Taan Toka i Aoia Aoti Aika Aman ao Ngkoe

Taan Toka i Aoia Aoti Aika Aman ao Ngkoe Akea bwa a a kaoti, ao a a bukibuki waeia! Aoti aika aman aika korakora aikai ma taan toka i aoia, a kaota te taamnei ae teretere raoi, ao e taraa n ae a nang bon otinako man iteraniba aika n te Baibara! Te moan aoti e boni mainaina, ao teuare toka i aona bon te uea ae boou, ao e mimitong. E rimwiaki n te aoti ae uraura, ao e toka iai te tia uotaanako te rau man te aonnaba ni kabutaa. E rimwiaki n te kateniman n aoti ae roroo n aron te nukanibong, ma te tia toka i aona ae e taua i eta te kainikatine, ao e a katanoataaki te rongorongo ae kananokawaki ae taekan taren te amwarake. Karan te aoti are te kaaman e boni maii, ae kanikinaea te aoraki ma bwaai riki aika kamamate, ao teuare toka i aona bon te Mate. Ao e rimwiaki iroun te Ruanimate n uakaan ma ngaia, ae taekan ruanimaten te botannaomata, ni karaoa te mwakuri n tai ae rangi ni kakamaaku, ae taiakini maiuia aomata!​—Te Kaotioti 6:​1-8.

“I boni maaku ngke I moani wareka taekaia taan toka i aoia aoti aika aman aikai. Irou e nangi bon roko te Bong ni Motikitaeka, ao e na bon aki reke maiuu, bwa I tuai n tauraoi.”​—Crystal.

“E kamimi irou taekaia naaka aman aikai aika toka i aoia aoti aika kakaokoro karaia. Ma ngke I a ataa nanon te miitara aei, ao a a mataata raoi bwaai ni kabane.”​—Ed.

Titeboo am namakin ma Crystal, ibukia taan toka i aoia aoti aika aman ake a taekinaki n Te Kaotioti? Ke titeboo ma Ed? N aki ongeia bwa tera am namakin, ma mwanangaia taan toka i aoia aoti aikai, e kaota te rongorongo ae rangi n ataaki n Te Kaotioti, are kabaneani bokin te Baibara. Ko ataia ae ko na kakabwaiaaki ngkana ko ota n te miitara aei? N te aro raa? E berita te Atua bwa ko na kukurei ni koaua, mani warekan, reiakinan, ao kaboraoani maium ma baika n te boki n taetae ni burabeti aei.​—Te Kaotioti 1:​1-3.

E ngae ngke iai tabeman aika maaku n te miitara ae taekaia taan toka i aoia aoti aika aman aikai, ma e bon aki katauraoaki te miitara aei bwa e na kakamaakuko. Iai mirion ma mirion ake a a tia ni kakorakoraaki aia onimaki iai, ao ni karekea te kantaninga ae kakukurei ibukin taai aika a na roko. E kona naba n riki anne nakoim. Taiaoka ma reitaanako am wareware.