Baikara Koaua Ibukin te Kiritimati?

A kakaokoro bukini bukamaruan te Kiritimati irouia aomata aika mirion ma mirion ni katobibia te aonnaba. E reke iai aia tai ni bobotaki tabemwaang ma raoraoia ao aia utu. Ake tabeman riki, a iaiangoa te Atua iai ke a kabanea aia tai ni buokiia aomata aika maiu ni kainnano. Akea te nanououa bwa a boni manena mwakuri aikai irouia. Ma e ngae n anne, a irekereke mwakuri aika raraoi aikai ma iteran te bong ni motirawa ae buakaka aei.

Te moan, a bati aika a bukamarua te Kiritimati ibukina bwa a kakoauaa ae ana bongi ni bung Iesu. Ma a kakoauaa taani korei rongorongon rimoa ni katobibia te aonnaba bwa e aki ataaki raoi ana bong ni bung Iesu. E taekinaki n te boki ae The Christian Book of Why bwa “a rawa Kristian rimoa ni kaokoroa te bong teuana ae kanikinaeaki iai bungian Iesu” ibukina bwa a kan “raurenako ma mwakuri ni beekan ni kabane.” E kakaongora bwa e aki kaotaki n te Baibara ae e bukamarua oin ana bongi ni bung Iesu ke aomata riki tabeman. Ni kaitaraan anne, e anga ana tua nakoia taan rimwina bwa a na kakauringa matena.—Ruka 22:19.

Te kauoua, a bati taan rabakau i aon te Baibara aika a kakoauaa bwa a roko angiini katein te Kiritimati man aia katei beekan ao naake tiaki Kristian. A irekereke n aei Santa Kuraoti are teuare e anganga bwaai n tangira, n ikotaki naba ma kamanenaan te aeka ni kai teuana ae te mistletoe ao te kai ni Kakiritimati, te anga batia, kauraan taura nenea, bukamaruan te kiritimati, katamaroa aika uee ao ai aneneani kuuna ni Kiritimati. Ni kaineti ma katei aikai, e taekinaki ae kangai n te boki ae The Externals of the Catholic Church: “Ngkana ti karekei ke ti anganako bwaintangira ibukin te Kiritimati, ao ni katinei katamaroa aika uee ni mwengara ke n umwantabu, iraman mai buakora aika a ataia bwa ti boni bae ni karinei katei ni beekan?”

Ma e ngae n anne, ko kona n iangoia bwa akea buren te kakairi ni katei aika a taraa n raraoi aikai. Iangoa te katenua ni koaua aei bwa kaekaana. E aki kariaia te Atua renganani katei ni beekan ma te taromauri ae itiaki. E taku Iehova ae te Atua nakoia taan taromauria ake a aki ongeaba i aon Iteraera rimoa rinanon Ana burabeti ae Amota: “I ribai ami toa . . . . N na aki kukurei n ami botaki. Ko na uota nako neaan am anene mai Rou.”—Amota 5:21, 23, BG.

Bukin tera bwa a rangi ni matoa taeka akanne? Iangoi baike a karaoi aomata n te tautaeka n uea i aon Iteraera rimoa are i meang. E katikui uoman te kao te teei ni kaawa ake Tan ao Beta-era aia moan Uea are Ieroboam ao e kairoroia aomata bwa a na taromauri baikai, n oneani mwin are a na taromauria Iehova ae te Atua n te aro ae riai n te tembora i Ierutarem. E moana naba karaoan tooa ao e rineia ibonga ake a na buokiia aomata ni bukamarui.—1 Uea 12:26-33.

E taraa n raoiroi te bwai are a karaoia tibun Iteraera akanne. E koaua bwa a aki karaoi baikai ni kabane ibukin aran Atuaia are a taromauria ao ni kakukureia? E boni kaotaki n te aro ae mataata raoi ana namakin te Atua ibukin aeka ni mwakuri akanne, n Ana taeka aika matoa rinanon Amota ao burabeti riki tabeman. E taku te Atua rinanon te burabeti ae Maraki: “I aki bibitaki Ngai ae Iehova.” (Maraki 3:6, BG) E aki ngkanne kaotaki ana namakin te Atua ibukini botaki ni Kiritimati aika bati ni boong aikai?

Imwin iaiangoani koaua akana i eta akanne, a a tia aomata aika mirion ma mirion ni motinnanoia bwa a na aki bukamarua te Kiritimati. Ma e reke te kukurei ni koaua ngkana a kabanei aia tai ma raoraoia ao aia utu. Ao ni buokiia naba aika a maiu ni kainnano n taai ake a kani karaoi i nanon te ririki ni kabane.