E Bitii Maiuia Aomata Te Baibara

A bita maiu titiraki aika tenua

Ana karaki Doris Eldred

TE RIRIKI AE BUNGIAKI IAI: 1949

ABANA: UNITED STATES

RONGORONGONA RIMOA: UKOUKORAN TE MAIU AE MANENA

AROU RIMOA: I ikawairake ni kaawan New York, i U.S.A ae uarereke ae Ancram. N te kaawa aei ao a mwaiti iai taabo ibukini kawakinaia kaao. Ni koauana, a bati riki taiani kao nakoia aomata.

A kaakaea te taromauri au utu n te Aro ae tii ngaia n ara kaawa. Ni katoa ingabongin te Taabati, e bae ni kaitiaka au kau tibuu te unimwaane ao imwina, N na bae ni kaea te reirei n Taabati ma au Baibara ae uarereke ma ni mainaina are e anganai tibuu te unnaine. Ti reireinaki ngai ma tariu ao mwaaneu bwa ti na mwakuri korakora, ti na karinerine ma n ibuobuoki nakoia kaain rarikira ao ni bwaina te kakaitau ibukini kakabwaiaakira.

Ngke I a ikawai ao I a mwaing nako mairouia au utu ao I a riki bwa te tia reirei. A bati au titiraki ibukin te Atua ao te maiu. Tabeman au ataei a boni wanawana ao ake tabeman a aki bati ma a rangi ni kekeiaki mwaaka. Tabeman a aki toamau rabwataia ao tabeman riki a rangi ni marurung. I namakinna bwa e aki eti te waaki anne. N tabetai, a kona n taekina ae kangai aia karo au ataei aika aki tau aia konabwai: “Bon aei te bwai ae e tangiria te Atua ibukin natiu.” I iangoia bwa bukin tera ngkai e kona te Atua ni kariaia bwa a na bungiaki ataei tabeman ma rabwataia ae aki toamau. Ni koauana, e aki karaoa ae kairua te merimeri.

I iango naba ni kangai: ‘Tera te bwai ae rangi ni manena ae I riai ni karaoia ni maiu?’ I namakinna bwa e rangi n tawe te ririki. I ikawairake n te utu ae raoiroi, I rin n taian reirei aika waaki raoi ao e a reke ngkai au mwakuri ae I tangiria. Ma ai aron ae bon akea naba bongan nikirani maiu. Ni koauana, au kantaninga bwa N na mare, N na karekea au auti ae rangi n tikiraoi, N na karikiia natiu, N na mwakuri ni karokoa I ritaea ao imwina N na maeka n te tabo are a tararuaaki iai kaara. I iangoia bwa bon iai manenan te maiu aei ke akea.

ARONI BITAKINI MAIU MAN TE BAIBARA: N tain te summer teuana ao I neweabaa aon Eurobe ma raou n tia reirei tabeman. Ti roko i Westminster Abbey, Notre-Dame de Paris ao i Vatican n ikotaki naba ma umwantabu aika bati aika uarereke. Ni katoai taabo ake I nako iai ao I bae n tabeki au titiraki iai. Imwini karairakiu nakoni mwengau are Sloatsburg i New York ao I kawari naba taian umwantabu aika bati, ma bon akea temanna ae kona ni karekea raun nanou ni kaekaan au titiraki.

N te bong teuana, e a kawarai temanna ataein te reirei ae 12 ana ririki ao n titirakinai titiraki aika tenua. Te moan, e bon titirakinai ngkana I ataia ae ngaia kaain Ana Tia Kakoaua Iehova. I taku nakoina: ‘Eng.’ Te kauoua, e titirakinai ngkana I kan ataa riki rongorongoia Ana Tia Kakoaua Iehova. I a manga taku riki: ‘Eng.’ Te katenua, e titirakinai bwa I memena ia. Ngke I tuangnga au tabo ao ti a ataia ae ngaia I boni maeka n te tabo ae kaan ma ana utu. I aki ataia ae ngaia a na boni bita maiu titiraki aika tenua akanne.

E aki maan imwin anne, e a bwatika nakoni mwengau ao ni moana te reirei n te Baibara ma ngai. I bon titirakinna taian titiraki ake I titirakinia iai ngkoa mataniwi n Aaro aika bati. E kaokoro ma te koraki akekei bwa e kaotii nakoiu kaekaan au titiraki aika mataata ao ni karaunano man au Baibara aika I tuai man ongongo mai mwaina!

I namakina te kimwareirei ao te raunnano ni baike I reiakini n te Baibara. E bon anaaki nanou ngke I wareka 1 Ioane 5:19 ae kangai: “A bane kaain te aonnaba ni mena i aani mwaakan teuare buakaka.” I kabebeteaki n ataakin ae bon tiaki te Atua ae karikii rawawata ni kabane aika ti otabwaniniaki iai, ma bon Tatan ao e na boni katoka te kangaanga anne te Atua. (Te Kaotioti 21:3, 4) I a ataia ae ko kona n ota n te Baibara ngkana e kabwarabwaraaki raoi. E ngae ngke tii 12 ana ririki te tia Kakoaua are e reirei ma ngai ma I iangoa te koaua bwa bon te koaua n aki ongeia bwa antai ae e taekinna.

Ma e ngae n anne, I tangiria n noria bwa a boni maiuakina te baere a tataekinna taani Kakoaua ke a aki. N te katoto, e katereterea te teinnaine aei bwa a maiuakini aroaro n aron te taotaonakinnano ao te akoi Kristian ni koaua. (I-Karatia 5:22, 23) I iangoia bwa N na tuoa n noria bwa e maiuakini aroaro akanne ke e aki. N te bong teuana, I a iangoia bwa N na rimwi nakon au reirei ao I iango ni kangai: ‘E koaua bwa e na bon tataningai? Ao ngkana e tataningai, e koaua bwa e na aki un ngkai I rimwi?’ Ngke I roko ao I noria bwa e bon tataningai i matan au auti. E kawarai n au kaa ao e taku: “N nang bon okira mwengau ao n tuanga tinau bwa ti riai n tareboonia te onnaoraki ao te tabo ni bureitiman n noriko iai ibukina bwa ko aki ririmwi nakon am reirei. I rangi n raraoma iroum!”

N te taina, I a titirakinna n te titiraki ae I iangoia bwa e na rangi ni kangaanga kaekaana iroun te ataei ae 12 ana ririki. I kan noria bwa e na boni karioi ana kaeka ke e aki. Ngke I titirakinna ao e kamwataua taraakiu ao e taku: “E kangaanga te titiraki anne. N na koreia ao N na tuangia au karo.” E boni karaoa anne ao n rokona n te bong are imwina, e a uouota Te Taua-n-Tantani are e koreaki iai kaekaan au titiraki. Aei are e a anaaki iai nanou irouia taani Kakoaua bwa a bane ni katauraoaki kaekaan au titiraki n aia boki aika boto man te Baibara. I reitaanako au reirei n te Baibara ma te teinnaine anne ao teuana te ririki imwina, I a bwabetitoaki bwa temanna Ana Tia Kakoaua Iehova.a

AROU NI KAKABWAIAAKI: Ngke a a reke kaekaan au titiraki aika karaunano, I a tangiria ni manga tibwaia nakoia aomata. (Mataio 12:35) N te moantai, a boni kakaitaraai au utu ibukin au koaua ae boou. Ma imwin tabeua te tai, e a moanna ni karaurau aroia anne. E moana reireina tinau n te Baibara ngke e a boni kara. E ngae ngke e mate imwaini bwabetitoana, I aki nanououa bwa e boni bae n tia ni motinnanoia bwa e na beku ibukin Iehova.

N 1978, I a mare ma te tia Kakoaua ae arana Elias Kazan. N 1981, ti a kaoaki bwa ti na riki bwa kaain te utu ni Betaera n te United States.b E kananokawaki bwa imwin ara beku ikanne i nanon aua te ririki ao e a mate Elias. E ngae ngke ai akea buu, ma I teimatoa ni karaoa mwiokoau n te Betaera ike e a reke iai angau ni kaatuua au iango i aon te bwai teuana ao ni karekea nakoiu te kabebetenano ae bati.

N 2006, I a manga mare ma Richard Eldred ae kaain naba te utu ni Betaera. Ti teimatoa ni kukurei ni mwiokoara ae te beku n te Betaera. Man ataakin te koaua ibukin te Atua, I a namakina iai ae I aki tii karekei kaekaan au titiraki ake I ukoukori kaekaaia ma I karekea naba te maiu ae rangi ni manena. Ao e moan reke anne man titiraki aika tenua ake a tabekaki iroun te teinnaine.

[Kabwarabwara ae nano]