Te Birim Ibukin te Onimaki ae ai 100 te Ririki Maanna

E KANIKINAEAKI te ririki aei bwa kanuringan te ka-100 n ririki ibukini moani kaotan te “Photo-Drama of Creation” ae te taamnei ae karaoaki ibukini kakorakoraan onimakinan te Baibara bwa bon Ana Taeka te Atua. E boutokaaki Iehova bwa bon te tia Karikiriki n te “Photo-Drama,” n taai ake e kakoauaaki iai rikini bwaai i bon irouia, korakoran te kabuakaka ao te nanououa ae uruana aia onimaki aomata aika bati.

E aki toki Charles T. Russell are e kairiri i buakoia Taan Reirei n te Baibara n ukeri aanga aika rangi n uaana, ao ni baitii iai kabutanakoani koaua man te Baibara. A a kamani kamanenai ara boki aika rangi n anainano Taan Reirei n te Baibara i nanon tenibwi tabun te ririki. Ma ngkai, a atikaki riki nanoia n te anga ae boou ae taiani birim.

KABUTANAKOAN TE EUANGKERIO RINANONI BIRIM

A moani karaoaki taamnei aika akea katangitangia ao bwanaaia ibukia aomata n 1890. E kaotaki birimin te Aro n aia umwantabu kaain te Aro ae te Baptist i New York City ni moa man 1903. Ma e a tibwa waakinaki te tabo ni karao birim n 1912 ngke e ninikoria Russell ni moana katauraoan te “Photo-Drama.” E a ataia bwa e kona te anga n itoman anne ni kaotii riki koaua man te Baibara nakon are tii mani booki aika boreetiaki.

E aki toki ni kaotaki te “Photo-Drama” ae wanua te aoa maanna n aua mwakorona, ao ni katuruturuaki iai 96 kabwarabwara aika kimototo aika raweaki ma n taekinaki iroun te tia taetae ae rangi n ataaki ae moan te tamaroa bwanaana n te raweaki. A raonaki mwakorokoroni birim aika bati akanne ni katangitang aika tonuraoi. A katangaki bwanaa ao katangitang n taiani kuramaboon irouia taan rawerawe aika mwaatai, a kaboraoi katangitang ma taamnei aika kara ao n aki kakammwakuri ao a a manga karaoi birim aika kaineti ma karaki man te Baibara aika rangi n ataaki.

A roko angiini baika a kaotaki ni birim ao taamnei i aoni kiraati aika bati aika aki kakammwakuri mani bitineti ake a karaoi birim. A a tia taani korobanna aika rabakau i aoni Biraterebia, New York, Paris, ao London ni korei taamnei teuana imwin teuana i aoni kiraati ao birim. A karaoi naba korobanna aika rangi ni bati te tiim ni mwakuri man te Ruu ni Korotaamnei n te Betaera ao a aki toki naba n onei mwin taamnei aika aki kakammwakuri ake a uruaki. Irarikini kaboonakoani birim, a karaoi birim kaain te utu ni Betaera n uakaan ma Yonkers, i New York rinanoni kaotioti ngke a a riki bwa Aberaam, Itaaka ao te anera are e tuka Aberaam mani kareanakin natina.​—Karikani Bwaai 22:​9-12.

E taekinna raon Brother Russell ni mwakuri n te nuutibeeba bwa man te anga n itoman aei, a na “kan ongora aomata aika nga ma nga man te Baibara nakon are e [a tia] kakaraoaki ngkoa ibukini karikirakeaia Aaro.” A na kamoamoaa te anga ae boou anne mataniwi n Aaro bwa a kanuaaki iai aomata aika rangi ni bati aika bwatakataka ni bwaai n taamnei? Ni kaitaraan anne, a bane ni kabuakakaa te “Photo-Drama” mataniwi n Aaro ake aongkoa Kristian ngaiia ao tabeman a boni mwamwanaia ke n ninikoria ni karaoi aia aanga n tukiia aomata mani matakuakinana. E koreaki te iti n te botaki teuana ae tei ibukia mataniwi n Aaro, n te tabo teuana ae boo iai te taamnei.

Ma e ngae n anne, a boni kaon taabo n taamnei aomata ibukini matakuakinan te “Photo-Drama” n akea te kanrin. N te United States ao e katoabong ni kaotaki te “Photo-Drama” ni kaawa aika 80 mwaitiia. A bati aomata aika mimi ni moan noran ‘te taamnei ae taetae.’ A boni matakuakina te man ae otinako mani bunnimoana ao te uee ni moan raurena rinanon te rawetaamnei ae bon tau maanna. E katuruturuaki wanawanan Iehova ae moan te rietata n rongorongon te rabakau n aonnaba ni boong akanne. N aron ae e taekinaki mai moana, noran Brother Russell ni kabwarabwaraa te “Photo-Drama” i nanon te birim, e a iangoia te tia mataku temanna bwa taraan te tia taetae “titeboo ma ai boni Brother Russell ngkana e kabotauaki ma are ko a bon noria!”

TE MWANEKA AE KAKAWAKI N TE ANGAREIREI MAN TE BAIBARA

E kabwarabwaraa te tia kororongorongo ao te tia rawei birim rimoa ae Tim Dirks bwa te “Photo-Drama” bon “te moani karaki ae rangi ni kakawaki are a botaki ao ni kaboraoaki iai bwanaa (aika taetaenikawai aika raweaki), te birim ae kakammwakuri ao tauraia aika rangi ni kanikani karaia. A kamanenaaki waaki tabeua aikai ni birim ake imwain te “Photo-Drama,” ma tiaki ni kabane n taini kaotana teuana, ma e karaoaki riki nakon te birim ae e anaaki ana boto n iango man te Baibara. Ao akea mai buakoni birim akanne ae roko mwaitiia taani mataku iai n te ware ae tao ruaiwa te mirion i Amerika Meang, Eurobe, Aotiteria ao Nutiran n te moan ririki are a kaotaki iai!

E moani kaotaki te “Photo-Drama” n Tianuare 11, 1914, i New York City. Itua te namwakaina imwin anne, e a roko te kabuanibwai ae karina are e ataaki imwina bwa te Moan Buaka Are Kabutaa Aonnaba. Ma a teimatoa aomata aika uanao ni katobibia te aonnaba ni bobotaki bwa a na matakuakina te “Photo-Drama,” ao ni karekea kabebetean nanoia mani mwakorokoron taamnei aika kakukurei ibukini kakabwaia aika a na reke man te Tautaeka n Uea. Bon akea kabotauani kamimin te birim ae te “Photo-Drama” ni kaotakina n 1914.