Buokiia Tabemwaang Bwa A na Karaoa Aia Kabanea ni Kona

1, 2. Tera aron Iehova n iangoiia ana toro i aon te aba?

A AKI toki kaaro ni mimi n aia konabwai natiia aika uarereke ni karaoi bwaai i bon irouia ngkana a matakuakinia n takaakaro. Ko kona ni kakoauaa anne man te baere ko bon rinanona? Iai ana kona temanna te ataei ni waekoa n iango ke n rangi ni mwaatai n taian takaakaro, ao are temanna e taraa n iai ana konabwai riki ma takaakaro n aron te korobanna ke rabakau riki tabeua. Ma a namakina te kukurei kaaro ni kaineti ma bwaintituaraoi ake irouia natiia ao ni buokiia ni karaoa aia kabanea ni kona iai.

² E rangi n tabeakinia naba Iehova natina aika i aon te aba. E taraiia ana toro ni boong aikai bwa “bwaai aika tatangiraki aika aia bwai botanaomata ni kabaneia.” (Akai 2:7, BG) A tatangiraki riki iroun te Atua ibukin aia onimaki ao aia tangira. Ma ko bae n noria irouia raora aika taani Kakoaua ni boong aikai bwa a bati aia tarena aika kakaokoro. Iai tabeman taari mwaane ake iai aia konabwai ni kabwarabwara i mataia aomata ao tabeman riki a rangi n rabakau ni karaoi babaire. A bati taari aine ake a rangi ni mwaatai n reiakin taetae n ianena tabeua ao a kabonganai n te mwakuri ni minita, ao tabeman a rianako aia katoto ni boutokaiia te koraki ake a kainnanoa te kaungaunga ke tabeakinaia aoraki. (I-Rom 16:1, 12) Tiaki ti kakaitau ngkai ti mena n te ekaretia ma Kristian akanne ni kabane?

3. Baikara titiraki aika ti na rinanoi n te kaongora aei?

³ Ma a tuai moa kona n reke mwiokoaia n te ekaretia raora n te onimaki tabeman n ikotaki naba ma taari aika rooro n rikirake ke aika a a tibwa bwabetitoaki. Ti na kanga ni buokiia bwa a na karaoa aia kabanea ni kona? Bukin tera bwa ti riai ni kakorakoraira n ukeri baika raoiroi irouia ao n iangoiia n aron iangoaia iroun Iehova?

E NORI BAIKA RAOIROI IEHOVA IROUIA ANA TORO

4, 5. Tera ae kaotaki n te rongorongo ae n Taani Motiki-Taeka 6:11-16 n aron Iehova n nori aia konabwai ana toro?

⁴ A bati rongorongo man te Baibara ake a kamatataaki iai bwa e aki tii nori Iehova raoiroia ana toro ma bon aia konabwai naba. N te katoto, ngke e rineaki Kiteon bwa e na kainaomataia ana aomata te Atua mani karawawataakia irouia tibuni Mirian, e bae ni mimi n ana taeka te anera nakoina aei: “E mena Iehova i roum, ngkoe ae te rorobuaka ae korakora ae ninikoria.” E taraa n teretere irouni Kiteon n te tai anne bwa e aki namakina te “ninikoria.” E kakoauaa bwa e nanououa ao e bon namakinna ae akea manena. Ma n aron ae e oti n te maroro imwina, e kaokoro are e iangoia Kiteon ma are e iangoia Iehova bwa E kakoauaa ana toro anne bwa e kona ni kamaiuia tibun Iteraera.—Wareka Taani Motiki-Taeka 6:11-16, BG.

⁵ E onimakinaki Iehova iroun Kiteon bwa e na kainaomataia tibun Iteraera ibukina bwa E a tia n nori ana konabwai. Bukina teuana, e a tia ana anera Iehova n nora aroni Kiteon ni kaaki kunin uita ma korakorana ni kabane. Iai riki te bwai are e anaaki iai nanon te anera. N taai ake a karakinaki n te Baibara ao a aki toki taan ununiki ni kamanti uita n te tabo ae tangaina nako bwa a aonga n ukakinako kunin uita n te ang. E kamimi bwa e karabaa Kiteon ni kaaki kunin uita n te nne ni kamanti kureebe bwa a aonga n aki noraki arokana tabeua ibukin te tai irouia tibuni Mirian. Ai boni wanawanara n te bwai are e karaoia! Maroaka ae n ana taratara Iehova, a bati riki ana konabwai Kiteon nakon ae bon tii te tia ununiki ae iangoraoi ngaia ao te mwaane ae wanawana naba. Eng, e nori ana konabwai Iehova ao e kukurei ni kataneia.

6, 7. (a) E kanga ni kaokoro ana iango Iehova ma tibun Iteraera tabeman ibukin te burabeti ae Amota? (b) Tera ae kaotaki iai bwa Amota bon te aomata ae wanawana?

⁶ N aron naba anne, ti ataia n rongorongon te burabeti are Amota bwa e ataa ana konabwai ana toro anne Iehova, e ngae ngke e taraa n aki rangi ni kakannato ke e boni mangori irouia aomata aika bati. E kabwarabwaraa Amota bwa te tia kawakinia tiibu ngaia ao te tia kaitiakii kaai aika tukumorea ae te aeka ni kai teuana are e iangoaki bwa kanaia naake a maiu ni kainnano. Ngke e rineaki Amota iroun Iehova bwa e na kaetii aroia kaain te tautaeka n uea ni baronga aika tebwina i aon Iteraera ngke a taromaurii boua, a bae n iangoia tabeman tibun Iteraera bwa e aki riai n rineaki.—Wareka Amota 7:14, 15.

⁷ E roko Amota man te kaawa ae tio nako, ma e kakoauaaki man ana atatai i aoni katei ao tautaeka n ana tai bwa e boni wanawana. E boni bae ni kamani kaongoaki baika riki i aon Iteraera ao e bae naba n iai ana atatai ni kaineti ma natannaomata ake i rarikia mai mwin reitakina ma taan iokinibwai aika mwamwananga. (Amota 1:6, 9, 11, 13; 2:8; 6:4-6) A kamoamoaa Amota tabeman taan rabakau i aon te Baibara ni boong aikai ibukin rabakauna ni koroboki. E aki n ae e tii rinei taeka aika bebete ma n ringa te nano te burabeti aei, ma e kamanenai raoi taeka aika titeboo nanoia ao ni kabotaui n te aro ae anainano. Ni koauana, man ninikorian Amota ni kaekaa te ibonga ae Amatia ae buakaka, e a kakoauaaki bwa e a tia Iehova n rinea te aomata ae konabwai ao ni kabonganai rabakauna ake a taraa n aki otara n te moan tai.—Amota 7:12, 13, 16, 17.

8. (a) Tera te karaunano ae anga Iehova nakon Tawita? (b) Bukin tera bwa a rangi ni karaunano taeka ake n Taian Areru 32:8 nakoia te koraki ake a kona n aki onimakinia i bon irouia ke a aki rangi ni mwaatai?

⁸ Eng, e nori Iehova aia konabwai ana toro n tatabemania nako. E karaua nanon te Uea ae Tawita bwa e na boni kairiria n taai nako ao n ‘tarataraia.’ (Wareka Taian Areru 32:8, BG.) Ko nora bukina ngkai ti riai ni kaungaaki iai? E ngae ngke tao ti aki onimakinira i bon iroura ma e kona Iehova ni buokira, bwa ti na riaon tian ara konabwai ao ni karokoira n tiia ake ti aki kantaningai. N ai aron te tia reirei ae mwaatai are e matakuakina te tia tamwarakea te ni ae e aki rangi ni mwaatai bwa e aonga ni buokaki iai n taratarai boo mwanekan te ni aika nano nibwaia, e tauraoi naba Iehova ni kairirira ngkai ti karikirakea maiuakinan te onimaki. E kona naba Iehova ni kabonganaia raora n onimaki bwa a na buokira bwa ti na karaoa ara kabanea ni kona. N te aro raa?

UKERI RAOIROIA TABEMWAANG

9. Ti na kanga ni kona ni maiuakina ana kaungaunga Bauro ae ti na “tabeakin” aroia tabemwaang?

⁹ E kaumakiia Kristian ni kabane Bauro bwa a na “tabeakin” aroia raoia n onimaki. (Wareka I-Biribi 2:3, 4.) Te bwai ae kakawaki n ana reirei ni kairiri Bauro bwa ti na tarai aia konabwai tabemwaang ao ni kamoamoaia. Tera arora ngkana iai temanna ae kaota kukureina n rikirakera? N angiin te tai, ti kaumakaki iai bwa ti na manga karikirakea riki nakon ara kabanea ni kona. Ai arona naba bwa ngkana ti atai kakawakia raora n onimaki, ti na buokiia bwa a na rikirake n te onimaki ao n nakoraoi aia beku ibukin Iehova.

10. Antai aika ti riai ni mutiakinia riki?

¹⁰ Antai aika ti riai ni mutiakinia riki? Ni koauana, ti bane ngaira aikai ni kainnanoa mutiakinara ae okoro n te tai teuana ma teuana. Ma a rangi ni kainnanoa namakinan ae a irekereke ma mwakuri n te ekaretia, taari mwaane aika rooro n rikirake ke aika a a tibwa bwabetitoaki. A na buokaki n aei bwa a aonga n ataia ae a bongana i buakora. N te itera are teuana, ngkana ti kabwaka ni kamoamoaia taari akanne, a kona ni bwara nanoia n uaiakini mwioko aika bati riki, ae te bwai ae a kaungaaki man Ana Taeka te Atua bwa a na karaoia.—1 Timoteo 3:1.

11. (a) E kanga unimwaanen te ekaretia ni buoka te rorobuaka temanna n tokanikai i aoni mamaamaana? (b) Tera reireiam ae reke man te baere e rinanona Julien?

¹¹ E taku Ludovic ae te unimwaane n te ekaretia are e a tia ni kakabwaiaaki man te aeka ni mwamwannano anne ngke e ataeinimwaane: “Ngkana I kaotiota tabeakinan raoi te tari te mwaane temanna, e a waekoa n rikirake riki.” E taku Ludovic ni kaineti ma Julien, ae te rorobuaka ae mamaamaa: “E kaotiota te aroaro ae aki riai Julien ibukina bwa n taai tabetai, e kataia ni karaoi baika bati n te ekaretia n akea onimakinana i bon irouna. Ma I kona n noria bwa e akoi ao e rangi ni kani buokiia tabemwaang n te ekaretia. Ngaia are n oneani mwin are N na nanououa n ana iango, I a kaatuui iangoan aroarona aika raraoi ao ni kataia ni kaungaa.” Imwin te tai ae aki maan, e a katauaki Julien bwa te tabonibai ao e a regular bwaiania ngkai.

BUOKIIA BWA A NA KARAOA AIA KABANEA NI KONA

12. Tera te aroaro ae rangi ni kakawaki ibukini buokan temanna bwa e na karaoa ana kabanea ni kona? Taekina te katoto.

¹² E teretere raoi bwa ngkana ti buokiia tabemwaang bwa a na karaoa aia kabanea ni kona, ti riai n rangi n atatai. N aron ae kabwarabwaraaki n te baere e rinanona Julien, ti kona naba n tarariaoa mamaaran temanna ibukin ataakin aroarona aika raoiroi ao rabakauna ake e kona ni karikirakei riki. Titeboo te aro aei ma aron Iesu n iangoa te abotoro Betero. E ngae ngke e taraa ni kabwaka Betero n taai tabetai, ma e taetae ni burabetinna Iesu bwa e na riki bwa te atibu ae matoatoa.—Ioane 1:42.

13, 14. (a) E kanga Barenaba ni kaota te wanawana ni kaineti ma te rorobuaka are Mareko? (b) E kanga Alexandre ni kakabwaiaaki man te aeka n ibuobuoki are e karekea Mareko? (Nora te taamnei ni moan te kaongora aei.)

¹³ E kaotiota naba te wanawana anne Barenaba ni kaineti ma Ioane are iai ana kauoua n ara ae Mareko i aon Rom. (Mwakuri 12:25) Ni moani mwanangani Bauro ni mitinare ma Barenaba, e a mwiokoaki Mareko bwa “te tia ibuobuoki” tao ibukin tararuaakini baike a kainnanoi n te itera n rabwata. Ma ngke a roko i Bamburia, e waekoa Mareko ni kitania raona ni mwananga n te tai are a kainnanoa iai buokaia. A a riai ni mwamwananga naakai n akea ngaia i rarikia nako meang rinanon te aono ae rangi n ataaki bwa a kakamwarua kaaina. (Mwakuri 13:5, 13) Mangaia are, e kaatuui ana iango Barenaba n aroaroni Mareko aika raoiroi ao ti aki ni mamaarana rimoa ao e a karekea ana tai imwina riki ni kabwanina kataneiaan Mareko. (Mwakuri 15:37-39) E buokaki iai te rorobuaka aei n riki bwa ana toro Iehova ae ikawai n te onimaki. E kakaongora bwa e mena Mareko i Rom ma Bauro are e karabuutinaki n te tai anne ao e uataboa naba kanakoan taeka ni kamauri nakoia Kristian ake n te ekaretia i Korote ao e kamoamoaaki iroun te abotoro. (I-Korote 4:10) Iangoa aroni kukureini Barenaba ngke e bubutii Bauro ana ibuobuoki Mareko.—2 Timoteo 4:11.

¹⁴ E ururing rikaaki Alexandre are e a tibwa mwiokoaki bwa te unimwaane n te ekaretia, n arona ni kakabwaiaaki man ana atatai te tari temanna: “Ngke te roro n rikirake ngai ao I boni kabokorakora ngkana I tataro i mataia aomata. E buokai te unimwaane n te ekaretia ibukin arou ni katauraoai ao n aki nakonnano. N oneani mwin are e na kakawarai, e a mwiokoai bwa N na katoatai n tataro ni bobotaki n te mwakuri ni minita. N te tai ae aki maan, I a onimakinai i bon irou.”

15. E kanga Bauro ni katuruturua tangiraia tarina n te onimaki?

¹⁵ Ngkana ti nora raoiroin aroaron te Kristian temanna, ti kaotia nakoina bwa e rangi ni kakawaki aroarona ae raoiroi anne iroura? N I-Rom mwakoro 16, e taekinaki iai kinaakia raao n te onimaki aika a raka i aon 20 mwaitiia irouni Bauro, ibukin aroaroia are e a rangi n tangiriia iai. (I-Rom 16:3-7, 13) N te katoto, e boni kakoauaa Bauro bwa e a tia Anteroniko ao Iunia ni beku ibukini Kristo n te tai ae rangi ni maan riki nakoina, are e katuruturuaki iai nanomwaakaia ngkai Kristian ngaiia. E taekina naba tinan Rubo Bauro ngkai e a tia n akoaki iroun neiei rimoa.

16. Tera ae kona n riki imwini kamoamoaan te ataeinimwaane temanna?

¹⁶ A kona n reke uaa aika raraoi ngkana ti anga taeka ni kamoamoa mai nanora ni koaua. Iangoa ana katoto Rico, ae te ataeinimwaane i Buranti are e bwara nanona ibukin tamana are e aki boutokai ana koaua ao e totokoa bwabetitoana. E iangoia Rico bwa e riai n tataninga ni karokoa e roko n te ririki are e a nako iai mai aan ana kairiri tamana n te aro ae eti i aan te tua, bwa e aonga ni beku ibukin Iehova ma nanona ni kabane. E bon nanokawaki naba bwa e kaitaraaki ma te kakanikoaki n te tabo n reirei. E taekinna te unimwaane n te ekaretia ae Frédéric are e mwiokoaki bwa e na reirei n te Baibara ma te ataeinimwaane aei ni kangai: “I kamoamoaa Rico ibukina bwa e a tia n ninikoria ni kaota ana onimaki n te aeka ni kataaki anne.” E kakorakoraaki Rico ni kamoamoaana aikai ao e motinnanoia bwa e na teimatoa ni karaoa ae moan te raoiroi, ao e a tia ni buokaki naba ni kaaniaki riki ma tamana. E boni bwabetitoaki ngke ai 12 ana ririki.

17. (a) Ti na kanga ni buokiia taari mwaane bwa a na rikirake n te onimaki? (b) Baikara baike a tangiri taari mwaane aika rooro n rikirake are e tabeakin te mitinare temanna, ao tera uaana?

¹⁷ Ni katoaa te tai are ti kaota iai ara kakaitau ni karaoani mwioko ake a baireaki raoi ke kamoamoaaia raora n te onimaki ibukin aia mwakuri korakora, ti a karikirakea irouia te kani beku ibukin Iehova ma nanoia ni kabane. E taekinna Sylvie,a are e a tia ni beku n te Betaera i Buranti i nanon ririki aika bati bwa a kona taari aine n uataboa naba kamoamoaaia taari mwaane. E noria bwa a kona aine ni kamoamoaaia ibukin rongorongoia aika kakaokoro ke aia kakorakora ake a nori. Ngaia are aia “taeka ni kaungaunga a kona n raonaki n aia taeka taari mwaane aika mwaatai.” E reitia neiei ni kangai: “Ngai irou, boni mwiokoara naba taekinan taeka ni kamoamoa.” (Taeka N Rabakau 3:27) E a tia Jérôme ae te mitinare i French Guiana ni buokiia rorobuaka aika bati bwa a na tau ibukin te mwakuri ni mitinare. E taku: “I a tia n noria bwa ngkana I kamoamoaia taari mwaane aika rooro n rikirake ni baika a kakawaki n aia mwakuri ni minita, ke n aia kaeka aika a iangoaki raoi, a a tauraoi ni mwakuri n tii ngaiia. Ao ibukin anne, a karikirakei riki aia konabwai aika bati.”

18. Bukin tera bwa e kakawaki te mwakuri ma taari mwaane aika rooro n rikirake?

¹⁸ Ti kona naba ni kaungaia tarira n ekaretia nako bwa a na rikirake n te onimaki ngkana ti mwakuri ma ngaiia. E bubutii temanna te unimwaane n te ekaretia nakon te tari te mwaane ae mwaatai ni kabonganai kaombiuta bwa e na karekei katoton rongorongo tabeua man te atureti ae jw.org aika kaunganano ibukia kaara ake akea aia kaombiuta. Ke ngkana ko irekereke ma te mwakuri n te Tabo n Taromauri, e aera ko aki butiia te tari te mwaane temanna bwa e na mwakuri ma ngkoe? Ngkana ko biririmoa ni karaoi aeka ni mwakuri akanne, e a reke iai am tai n tarataraia rooro n rikirake, ni kamoamoaia ao n nora uaana.—Taeka N Rabakau 15:23.

KAETIETI IBUKIN TAAI AIKA NA ROKO

19, 20. Bukin tera bwa ti riai ni buokiia tabemwaang bwa a aonga n rikirake?

¹⁹ Ngke e rineaki Iotua iroun Iehova bwa e na kairia tibun Iteraera, E tua naba nakoni Mote bwa e na “kauunga” ao ni “kakorakora” Iotua. (Wareka Te Tua-Kaua 3:28, BG.) E a ririkirake mwaitiia aomata ake a katiteuanaaki ma ngaira n taromauria Iehova ni katobibia te aonnaba. A kona Kristian aika mwaatai ni kabane ni buokiia taari mwaane aika rooro n rikirake ao aika a boou ni karikirakei aia onimaki bwa a aonga ni karaoa aia kabanea ni kona ma tiaki tii unimwaane n te ekaretia. Mangaia are e a ririkirake riki mwaitiia ake a kabwanina aia tai n te mwakuri ni minita ao a a bati riki ake a kona n “tau n reireinia aomata tabemwaang.”—2 Timoteo 2:2.

²⁰ Ngkana tao ti mena n te ekaretia ae rangi n nakoraoi ke n te kurubu ae uarereke ae tabe n rikirake bwa te ekaretia ae boou, ti bia ibuobuoki ni karaoani kaetieti ibukin taai aika na roko. Ti riai ni kakairi iroun Iehova are ukeri raoiroia ana toro n taai nako ibukini karaoan aei.