni kangai: “Ngke a tuai ni karikaki bwaai, ao E karika karawa ma aonaba te Atua.” (Karikani Bwaai 1:​1, BG) Imwini karikan aroka ma maan iroun te Atua, e a karikiia moan aomata aika Atam ma Ewa. A boni kaokoro naakai ma maan ibukina bwa iai aroaron te Atua aika bati irouia n ikotaki naba ma te inaomata n rinea ae a na karaoia. Mangaia are a na boni kaekaa bukinaia ni baika a karaoi. Ngke arona bwa a ongeaba nakon ana kaetieti te Atua, a na kona ni kakororaoa ana kantaninga te Atua ae a na riki bwa aia moani karo aomata ni kabane ao a na karekea te maiu ae rau ma ni kororaoi i aon te aba n aki toki.

Ma iai te anera temanna are e kamanena ana tai ni kairiia aomata bwa a na karaoa are e bon tangiria. Ai ngaia are e a riki iai bwa Tatan, ae nanona “te tia Kakaaitara.” E mwamwanaaki Ewa iroun Tatan ngke e taetae rinanon te naeta ao n tuangnga bwa e na wanawana riki ngkana e aki kairiraki iroun te Atua. A iraraang Atam ao Ewa n ana taeka Tatan ike a a urua iai aia itoman ma te tia Karaoiia. Ibukin aia motinnano ae buakaka ara moani karo, a a kabuaa ngkanne te maiu ae akea tokina ao ti a ituaki ngaira ni kabane n te bure, te aki kororaoi ao ai te mate ae aki kona n totokoaki.

Ni bon te tai naba anne, e taekina ana kantaninga te Atua are e na kaeta te bwai ae kananokawaki aei ao ni kaota te kawai ibukin reken te maiu n aki toki nakoia kanoan Atam. E taetae ni burabetinna te Atua bwa e na boni kamaunaaki Tatan ma karawawata ni kabane ake a karikii Atam ao Ewa iroun te “kariki” ae te aomata ae okoro. (Karikani Bwaai 3:​15, BG) Antai ae na riki bwa te “kariki” anne? E na bon oti ni waakinakon te tai.

Imwin te tai ae aki maan, e kataia n taai nako Tatan ni kaitaraa ana kantaninga ae raoiroi te Atua. E waekoa ni butanako te bure ao te buakaka. E motikia te Atua bwa e na kamauna te buakaka n te ieka. E anga ana kaetieti nakon te aomata ae raoiroi are Noa bwa e na kabaa te aake, ae te bwaoki ae totoakaei ae bebeibeti ibukini kamaiuana ma ana utu, n ikotaki naba ma maan ake e tuangaki bwa e na karin n te aake.

Teuana te ririki imwini moanakin te Ieka ao a a otinako man te aake nakon te aonnaba ae itiaki Noa ma ana utu. Ma e bon tuai naba ni kaoti te “kariki.”

​—E boto aei i aoni Karikani Bwaai mwakoro 1-11; Iuta 6, 14, 15; Te Kaotioti 12:9.