Anaakin nanou ni kaekaan au titiraki man te Baibara aika mataata ao n eti raoi

AROU RIMOA:

I bungiaki i Székesfehérvár i Hungary, ae te kaawa ae bati rongorongona ae ururingaki i nanon 1,000 tabun te ririki n nako. E kananokawaki bwa I teimatoa n ururingi mwin ana urubwai te kauoua ni buaka n te aonnaba aika rangi ni bubuaka.

Ngke I uarereke, I a kaikawaaki irouia tibuu. I bon rangi n ururingia, ai moarara riki tibuu te aine ae Elisabeth. E kakorakoraa tangiran te Atua i nanou. I aki toki n tataro ma ngaia ngke tenua au ririki ni katoa tairiki, n te tataro ae aranaki n taai tabetai bwa Ana Tataro te Uea. Ma e ngae n anne, I a tibwa ataa nanon te tataro anne ngke e a kaan 30 au ririki.

A kawakinai tibuu ni moan rikirakeu ibukina bwa a mwakuri ni ngaina ao ni bong au karo ibukini kaikoan te mwane ae bon tau, bwa a aonga ni kabooa ara auti ae ti na mwengaraoi iai. Ma ni katoaa te kauoua ni Kaonobong n te namwakaina ao a bobotaki n amwarake kaain ara utu ni kabane. A bon rangi ni kakawaki irou taai ni bobotaki akanne.

E boni koro bukin aia iango au karo n 1958, bwa a a kona ni kabooa ara auti ae ti na maeka iai ngaira ake teniman. N tokina I a maeka ma au karo ao I a rangi ni kukurei! Ma onoua te namwakaina imwina ao e waekoa n toki kukurei bwa e a mate tamau n te kaentia.

E bon uruaki nanou ao I uringnga ae I tataro ni kangai: “I butiiko te Atua bwa ko na kamaiua tamau bwa I kainnanoia. Bukin tera bwa ko aki kaekai au tataro?” I rangi ni kan ataia bwa e nga ngkai tamau. I iango ni kangai: ‘E a mena ngkai i karawa? Ke e a bua ao n aki manga maiu?’ I boni bakantang irouia ataei tabeman ake iai aia karo.

Inanon ririki aika bati ao I kuri katoabong ni kawara te ruanimate. I katorobubua i rarikin ruanimaten tamau ao n tataro ni kangai: “Taiaoka te Atua, I kan ataia bwa e a mena ia tamau.” I tataro naba bwa N na ataia bwa tera manenan te maiu aei.

Ngke ai 13 au ririki, I a motinnanoia bwa N na reiakina te taetae n Tiaman. I iangoia bwa tao mai buakoni booki n te taetae n Tiaman aika bati ao ni kakawaki, tao I a kona ni karekei iai kaekaan au titiraki. N 1967, I a moana kamatebwaiana ni kaawan Jena ae boni mwakoron Tiaman Mainiku n te tai anne. I ingainga ni wareki aia boki taani karioiango mai Tiaman, ai moarara riki naake a tabe ma rikia aomata. E ngae ngke I kunei iango aika kakannongora, ma akea mai buakoia ae a karekea karauan raoi nanou. I teimatoa naba n tataro ibukini kaekaan au titiraki.

ARONI BITAKINI MAIU MAN TE BAIBARA:

I okira Hungary n 1970 ike I a kaitiboo iai ma Rose are e nang riki bwa buu. N te tai anne, e mena Hungary i aan te tautaeka ni Komuniti. N te tai ae aki maan imwini marera, ti a nako Austria. Tiara bwa ti na mwaing nako Sydney i Aotiteria, ae mena ai tamau iai.

E waekoa n reke au mwakuri i Austria. N te bong teuana, e a kaongoai raou ni mwakuri bwa I kona ni kunei kaekaan au titiraki ni kabane man te Baibara. E anganai booki tabeua ake a kabwarabwaraa te Baibara. I rangi ni mateakini booki akanne ao ni kan reiakina ae bati riki mai iai. Ngaia are I a kororeta nakoia Ana Tia Kakoaua Iehova ake taani boreeti booki ao ni bubutii riki tabeua.

N te bong are ti moani kauringa iai ara tai ni mare, ti a kawaraki iroun te tia Kakoaua ae te roro n rikirake ae kaain Austria. E uotii booki ake I bubutii ngkoa ao e anga nanona ni waakina te reirei n te Baibara ma ngai ao I a kariaia. Kioina ngke I rangi n ingainga ni kan atatai, ti a reirei uatai n te wiki ao ni kabanea aua te aoa!

E rangi n anaaki nanou n aroia taani Kakoaua n reireinai man te Baibara. Ngke a kaota aran te Atua ae Iehova man au Baibara n Hungary, e kuri kangaanga kakoauaana irou. N rorokou n taromauri n au Aro i nanon 27 te ririki ao I aki roko n te ongo aran te Atua naba teutana. E rangi n anaaki nanou ni kaekaan au tititiraki man te Baibara aika mataata ao n eti raoi. N te katoto, I reiakinna ae akea te bwai ae a namakinna aomata aika mate, kaanga aron ae a matunako. (Te Minita 9:5, 10; Ioane 11:11-15) I reiakin naba ana berita te Baibara ibukin te waaki ae boou i aon te aba are “a nang akea riki te mate” iai. (Te Kaotioti 21:3, 4) I kantaningaia bwa N na manga kaitiboo ma tamau bwa “a na boni mangauti” maate n te waaki ae boou i aon te aba.—Mwakuri 24:15.

E raonai n reirei n te Baibara Rose ma nanona ni koaua. E baitii rikirakera ni maiuakina ara reirei ao e bane tii i nanon uoua te namwakaina! Ti kakaaei bobotaki ni kabane ake a kakaraoaki n te Tabo n Taromauri irouia taani Kakoaua. A rangi n anaaki nanora n aia tangira Ana Tia Kakoaua Iehova, aia ibuobuoki ao katiteuanaakia i marenaia.—Ioane 13:34, 35.

N 1976, ti a kariaiakaki n nako Aotiteria. Ti waekoa ni kaitiboo ma Ana Tia Kakoaua Iehova ikekei ao a rangi ni kukurei ni butimwaeira taari n te aba anne. Ti a riki bwa taani Kakoaua n 1978.

AROU NI KAKABWAIAAKI:

N tokina, I a kunei kaekaan au titiraki ake I tabeaianga iai n te tai ae rangi ni maan. Ni kaanian Iehova ae te Atua, I a kunea naba bwa bon te Tama ae moan te raoiroi ae akea kabotauana. (Iakobo 4:8) Ao e korakora riki kantaningaani manga noran tamau are I riki mairouna, n te waaki ae boou i aon te aba ae e a kaan roko.—Ioane 5:28, 29.

Ti motinnanoa okiran Hungary n 1989 bwa ti aonga n tibwauai ara koaua nakoia raoraora, ara utu, n ikotaki naba ma tabeman ake ti bae ni kaitiboo ma ngaiia. Ti a tia ni kakabwaiaaki bwa ti a reireinia aomata aika bubua ma bubua mwaitiia man te Baibara. E raka i aon 70 mai buakoia ake a a tia n raonira ni beku ibukin Iehova, n ikotaki naba ma tinau ae tangiraki irou.

I bon tataro i nanon 17 te ririki ibukini kakaaeani kaekaan au titiraki. I teimatoa naba n tataro imwin 39 riki te ririki ao n te tai aei moa, I a kona ni kangai: “Ko rabwa Tamau are i karawa ae ko tangiraki, ibukini kaekaan au tataro mangke I uarereke.”