Mwakuri ma Iehova ni Katoabong

1. N aaro raa ake ti kona ni mwakuri iai ma Iehova?

E IANGOIIA aomata aika aki kororaoi te tia Karikiriki bwa a na kaai ni mwakuri ma ngaia ni kakororaoi ana kantaninga. E ngae ngke a aki kororaoi aomata n taai aikai, ma a kona ni mwakuri ma Iehova ni katoabong aomata aika kakaonimaki. N te katoto, bon “raon te Atua ni mwakuri ngaira” ngkana ti tataekina te rongorongo ae raoiroi ae taekan te Tautaeka n Uea ao ni karekeia taan rimwini Kristo. (1Kor. 3:5-9) Iangoa aei, ai kakabwaiaakira ngaira ngkai ti katauaki bwa ti na kaai ni mwakuri ma te tia Karikii bwaai ni kabane ae moan te mwaaka n te beku ae rangi ni kakawaki irouna! Ma e ngae n anne, tataekinan te rongorongo ao karekeaia taan rimwini Kristo bon tiaki tii aanga aika ti kona ni mwakuri iai ma Iehova. E na rinanoaki n te kaongora aei aanga riki tabeua ibukin anne n aroni buokaia ara utu ao raora n te onimaki, akoaia iruwa, te anganano n te mwakuri ni kateitei, ao karababaan ara mwakuri ae tabu.—IKoro. 3:23.

2. E aera bwa ti aki wanawana ngkana ti kabotaua te bwai ae ti karaoia ibukini boutokaan ana kantaninga Iehova ma ae a karaoia tabemwaang?

² Ngkana ti rinanon te kaongora aei, tai kabotaua te bwai ae ko kona ni karaoia ibukin Iehova ma ae a kona ni karaoia tabemwaang. Uringnga bwa e kaokoro te ririki ni maiu, te marurung, baika riiriki, ao aia konabwai aomata n tatabemania nako. E taku te abotoro Bauro i aani kairana n te taamnei: “Ke e tuoa oin ana mwakuri temanna ma temanna, ao e na karekea iai bukini kimwareireina i bon irouna, ma tiaki n te kabotaua ma temanna.”—IKar. 6:4.

BUOKIIA AM UTU AO RAOM N TE ONIMAKI

3. E aera bwa e kona n taekinaki ae a mwakuri ma te Atua aomata nako aika tabeakinia aia utu?

³ E kantaningaiia Iehova ana toro bwa a na tabeakinia kaain aia utu. N te katoto, ko bae ni karekea am mwakuri ni kareketianti ibukini baika kainnanoi am utu. A bati tiina aika titiku n te mwenga n tararuaiia natiia aika uarereke. A riai ataei aika ikawai riki n tararuaiia aia karo aika kara. A bon riai ni karaoaki mwakuri aikai. E taku Ana Taeka te Atua: “Ngkana iai temanna ae aki karekei kainnanoia ana koraki ake e bon riai n tabeakinia, ai moarara riki ake boni kaaini batana, ao e kakeaa te onimaki ao e buakaka riki nakon te aomata ae aki onimaki.” (1Tim. 5:8) Ngkana iai mwiokoam ibukin am utu, ko bae n aki kona ni karaoa ae bati n am beku iroun Iehova n aron ae ko tangiria. Ma tai kabwaraa nanom! E kukurei Iehova ngkana ko katauraoi baika kainnanoi am utu.—1Kor. 10:31.

4. A na kangaa kaaro ni moanibwaia te Tautaeka n Uea nakon nanoia, ao tera mwina?

⁴ A kona ni kaai ni mwakuri ma Iehova kaaro aika Kristian ngkana a buokiia natiia ni katei tiaia n aia mwakuri ibukin Iehova. A bati kaaro aika a a tia ni karaoa anne ao imwina riki, a noriia natiia bwa a a beku ni kabwanina aia tai n taabo aika raroanako mani mwengaia. Tabeman a mitinare, ake tabeman a bwaiania n taabo ake e korakora riki iai kainnanoaia taan uarongorongo, ao tabeman a beku n te Betaera. Te taeka ae raroanako, e kona n nanonaki iai bwa n angiin te tai a aki kona kaaro ni bobotaki ma natiia aikai n aron ae a tangiria. E ngae n anne, kaaro aika anga boni ngaiia a kaungaia natiia bwa a na botumwaaka ni mwiokoaia. Bukin tera? A rangi ni kimwareirei ao n rau nanoia n ataakin ae a moanibwaia te Tautaeka n Uea natiia. (3Ioa. 4) A bae ni bati i buakoia kaaro aikai ake titeboo aia namakin ma Anna are taekinna bwa “bon ana bwai Iehova” natina ae Tamuera. A iangoia kaaro aikai bwa bon te kakabwaia te mwakuri ma Iehova n te aro aei. A na bon aki tangira te bwai teuana riki irarikin aei.—1Tam. 1:28.

5. Ko na kangaa n anga te ibuobuoki ae manena nakoia kaain am ekaretia? (Nora te taamnei ni moan te kaongora aei.)

⁵ Ngkana akea katabetabeam n am utu, ko kona ni buokiia taari aika aoraki ke a a kara, ke a kainnanoi bwaai riki tabeua? Ke ko kona ni buokiia naake a tararuaiia? E aera bwa ko aki kakaaeia n am ekaretia aika kainnanoa te ibuobuoki? N te katoto, tao iai te tari te aine ae tararuaiia ana karo aika kara. Ko kona n tabeakinia ana karo neiei bwa e aonga ni karaoi tabena ake tabeua riki? Ke tao ko kona ni buokiia naake a kainnanoa te ibuobuoki ngkana ko anaiia nakon te taromauri, nakon te titooa, ko karekei bwaai tabeua ibukia, ke kawaran temanna n te onnaoraki. Karaoan anne, ko a kona iai ni mwakuri ma Iehova ni kaekaa ana tataro temanna.—Wareka 1 I-Korinto 10:24.

AKOIIA IRUWA

6. Tera ae irekereke ma kaotiotan te akoi?

⁶ A kinaaki raon te Atua n aroia n akoiia iruwa. N te Koroboki ni Kristian ae Tabu n te Taetae ni Kuriiti, te taeka ae rairaki bwa “akoi” nanona “akoiia iruwa.” (Ebera 13:2) Iai n Ana Taeka te Atua rongorongo aika ti reireiaki iai arora ni kaota te aeka n tangira anne. (KBwaai 18:1-5) Ti kona ao ti riai ni katoatai ni kakaaei aanga ibukini buokaia tabemwaang n aki ongeia bwa a “katiteuanaaki ma ngaira n te onimaki” ke a aki.—IKar. 6:10.

7. Tera te kakabwaia ni kaotiotan te akoi nakoia naake a beku ni kabwanina aia tai aika roko n am tabo?

⁷ Ko kona ni mwakuri ma te Atua n arom ni kaotiota te akoi nakoia taari ake a beku ni kabwanina aia tai aika kawara am tabo? (Wareka 3 Ioane 5, 8.) N angiin te tai, e reke iai te tai n “ikaungaunga i marenara.” (IRom 1:11, 12) Iangoa te baere e rinanona Olaf. E taekinna teuaei bwa tabeua te ririki n nako, akea n ana ekaretia ae kona ni kamaekaa irouna te mataniwi ae mwamwananga ae akea buuna. E bubutiia ana karo aika tiaki kaain te onimaki Olaf ngkana e kona n tiku teuanne n aia auti ao a kariaia, ma a tuangnga bwa e na matu ngaia n te kaintekateka. Anne ae e karaoia Olaf ao e aki uringaaba iai. Ai materaoira te bitaki aei! E taku: “Ai kakukureira te wiki anne! I utimwaaka ni katoa ingabong ma te mataniwi ae mwamwananga ao ti maroroakin reirei aika kakaongora ngkana ti kaingabong. E kauekea i nanou te kani beku ni kabwanina au tai te kaungaunga ae I karekea.” E a tia ni beku Olaf bwa te mitinare n aaba aika kakaokoro i nanon 40 te ririki n nako.

8. E aera bwa ti riai ni kaota te akoi e ngae naba ngkana a taraa n aki kakaitau aomata? Kabwarabwaraa.

⁸ Ko kona ni kaota te tangira nakoia iruwa n aaro aika bati, e ngae naba ngkana ko aki kaitauaki n am mwakuri. Iangoa te katoto aei. Ngke e reirei n te Baibara te tari te aine temanna i Tibein ma Yesica mai Ecuador ao e a noria bwa e a aki totoki tangin neiei. E titiraki te tari aei bwa tera ae riki. E kaekaa Yesica bwa imwaini mwaingina e boni maiu ni kainnano ao n te bong teuana ai bon akea kanana. Akea te bwai ae e kona n angan natina te aine bwa tii te ran. E kataia n uouoa natina bwa e aonga ni matu ao e tataro ibukini buokana. Ao a a roko naba uoman taani Kakoaua ni kawaria, ma e aki butimwaeiia raoi Yesica ao e raeuaa te maekatin are a anganna taari akanne ao e taku. “Aio te amwarake ae kam tangiria bwa N na angan natiu?” A kataia taari aikai ni kabebetea nanona ma akea uaana. Imwina riki, a a katuka te bwaene n amwarake n ana mataroa. E ringaki nanon Yesica n aia akoi ao e uringaaba ngke e a tia n aki mutiakina kaekaan ana tataro mairoun te Atua. Ma e a kamatoaa nanona ngkai bwa e na beku ibukin Iehova. Ai raoiroira mwin aia tituaraoi anne!—TeMin. 11:1, 6.

ANGANANO IBUKIN TE MWAKURI NI KATEITEI

9, 10. (a) Baikara taai tabeua ake e kainnanoaki iai te anganano i buakoia ana aomata te Atua n taai ake a karakinaki n te Baibara? (b) N aaro raa ake a kona n ibuobuoki iai taari mwaane n te ekaretia?

⁹ N taai aika bati n rongorongoia tibun Iteraera rimoa, ao a rangi ni kainnanoaki aomata aika iai nanoia ni kan anga. (TeOti. 36:2; 1Rong. 29:5; Neem. 11:2) Ni boong aikai, a bati naba taai ake ko kona iai n anga am tai, am bwai, ao rabakaum, ibukini buokaia taari. Ane ko na namakina iai te kimwareirei ao kakabwaia aika bati man am anganano.

¹⁰ A kaungaaki aomata n Ana Taeka te Atua bwa a na mwakuri ma Iehova n aroia n uaiakina te beku bwa tabonibai n te ekaretia ke unimwaane. (1Tim. 3:1, 8, 9; 1Bet. 5:2, 3) Te koraki ake a karaoa aei, a kani buokiia tabemwaang ni bwaai n rabwata ao n te onimaki. (Mwa. 6:1-4) A a tia unimwaane n tuangko bwa ko kukurei ni beku bwa te tia ibuobuoki ke n ibuobuoki n tararuai booki, te mwabe, te onobwai, ke bwaai riki tabeua? Ane a na tuangko taari ake a kakaraoa aei bwa e rangi ni kakukurei buokaia aomata.

11. E kangaa te tari te aine temanna ni kakabwaiaaki man ana iraorao n taai ni kateitei?

¹¹ N angiin te tai, a rereke raoraoia aika boou naake a anganano n te mwakuri ni kateitei. Iangoa ana katoto Margie ae te tari te aine ae beku i nanon 18 te ririki n te mwakuri ni kateitei ibukin Taabo n Taromauri. E buoka kataneiaakia tabeman taari aine n te mwakuri aei i nanon ririki aika bati. E kunea neiei bwa te mwakuri aei bon te anga ae moan te tamaroa ibukin te ikaungaunga n te onimaki. (IRom 1:12) N taai ake e taonaki iai Margie n te kangaanga, e karekea kaungaana mairouia naake e iraorao ma ngaiia n tain te kateitei. Ko a tia n anganano ibukin te mwakuri ni kateitei? Ngkana tao ko rabakau ke ko aki, ma ko kona ni kamwawaa am tai ibukin aei?

12. Ko na kangaa n ibuobuoki imwin te kabuanibwai?

¹² Ngkana e riki te kabuanibwai, e a reke aia tai ana aomata te Atua ni mwakuri ma ngaia ni buokiia taari n aaro aika manena. N te katoto, a anga aia ibuobuoki te mwane nakoia naake a rotakibuaka. (Ioa. 13:34, 35; Mwa. 11:27-30) Te anga riki teuana boni buokan te kaitiaki ao te onobwai imwin te kabuanibwai. Gabriela ae kaain Poland bon te tari te aine temanna ae urubekebeke mwengana n te ieka, ma e kukurei n noriia taari man te ekaretia ae uakaan ma ngaia ngke a roko ni buokia. E taku: “I aki kan taekin au bwai aika bua bwa bon tii bwaai. Ma I kani kaongoingkami baika bati ake I karekei. E karauaki nanou n te bwai ae riki aei bwa kaainakin te ekaretia ni Kristian bon te kakabwaia ae okoro ao nibwan naba te kimwareirei ao te kukurei.” A bati ake a buokaki imwin te kabuanibwai ake a taekinna bwa a a bati riki baika karekei man te bwai ae riki nakoia. Ao naake a mwakuri ma Iehova ni buokiia taari aikai, a boni karekea te raunnano ae bati.—Wareka Mwakuri 20:35; 2 I-Korinto 9:6, 7.

13. E na kangaa ni kakorakoraaki ara iraorao ma Iehova man ara anganano? Taekina te katoto.

¹³ A karekea te kimwareirei ae reke man te mwakuri ma Iehova Stephanie ao taan uarongorongo riki tabeman ngke a buokiia taari ake a birinako nakon te United States ibukin te buaka i abaia. A buokiia utu aikai ni karekea aia auti ao bwain nanona. E taku Stephanie: “A rotaki nanora ni kimwareireia ao aia kakaitau ngke a nora te tangira man aia botaki n itaritari ae katobibia te aonnaba. A iangoia utu aikai bwa ti a tia ni buokiia, ma ni koauana, e bati riki buokara mairouia.” E reitia n taku: “E a kakorakoraa riki tangiran Iehova iroura noran te tangira, te katiteuanaaki, te onimaki, ao aei e a karikirakea riki ara kakaitau ibukini bwaai nako ake ti karekei rinanon ana botaki.”

KARABABAANAKO AM BEKU IBUKIN IEHOVA

14, 15. (a) Tera te nano are e kaotia te burabeti are Itaia? (b) A na kangaa taan uarongorongoa te Tautaeka n Uea ni boong aikai ni kakairi iroun Itaia?

¹⁴ Ko kani kabatiaa riki am tai ni mwakuri ma Iehova? Ko kukurei ni mwaing nakon taabo ake e korakora riki iai kainnanoaia taani mwakuri n ana botaki? Ni koauana, tiaki nanona bwa a riai ni mwananga ana toro te Atua nakon te tabo ae raroa ma mwengaia ao a a tibwa kona ni kaotiota iai te tituaraoi. Ma iai taari tabeman ake e angaraoi irouia te mwananga nakon taabo aika raroa riki. Titeboo aroia ma te burabeti are Itaia. Ngke e titiraki Iehova ni kangai: “Antai ae N na kanakoa, ao antai ae e na nako ibukira?” Ao e kaeka ni kangai: “Aio ngai! Kanakoai!” (Ita. 6:8) Ko tauraoi ao e angaraoi iroum te ibuobuoki ni baika kainnanoaki riki n ana botaki te Atua? Baikara aanga tabeua ake ko kona n ibuobuoki iai?

¹⁵ Ni kaineti ma te uarongorongo ao karekeaia taan rimwini Kristo, e taku Iesu: “A a rangi ni bati uaa aika riai n taiaki ngkai, ma a karako taani mwakuri. Mangaia ae butiia Mataniwin te tai bwa e na kanakoia taani mwakuri nakon taiakin ana uaa.” (Mat. 9:37, 38) Ko kona ni beku bwa te bwaiania n te tabo ae korakora riki iai kainnanoan te ibuobuoki? Ke ko kona ni buoka temanna riki bwa e na karaoa anne? A bati taari aika iangoia bwa te anga ae te kabanea n tamaroa ibukini kaotan tangiran te Atua ao raoia n aomata, bon te bwaiania n taabo ke n aono ake a kainnanoaki riki iai taan tai. Ko kona n iangoi aanga riki tabeua ake ko kona ni karababaa ke ni kabatiaa riki iai am mwakuri ni minita? E na korakora te kimwareirei ni karaoan anne.

16, 17. Baikara aanga tabeua ake ko kona ni karababaa iai am beku ibukin Iehova?

¹⁶ Ko kukurei ni beku n te Betaera ke n ibuobuoki n te mwakuri ni kateitei n ana botaki te Atua i nanon tabeua te tai ke teuana te bong ke e bati riki n te wiki? A teimatoa ni kainnanoaki n ana botaki Iehova naake a kukurei ni beku n taabo ake a mwiokoaki nako iai ao ni karaoi baike a mwiokoaki iai. E bae n tangiraki n aei bwa a na mwakuri n taabo ake a kainnanoaki riki iai, e ngae ngke a rabakau ke a mwaatai n te itera riki teuana. Ma e kakawaki iroun Iehova te nano ni kan anga ae kaotaki irouia naake a kukurei ni beku n taabo ake e kainnanoaki iai te ibuobuoki.—TaiAre. 110:3.

¹⁷ Ko tangira te reirei ni kataneiai riki bwa ko aonga n taubobonga riki ibukin am beku ae tabu? Ngkana ngaia anne, ko kona ni kanoaa te booma ni bubutii nakon Te Kuura Ibukia Taan Uarongorongoa te Tautaeka n Uea. N te kuura aei, a reireinaki ni kataneiaaki iai taari aika beku ni kabwanina aia tai bwa a aonga ni karababaanako riki aia beku. A riai naake a kororeta ni bubutii rinia n te reirei aei ni kukurei ni butimwaei mwioko nako imwin aia angabeeba. Ko kukurei ni kamanena te tai aei n uaiakin iai mwioko aika kakawaki riki?—1Kor. 9:23.

18. Baikara kakabwaia n te mwakuri ma Iehova ni katoabong?

¹⁸ Ngkai ana aomata Iehova ngaira ti a kaungaaki bwa ti na tituaraoi, ae te aroaro ae kaotiotaki iai te raoiroi, te akoi, ao te tangira ae tabeakinaia aomata ni katoabong. Ni karaoan anne, ti a karekea iai te kimwareirei, te rau, ao te kukurei. (IKar. 5:22, 23) N aki ongei baika riki ni maium, ma ko boni kona ni karekea kimwareireim ngkana ko kakairi n aroaron Iehova ae te tituaraoi, ao ngkana ko riki bwa temanna i buakoia raona ni mwakuri aika kakawaki irouna!—TaeRab. 3:9, 10.