Akea ae Kona ni Beku Irouia Tooka Aika Uoman

“Akea ae kona n toro irouia tooka aika uoman . . . Kam aki kona ni kaai n toro iroun te Atua ao te Kaubwai.”—MATAIO 6:24.

1-3. (a) Baikara kangaanga n te karekemwane ake a kaaitara ma ngaai aomata aika bati ni boong aikai, ao a kanga tabemwaang ni kataia ni kanakoraoi? (Nora te taamnei ni moan te kaongora aei.) (b) Baikara raraomaia kaaro aika ueke ni kaineti ma kaikawaaia natiia?

E KABWARABWARAA ni kangai Marilyn:a “E a boni kukua naba ni katoabong buu ae James man okina ni mwakuri, ma e bon tau ana bwakabwai ibukini baika ti kainnanoi ni katoabong. I tangiria ni kabebetea uotana ao ni buokia ni karekei baika raraoi tabeua ake a karekei naba raon natira te mwaane ae Jimmy n reirei.” E tangiria naba Marilyn ni buoka ana utu ae mwangaanga nako ao ni kaiko ibukin taai aika a na roko. A bati raoraona aika a a tia ni mwaing nakon aaba tabeua ibukini karekean aia mwane ae bati riki. Ma ngke e a iangoia bwa e nangi mwaing nako, e a aki koaua raoi bwa tera ae e riai ni karaoia. Bukin tera?

² E raraomaeakina kitanan ana utu are e tangiria Marilyn ao aia kaetieti ibukini maiuakinan te onimaki ni katoatai. Ma e iangoia neiei bwa a a tia ni mwananga tabemwaang nako tinaniku ibukin tabeua te tai ao a taraa n teimatoa n te onimaki aia utu. Ma e raraomaeakina arona ni kaikawaa Jimmy man te tabo ae raroanako. E kona n nakoraoi kaikawaan natina “i nanon ana reirei ni kaetieti Iehova, ao [ni] kaboraoi aia iango ma ana iango” i aon te Internet?—I-Ebeto 6:4.

³ E ukoukora te kairiri Marilyn. E aki tangiraki irouni buuna bwa e na nako, ma e taekinna teuaei bwa e aki kataia n totokoa nakona. A kauringnga unimwaane n te ekaretia ao tabemwaang bwa e na aki mwaing nako, ma a kaumakia taari aine tabeman bwa e na nako. A taku nakoina: “Ngkana ko tangira am utu, ko na bon nako. Ko kona n teimatoa ni beku ibukin Iehova.” N aki ongea tabeaiangan Marilyn, e a kaboria ni kaboo ma James ao Jimmy ao ni kitania nako tinaniku ibukini karekean ana mwakuri. E berita ni kangai: “I waekoa n oki.”

TABEN TE UTU AO BOOTO N REIREI N TE BAIBARA

4. Bukin tera bwa a bati aika mwaing nako, ma antai ake a aki toki ni katukaki ataei irouia?

⁴ E aki tangiriia ana toro Iehova bwa a na rangi ni maiu ni kainnano, ma e ngae n anne te mwaing nako bon teuana mai buakon aanga ibukini katokan te maiu ni kainnano ma ngkekei ni karokoa ngkai. (Taian Areru 37:25; Taeka N Rabakau 30:8) E kanakoia natina mwaane te baatua are Iakoba nako Aikubita bwa a na kabooi amwarake ibukin totokoan te baki.b (Karikani Bwaai 42:1, 2) Ni boong aikai, a aki kitani mwengaia angiia te koraki ake a rineia bwa a na mwaing nako ibukin te baki. Ma e ngae n anne, a kona ni mwakuri korakora ibukin aia taarau. Tabeman, a tangiria ni kaikawaia natiia n te maiu ae taneiai te aba iai. A bati aika a katikuia aia utu imwia n te tabo ae raroa nako i aon ke i tinanikun abaia n uaiakin tiaia ibukini uarerekeni kaubwain abaia. A aki toki ni katikuia natiia irouia buuia, natiia ae ikawai riki, tibuia, aia koraki tabeman ke raoraoia. E ngae ngke e karawawata te mwaing nako ao katukani buum ke natim, ma a a bati aika a nako tinaniku aika a namakinna bwa bon akea aia anga iai.

5, 6. (a) Tera are e reiakinna Iesu ibukin te kukurei ao te mweraoi? (b) Baikara bwaai aika a kainnanoaki ake e reiakinia taan rimwina Iesu bwa a na tataroi? (c) N te aro raa ae e kakabwaiaira iai Iehova?

⁵ A bati naba aomata aika maiu ni kainnano n ana bong Iesu, ao a bae n namakinna bwa a na kukurei ao ni mweraoi tii ngkana a karekea te mwane ae bati. (Mareko 14:7) Ma e tangiriia aomata Iesu bwa a na kabotoi aia kantaninga i aon te bwai riki teuana. E tangiriia bwa a na onimakina Nibwan te kaubwai ae teimatoa are Iehova. E kamataataa Iesu n ana kabwarabwara i aon te Maunga bwa e aki reke te kukurei ni koaua ao te mweraoi ni bwaikorakin te maiu aei ke n oini korakorara, ma e reke man ara iraorao ma Tamara ae i karawa.

⁶ N ana tataro ni katoto Iesu, e a reireinira iai bwa ti na tataro tiaki ibukin te mwane ae bati ma ibukini baika ti kainnanoi ni katoabong ae “kanara ae ti a tau iai n te bong aei.” E kamataataa ni kangai nakoia taan ongora: “Katoka kaikoan ami bwai aika kakawaki i aon te aba . . . Ma kaikoi baika kakawaki ibukimi i karawa.” (Mataio 6:9, 11, 19, 20) Ti kona n onimakina Iehova bwa e na boni kakabwaiaira n aron are e beritanna. E bati riki ae irekereke ma ana kakabwaia te Atua bwa e boni berita bwa e na boni karekei baika ti kainnanoi ni koaua. Ni koauana, te anga ae tii teuana ibukini karekean te kakukurei ni koaua ao te mweraoi boni man onimakinan Tamara ae tatangira n oneani mwin te mwane.—Wareka Mataio 6:24, 25, 31-34.

7. (a) Antai ake e mwiokoiia Iehova bwa tabeia kaikawaaia ataei? (b) Bukin tera bwa a riai kaaro ni kaai ni kaikawaiia natiia?

⁷ Te bwai ae irekereke ma ‘ukoukoran moa ana raoiroi te Atua’ bon iangoan tabera n te utu n aron iangoana iroun Iehova. Aei te boto n reirei ae kaineti nakoia Kristian ae kanoan te Tua Rinanoni Mote: A riai kaaro n reireinia ma ni kataneiaia natiia maiuakinan te onimaki ni koaua. (Wareka Te Tua-Kaua 6:6, 7.) A anganaki kaaro tabeia aei iroun te Atua, ma tiaki tibuia ataei ke tabeman riki. E taekina ae kangai te Uea ae Toromon: “Natiu, ko na ongo ana reirei tamam, Ao tai kaki ana tua tinam.” (Taeka N Rabakau 1:8, BG) E iangoiia kaaro Iehova bwa a na kaai ni kairiia ao n reiakinia natiia. (Taeka N Rabakau 31:10, 27, 28) A kona ni karekei reireiaia ataei ngkana a ongoraei aia kakarabakau aia karo ibukin Iehova ao n nora aroia ni beku ibukina ni katoabong.

BAIKA AKI KANTANINGAAKI RIKIIA

8, 9. (a) Baikara bitaki aika a aki toki n riki ngkana e katikuia imwina ana utu te karo? (b) Tera ae kona n riki nakon te namakin ao te aroaro ni maiu ae riai man te maenako?

⁸ A kataia taan nako tinaniku n iaiangoi kangaanga ao aroia n taon nanoia imwaini mwaingia, ma a karako aika a kaman nori kangaanga ni kabane ni kitanakia aia utu. (Taeka N Rabakau 22:3) E a moanna n rotaki Marilyn ni kammarakin te tabeaianga n raurenakona mairouia ana utu, n te tai naba are e kitania iai. Ao ai uana naba ma buuna ao natina. E aki toki n titirakinaki neiei iroun natina ae uarereke ae Jimmy ni kangai: “E aera ko kitanai?” Ao n aron are e iangoia bwa e na nako tii i nanon tabeua te namwakaina, e a tiku nako i nanon ririki aika bati ao e a tabeaianga n nori bitaki n ana utu. E a moanna n aki kan taetae Jimmy ao n rikirake n akea te reitaki ae kaan ma tinana. E ururing ma te nanokawaki ni kangai neiei: “E a bua tangirau irouna.”

⁹ Ngkana a aki kaai ni maeka kaaro ao natiia, a na kona n taonakinako n te rawawata ao n nakobuaka aroaroni maiuia.c Ngkana ko maenako ma natim aika uarereke i nanon te tai ae maan, a na korakora riki rotakibuakaia iai. E kabwarabwaraa Marilyn nakon Jimmy bwa e karaoa aei ibukini karekeani kabwaiana. Ma e namakinna Jimmy bwa titeboo ma e a mwaninga taekana tinana. N te moantai, e rangi n un ni kitanakina. Ma imwina riki, e a manga rangi n un n okin tinana. E kakoauaa Jimmy bwa e aki riai n ongeaba ao n tangira tinana, n aron are e riiriki nakoia ataei ake a maenako ma aia karo.—Wareka Taeka N Rabakau 29:15.

10. (a) E na tera aron rotakia naati iroun te karo ae e bonota mwin akeana i rarikia ni kaokiokani bwaai n tangira? (b) Tera ae e aki kona ni karaoia te karo ngkana e kataia ni kaikawaa natina man te tabo ae raroanako?

¹⁰ E ngae ngke e kataia Marilyn ni bonota mwin akeana i rarikia ana utu rinanon ana kaokimwane ao bwaai n tangira, ma e noria bwa e a riki n ianena iroun natina ao e boni kataneia n akea ataakina irouna bwa e na moanibwaia bwaikorakin te maiu aei nakon te onimaki ma te reitaki n te utu. (Taeka N Rabakau 22:6) E kananokawaki bwa e bon tuanga tinana Jimmy ni kangai: “Tai oki ma tii kakanakomai naba am bwaintangira.” E a moanna n ataia Marilyn bwa e aki kona ni kaikawaa natina rinanon te kororeta, te tareboon ke te maroro rinanon te Internet. E kabwarabwaraa ni kangai neiei: “Ko aki kona n rabwata natim ke ni kaboria ma ngaia imwaini matuna i aon te Internet.”

11. (a) E na kanga n rotakibuaka te mare n te maenako irouia te taanga ibukini karekean te mwakuri ni kareketianti? (b) E kanga temanna te tari te aine n ota raoi bwa e riai ni kabooua ana reitaki ma ana utu?

¹¹ E bon rotakibuaka naba ana reitaki Marilyn ma Iehova ao buuna are James. E a kekerikaaki irakini bobotaki ni Kristian ao te mwakuri ni minita irouna nakon teuana te bong n te wiki ke e karako riki. E riai naba n rarawa nakon ana kariri ana tia kammwakuri nakon te wene ni bure. Ibukina bwa akea buun Marilyn i rarikina ao akea naba ngaia i rarikin James ike a na ibuobuoki i marenaia ni kaaitarai kangaanga, a kaai n irekereke ma tabemwaang ao ni kurimaraa ni karaoa te wene ni kimoa. E noria Marilyn bwa e ngae ngke a kaai n aki karaoa te wene ni bure ma a bon aki kakairi n te kaetieti man te Baibara ni maenakoia ibukini katokan nanoia i marenaia ao kainnanoia ibukin te wene n taanga. Ibukina bwa a maenako Marilyn ao James, a aikoa kona ni karekei aia tai i boni marenaia ao ni kaotiota tangiraia n aron are a riai ni karekea taanga ni mare. (Ana Anene Toromon 1:2; 1 I-Korinto 7:3, 5) Ao a aikoa kona naba ni kaai n taromauria Iehova ma natiia. E ururing rikaaki ni kangai Marilyn: “Ngke I a ataia n te bwabwaro bwa e rangi ni kakawaki karaoan te Taromauri n Utu ni katoatai ibukini kamaiuara n ana bong Iehova ae kakannato, I a ota raoi bwa I riai n okira abau. I riai ni manga kabooua au reitaki ma Iehova ao au utu.”

TE TAEKA N REIREI AE RAOIROI AO AE BUAKAKA

12. Tera te taeka n reirei man te Baibara ae a kona n anganaki te koraki ake a maenako ma aia utu?

¹² Ni karaoan ana motinnano Marilyn ibukin okiran abana, e a aki ataia bwa tera ae na karaoia. A kamoamoaa neiei unimwaane n ana ekaretia are e mwaing nako iai ibukin ana onimaki ao ninikoriana. Ma a aki karaoa anne tabeman ake a katikuia buuia ma aia utu imwia. N oneani mwin are a na kakairi n ana katoto ae raoiroi neiei, a boni kataia ni kabwaraa nanona. A taku: “Ane ko na manga waekoa n oki. Ko na kanga ni karekei baika a kainnanoi am utu ngkana ko a okira abam?” N oneani mwin are a na atong taeka ni kabwaranano akanne raao ni Kristian, a riai “n reireinia ateiaine bwa a na tangiriia buuia, a na tangiriia natiia, a na . . . mwamwakuri ni bataia,” ae oini bataia “bwa e aonga n aki kabuakakaaki ana taeka te Atua.”—Wareka Tito 2:3-5.

13, 14. Bukin tera bwa e riai ni moanibwaiaki onimakinan Iehova nakoni baike a kantaningaia te utu? Kabwarabwaraa.

¹³ A bati taan nako tinaniku ake a ikawairake n aaba ake a kakawaki riki n aia katei tabeia n aia utu ai moarara riki kaaro mai buakoni bwaai ni kabane. Ngkana e na rarawa te Kristian nakon aroaro aika bwabwainaki ke ibukini baika a tangiraki n te utu, e riai ni karaoa raoi ae boraoi ma ana onimaki bwa e aonga ni kakukureia Iehova.

¹⁴ Iangoa ana rongorongo Carin aei: “I a bon tibwa moanna n reirei n te Baibara ngke I bungia natira te mwaane ae Don ni mwakuriu ma buu n te tabo ae tiaki abara. A kantaningaia au utu ni kabane bwa N na kaoka Don nakoia au karo bwa a na kaikawaia ni karokoa reken ara mwane ae bati.” Ngke e taekinna Carin bwa e na boni kaikawaa Don, a a ngareakinna ana koraki n ikotaki ma buuna ao a aranna bwa e taningaroti. E taku Carin: “Ni koauana, I bon aki ota raoi n te tai anne ae e kairua katukan Don irouia au karo i nanon tabeua te ririki. Ma I ataia ae e anganira Iehova te mwakuri ibukini kaikawaan natira, ngaira aika ana karo Don.” Ngke e a manga bikoukou naba Carin ao e a tangiria buuna are tiaki kaain te onimaki bwa e na kabwakaa natina. E kakorakoraaki ana onimaki Carin n ana motinnano ae raoiroi are mai mwaina ao e a manga tei n nene riki ibukin Iehova. E a rangi ni kukurei neiei, buuna ao natiia ngkai a a teimatoa n ikotaki ni kabane ni boong aikai. Ngke arona bwa e kanakoa natina temanna ke ni kauoman bwa a na kaikawaaki irouia tabemwaang, e na kona n rangi ni kaokoro mwina.

15, 16. (a) Kabwarabwaraa te baere e rinanona te tari te aine temanna ni katukana imwia ana karo ngke te teei, (b) Bukin tera ngke e motinnanoia bwa e na kaokoroa kaikawaana ma natina te aine?

¹⁵ E taku te tia Kakoaua ae Vicky: “I boni kaikawaaki iroun tibuu te unnaine i nanon tabeua te ririki ao a kairaanako tariu ae uarereke au karo. E boni bitaki au namakin ibukia au karo n te tai naba are I a manga maeka i rarikia. E aki maamaa tariu ni kaota nanona nakoia ara karo, n rabwatiia ao ni karekea te reitaki ae kaan ma ngaiia. Ma I namakinna bwa I raroanako ma au karo ao I noria bwa e kangaanga bwa N na taekina au namakin ni koaua nakoia ni karokoa I a ikawai. Ti karaui nanoia ara karo ngai ma tariu bwa ti na bon tabeakinia ngkana a a kara. Ma N na karaoa ae bati riki ibukia bwa tabeu ma e na tabeakinia riki tariu ibukin tangiraia.”

¹⁶ E taku Vicky: “E tangirai ngkai tinau bwa N na kaoka natiu te aine nakoina bwa e na kaikawaia n aron are e karaoia nakoiu ni kaokai nakon tinana. Ma I karautaeka nakoina. I tangiria ma buu bwa ti na kaikawaa natira n aron are e tangiria Iehova. Ao I aki tangiria bwa e na uruaki au reitaki ma natiu nakon taai aika a na roko.” E a tia n noria Vicky bwa te kawai ae te kabanea n tamaroa boni moanibwaian Iehova ao ana boto n reirei, n oneani mwin uaiakinan tiia ibukini karekean te mwane ao baika a tangiraki n te utu. E katereterea ni kangai Iesu: “Akea ae kona n toro irouia tooka aika uoman,” ae ibukin te Atua ao te Kaubwai.—Mataio 6:24; Te Otinako 23:2.

E ‘KATEKERAOI’ ARA KAKORAKORA IEHOVA

17, 18. (a) N aaro raa ae a kona iai Kristian n rinea ae a na karaoia n taai nako? (b) Baikara titiraki aika ti na rinanoi n te kaongora ae imwina?

¹⁷ E berita Tamara ae Iehova bwa e na buokira ni karekei baika ti kainnanoi ni koaua ngkana ti moanibwaia te Tautaeka n Uea ma raoiroina. (Mataio 6:33) Ngaia are a kona Kristian ni koaua n rinea ae a na karaoia n taai nako. E berita Iehova bwa e na katauraoa ‘te anga ae ti na buutakinako’ iai ao ni kakairi ni booto n reirei n te Baibara, n aki ongei kangaanga ake ti aitara ma ngaai. (Wareka 1 I-Korinto 10:13.) Ngkana ti “kantaninga” Iehova ao n “onimakinna” rinanon tataroakinani wanawanana, ana kaetieti ma ni kakairi n ana tua ao booto n reirei, ngkanne “e na [tabeakinira].” (Taian Areru 37:5, 7, BK) E na boni kakabwaiaa ara kakorakora ma nanora ni beku ibukina n tii ngaia ngkai te Toka ni koaua. Ngkana ti moanibwaia, e na boni ‘katekeraoi’ maiura.—Kabotaua ma Karikani Bwaai 39:3, BK.

¹⁸ Tera ae ko kona ni karaoia bwa ko aonga ni buoka kanakoraoan te reitaki ae bua imwin te maenako? Baikara mwaneka aika manena aika ti kona ni karaoi bwa ti aonga ni katauraoi baika a kainnanoi ara utu n akea te maenako? Ao ti na kanga ni kaungaia tabemwaang ma te tangira bwa a aonga ni karaoi motinnano aika eti ni kaineti ma aei? A na rinanoaki titiraki aikai n te kaongora ae imwina.