Kanoana

A kona ni karawawataaki ara iango ni kangaanga ao te raraoma ike a a tinetine iai baira n te aro ni kaikonaki. Iangoa aroni mwaakani bain Iehova ni kona ni kakorakoraira ao ni kaninikoriaira bwa ti na nanomwaaka. Ao noria bwa tera ae ko kona ni karaoia bwa ko aonga ni “kaunrabwata” ke ni kabokorakora ibukini kakabwaiaam mairoun Iehova.

A tangiria ana toro te Atua ni katobibia te aonnaba bwa a na taraaraoi, a na itiaki, ao n aki kamatauninga n aroia ni kunnikainia ao ni katamaroaia, ngaia are a maiuakin ana boto n reirei te Baibara. Ko na kangaa n taraia raoi bwa e na reke neboan te Atua n arom ni kunnikainiko?

Ni kaongora aika uoua aikai, ti na nori iai aroia rooro n rikirake n reiakina aroia ni kamanena aia konabwai n iango ibukini kakorakoraan ao kateani bukin aia onimaki. Ti na nora naba aroia kaaro aika Kristian ni karaoa ae e na kakaongora riki irouia natiia karikirakean onimakinan te Atua ao ana Taeka.