E Karaoaki ae Eti ao ae Riai n Ana Tua te Atua Nakoia Tibun Iteraera?

TABEUA te tai n nako n te aba ae mai Maeao ao e butimwaeaki te kaotioti ni kewe ni kaboowiakia mwaane aika uoman ake a bukinaki bwa a tiritiri ao tuuaaia a na tiringaki naba. Ngke e ataaki bwa e kairua te kaotioti, a a mwakuri korakora rooia ao e a kainaomataaki temanna mai buakoia naake a bukinaki ni bure. Ma ai bon akea te bwai ae a kona ni karaoia rooia aika taiani kabanea ni mwaatai ibukin are temanna bwa e a bon tia n tiringaki.

Kioina ngkai e kona ni kairua te moti ni waaki n tautaeka nako, ma ko kaumakaki n te Baibara ni kangai: “Ko na irira te aro ae raoiroi ni koaua.” (Te Tua-Kaua 16:20, BG) A na kakabwaiaaki kaain te aba ngkana a ukera te kaetitaeka ae riai mataniwi. A anganaki tibun Iteraera ake rimoa te waaki n tautaeka ae boto i aon te eti ao te riai n Ana Tua te Atua. Ti na nenera te Tua anne n noria bwa “bon te kaeti-taeka ae riai ana aro ni kabane [te Atua]” ke tiaki.—Te Tua-Kaua 32:4, BG.

MATANIWI AIKA “RABAKAU, AIKA ATAIBWAI, AIKA ATAKI RAOI”

A buokaki aomata bwa a na mweraoi irouia mataniwi aika wanawana, a karaoa ae riai ao n aki babakanikawai n aron ae taekinaki mai eta. E kaotaki n Ana Tua te Atua bwa e rangi ni kakawaki ae a na rangi ni mwaatai mataniwi. Ngke a mwamwananga i nanon te rereua rimoa, e bon tuangaki Mote bwa e na karekeia “aomata aika riai mai buakoia aomata ni kabaneia, aika mamaka te Atua, aika aomata aika kakaonimaki, aika ririba te kareke-bwai ae aki riai” bwa a na beku bwa mataniwi. (Te Otinako 18:21, 22, BG) Abwi te ririki imwina, e a manga katuruturua Mote kainnanoaia “aomata aika rabakau, aika ataibwai, aika ataki raoi.”—Te Tua-Kaua 1:13-17, BG.

N tieuture ake imwina ao e tua nakoia mataniwi Uean Iuta ae Ieotiabataa ni kangai: “Kam na iangoi aromi: ba kam aki motiki-taeka i bukiia aomata, ma kam motiki-taeka i bukin Iehova; ao E memena i roumi ngkana e motikaki te taeka. Ma ngaia ae e na mena makan Iehova i aomi; kam na kawakinna ma ni karaoia: ba akea te buakaka iroun Iehova ae Atuara, ao akea rinorinoaia aomata i Rouna, ao akea naba anakini bwaai n anai naano.” (2 Rongorongo 19:6, 7, BG) A kauringaki n anne mataniwi iroun te uea bwa ngkana e irianaki aia iango n te inanonano ao te mataai ni kanibwaibwai, e na boni bukinia te Atua ni baika a kammaraki ake a riki imwina.

Ngke a irii nanoni kaetieti aika moan raraoi akanne mataniwi i aon Iteraera, a a bon namakina ngkanne kamanoaia ao mweraoia natannaomata. Ma e boni katauraoi booto n reirei aika bati n Ana Tua te Atua ibukia mataniwi bwa a aonga n reke aia iango aika riai, e ngae naba ngkana e rangi ni kakaiaki te kangaanga. Baikara tabeua mai buakoni booto n reirei akanne?

BOOTO N REIREI AIKA A KAREKEI IANGO AIKA RIAI

E ngae ngke boni mwaane aika wanawana ma ni konabwai, mataniwi ake a rineaki ma a aki katukaki bwa a na karaoi aia motikitaeka rinanon onimakinan oini wanawanaia ma aia konabwai. E bon angania Iehova ae te Atua booto n reirei ke taeka n reirei ake a na kona ni karekei iai aia iango aika eti. Aikai tuua tabeua ake a anganaki mataniwi ake tibun Iteraera.

Neneri raoi taekaia. E bon anga ana kaetieti te Atua nakoia mataniwi rinanoni Mote ni kangai: “Kam na ongo taekan aroia tarimi aika a na kaetaki, ao kam na kaeta raoi taekan te aomata ma tarina.” (Te Tua-Kaua 1:16, BG) A kona ni karaoa aia motikitaeka ae riai mataniwi tii ngkana e a tabwanin raoi rongorongon te bwai ae riki anne. Ibukin anne, e a anga ana kaetieti te Atua nakoia naake a mwiokoaki n rinanoani kangaanga aika riai n tabeakinaki iroun te komete ni kaboowi ni kangai: “Ko na titiraki iai, ma n ukeuke, ma n neneri taekaia; ao noria, ngkana tao bon te koaua, ao te bwai ae ataki raoi.” A riai taani moti n te kaboowi n taraia raoi imwaini moanakin aia boowi bwa “e boni koaua” te bukibuki ibukin te tia kakeru.—Te Tua-Kaua 13:14; 17:4, BG.

Ongora n aia kaotioti taani kakoaua. A rangi ni kakawaki aia kaotioti taani kakoaua ibukin neneran raoi te bwai ae riki. E kamatataaki ni kangai n Ana Tua te Atua: “E na aki tei rake te tia kakoaua ae ti temanna n eka nako te aomata i bukini buakaka nako, ma buure nako, n te bure teuana ae e bure iai: e na kateimatoaki taekana ni wiia tani kakoaua aika uoman, ke ni wiia tani kakoaua aika teniman.” (Te Tua-Kaua 19:15, BG) E taekinaki ae kangai n Ana Tua te Atua ibukia taani kakoaua: “Ko na tai tabeka te winanti: ko na tai i tau bai ma te aomata ae buakaka n riki ba te tia kakoaua ae babakanikawai.”—Te Otinako 23:1, BG.

E riai ataakini koauan raoi aia kaotioti. Aei te kauring ae matoatoa ni kaineti ma te tuuaa ibukin te kaotioti ni kewe n te boowi nakoia ake a bane n irekereke iai: “Ao tani motiki-taeka akanne a na kabatia neneran taekana: ao noria, ngkana tao te tia kakoaua ae kewe te tia kakoaua anne, [ae] kaota aron tarina ni kewe iai: ao kam na karaoa te aro nako ina iai ae e taku i nanona ba e na karaoia nakon tarina: ao ko na kaki te buakaka anne mai buakomi n te aro anne.” (Te Tua-Kaua 19:18, 19, BG) Ngaia are ngkana e kewe te aomata n te boowi ibukin anaakin oin ana bwai temanna, e na riai ni katuuaaeaki bwa e na kabwakaa te mwaiti ae boraoi ma are e anaia. Ngkana e kewe bwa e a tia n tua tiringan temanna ae e kinaa ae akea ana bure, e na boni bua maiuna. E oti n te tua aei bwa e kamatoaaki taekinan te koaua.

Motikitaeka n akea te inanonano. Ngkana a a reke irouia taani moti bwaai ni kakoaua ni kabane, a a karauia raoi n iangoa ngkanne aia moti. N te tai aei, e a rangi ni kakawaki riki Ana Tua te Atua ae rianako ma ni bwarabwara raoi aei: “Kam na tai karaoa ae buakaka ngkana kam motiki taeka: ko na tai nanonano ni matan te aomata ae aki kaubwai, ao tai karinea matan te aomata ae korakora: ma ko na motika raoi taekan te aomata ae maeka i rarikim.” (Nakoaia Ibonga 19:15, BG) A riai taani moti n iaiangoa raoi aia moti bwa e na boto i aon te koaua ma tiaki n taraakin tinanikun te aomata ke nakoaia akana a irekereke iai.

A kamatataaki n taekinaki booto n reirei aikai n tienture aika nako n Ana Tua te Atua nakoia tibun Iteraera, ao a kona n teimatoa naba ni manena n taabo ni kaboowi ni boong aikai. E na akea te kaboowi ae karaoaki n te inanonano ao te babakanikawai ngkana a iraki booto n reirei man Ana Tua te Atua.

AOMATA AIKA KAKABWAIAAKI MAN TE MOTIKITAEKA AE KOAUA

E titirakinia tibun Iteraera Mote ni kangai: “Te botanaomata ra ae ababaki, ae iai i rouia tuua ma mooti aika raraoi n ai aron te tua aei ni kabanea, ae I kaki i matami n te bong aei?” (Te Tua-Kaua 4:8, BG) Ni koauana, akea riki te botannaomata ae karekei kakabwaia akanne. A boni “maeka n rau,” a maiu ni kaubwai, “a amamarake ma ni momoi ma ni kimareirei” i aan ana tautaeka te Uea are Toromon are e tou mwin ana tua Iehova n ana tai n roro n rikirake.—1 Uea 4:20, 25, BG.

E kananokawaki bwa n tokina, a a boni katinanikui ana tua te Atua tibun Iteraera. E taekina ae kangai te Atua rinanon ana burabeti ae Ieremia: “Noria, a rawa nakon ana taeka Iehova; ao te rabakau ra are i nanoia?” (Ieremia 8:9, BG) Ibukin aroia anne, e a riki Ierutarem bwa ‘te kaawa ae katuturaraa,’ ae onrake ni ‘bwaai aika riai ni bati n ribaaki.’ N tokina, e a uruakaki ao n tiku ni kamaroaa i nanon 70 te ririki.—Etekiera 22:2, BG; Ieremia 25:11.

E maiu te burabeti are Itaia n taai ake a rangi ni kangaanga i aon Iteraera rimoa. Ngke e ururing rikaaki, e a kairaki iai bwa e na tataekina te koaua ae kakawaki ibukin Iehova ae te Atua ao Ana Tua ni kangai: “Ngkana a roko am moti i aonaba, ao a reireiia n te raoiroi akana maeka i aonaba.”—Itaia 26:9, BG.

Ibukini kimwareirein Itaia, e a kairaki n te taamnei ae raoiroi bwa e na taetae ni burabetina ana tautaeka te Uea ae te Mesia ae Iesu Kristo ni kangai: “E na aki kaeti-taeka ni matairikini matana, ao E na aki motiki-taeka n ongon taningana: ma E na kaeti taekaia akana akea aia bwai n te raoiroi, ao E na motiki taekaia akana nimamanei n te aro ae riai.” (Itaia 11:3, 4, BG) Ai kakukureira baika a kantaningaaki ibukia aomata nako aika a aantaeka nakon te Uea ae te Mesia i aan Ana Tautaeka n Uea te Atua!—Mataio 6:10.