“Ke E Kakabwaiako te Atua Ibukini Wanawanam!”

TAEKA akanne bon ana taeka Tawita are kaain Iteraera rimoa, ngke e kamoamoaa te aine ae e kaitiboo ma ngaia. Aran neiei Abikaira. Tera ae kauekea kamoamoaana iroun Tawita, ao ti na kangaa ni kakabwaiaaki n ana katoto neiei?

E kaitiboo ma te aine ae iai buuna aei Tawita ngke e birinako mairoun te Uea are Tauro. E mare Abikaira ma Nabara ae te mwaane ae kaubwai, ae a rangi ni bati ana nanai ni man n aonon Iuta i maiaki ae maungaunga. E a tia n riki Tawita ma ana rorobuaka bwa ‘ai aron te oo ni kamanomano’ ibukia ana nanai ni man Nabara ao taani kawakinia. Imwina riki, e kanakoia taan uataeka Tawita nakon Nabara ni butiia te amwarake ‘ae kona n reke irouna.’ (1Tam. 25:8, 15, 16) Bon tiaki te bubutii ae riao anne, moarara riki ngkai e a tia Tawita ma ana rorobuaka ni kamanoi ana bwai Nabara.

Ma e bon toua mwin arana Nabara, ae nanona “Nanobaba” ke “Baba.” E aki butimwaea ana bubutii Tawita ao e taetae n aki akaka ao n te aro ae aki riai. Ngaia are e a katauraoia Tawita bwa e nang katuuaaea Nabara ibukin ana kaeka ae kammaraki ao ae aki riai. E nang reke kain Nabara ma kaaini batana ibukin nanobabana.—1Tam. 25:2-13, 21, 22.

E ataa karuanikaini mwin te baere e nang ienikuriaki ni karaoaki Abikaira, ngaia are e ninikoria n taobaraia. E karinerine ni bubutiia Tawita, ni kabotoa ana bubutii i aon ana iraorao teuaei ma Iehova. Ao e katauraoa te tianaki te amwarake ae tau nakon Tawita are e na riki bwa te uea imwina, ao nakoia ana rorobuaka. E ataia Tawita ae e kamanena neiei Iehova bwa e na tukia mani karaoan te bwai ae bure i matana. E taku Tawita nakon Abikaira: “Ke e kakabwaiako te Atua ibukini wanawanam! Ko bia kakabwaiaaki ibukina bwa ko tukai n te bong aei man te katuturaraa.”—1Tam. 25:18, 19, 23-35.

Ti ataia raoi ae ti aki kani katotonga Nabara n aki kakaitau ni baika raraoi aika karaoaki ibukira. Irarikina, ngkana ti noria bwa nang moanna n riki te kangaanga ae korakora, ti riai ni kabanea ara kona n tuka rikina. Eng, ti kona n taekina ana taeka te tia areru are tuanga te Atua ni kangai: “Reireinai ataakin te riai ma te atatai.”—TaiAre. 119:66.

A kona tabemwaang n nora ara ataibwai ke wanawanara n ara mwakuri. Ao e ngae ngke a taekinna ke a aki, ma a kona naba n namakina are iroun Tawita, are kangai: “Ke e kakabwaiako te Atua ibukini wanawanam!”