E Riki Ana Beku Ibukin te Atua Bwa Ana Bwainnaoraki!
Ngke a karinaki bwaiania aika uoman n te auti teuana i aoni Kenya, ao a boni mimi ngke a a nora te mwaane ae uarereke rabwatana ni wene i aon te kainiwene. E rangi n uarereke ikana ao a kororo baina. Ngke a taekina ana berita te Atua nakoina are “e na ewewe iai te mauku n ai aron te ria,” ao e bon rotaki n te aro are e a moangare iai.—Itaia 35:6, BG.
A a ataia bwaiania akanne bwa e nang koro ngkai 40 ana ririki Onesmus, ao e bungiaki ma te aoraki ae te osteogenesis imperfecta ke aorakin te ri ae kakai mwaoto. A rangi ni kai mwaoto riina n te aro are a kona ni mwaoto ngkana a taonaki n te bwai ae e aki tinebu. Kioina ngkai e aki kona ni katokaki aorakina ke akea te bwainnaoraki ae korakora iai, e a kantaningaia Onesmus bwa e na maraki ni karokoa tokini maiuna ao bon iriana ana kaa are kokokaki iai.
E boni butimwaea te reirei man te Baibara Onesmus. Ma e ribaia tinana ni kaei bobotaki ni Kristian n iangoan ae tao e na kona n ikoaki ao ni kauaataoaki riki marakina. Ngaia are a rawei kanoani bobotaki taari ao e ongoraei Onesmus ni mwengana. Imwin nimaua te namwakaina n reirei, e a iangoia Onesmus bwa e kani kaei bobotaki n aki ongei karuanikai ake a na riki nakoina.
E koaua bwa a kauaataoaki riki marakin Onesmus ni bobotaki ni Kristian? Boni kaitaraan raoi anne te bwai ae riki. E ururing ni kangai: “E taraa ni kekerikaaki marakiu are okioki n taiani bobotaki.” E iangoia bwa e namakina riki te marurung man ana kantaninga ae boou. E nora te bitaki tinan Onesmus n aroarona ao e a rangi ni kukurei ni butimwaea te reirei n te Baibara. E a kona ni kangai: “E riki ana beku natiu ibukin te Atua bwa ana bwainnaoraki.”
Imwin te tai ae aki rangi ni maan, e a riki Onesmus bwa te tia uarongorongo ae tuai bwabetitoaki. Imwin tabeua te tai, e boni bwabetitoaki ao e a riki ngkai bwa te tabonibai n te ekaretia. E ngae ngke e aki kona ni kamanenai rangana ao baina teaina Onesmus, ma e korakora irouna kani karaoan ana kabanea ni kona ni beku ibukin Iehova. E kan auxiliary bwaiania ma e tabwarabwara ni karina ana bubutii. Bukin tera? Ibukina bwa e ataia bwa e na bae ni kainnanoa temanna bwa e na kokokia n ana kaa. Ngke e kaota tabeaiangana nakoia raona ni Kristian, a boni berita nakoina bwa a na boutokaia. A boni karaoa anne, ao a a buoka Onesmus n auxiliary bwaiania.
E a manga tabeaianga naba Onesmus ngke e kan regular bwaiania. Ma n te taina, e a karekea te kaungaunga ae kainnanoia n te kibu ibukin te bong. Te kibu anne bon Taian Areru 34:8 (BG) ae kangai: “Kam na kata Iehova ma n noria ba E raoiroi.” Imwini kananoan ana iango Onesmus n te kibu anne, e a motinnanoia bwa e na riki bwa te regular bwaiania. E uauarongorongo ngkai abong n te wiki ao iai aomata tabeman aika e rereirei ma ngaiia n te Baibara aika rikirake ni bwaai n taamnei. E boni kaea te Kuura Ibukin te Mwakuri ni Bwaiania n 2010. Ai kimwareireira Onesmus bwa te tia kaira te kuura anne bon temanna mai buakoia taari mwaane ake uoman ake a moani kawaria!
A a bon tia ni mate ana karo Onesmus, ma a tabeakina kainnanona ni katoabong taari n te ekaretia. E rangi ni kakaitau ibukini kakabwaia ni kabane ake e karekei ngkai, ao e ingainga nanona nakon te bong are e nang taekinaki iai ae kangai “ane maeka iai e na aki kangai, I aoraki.”—Itaia 33:24, BG.