Nimaua Aanga Ibukini Karekeaia Ara Reirei n te Baibara
1. Ngkana e kangaanga n ara aono karekean te aomata ae ti na reirei ma ngaia n te Baibara, tera ae ti riai ni karaoia ao bukin tera?
1 Ko a tia ni kunea bwa e kangaanga karekean temanna ae ko na reirei ma ngaia n te Baibara? Teimatoa ni kakaaea ae ko na reirei ma ngaia n te Baibara. E kakabwaiaia Iehova te koraki ake e aki bwara nanoia ni kakaraoa nanona. (IKar. 6:9) Iai nimaua aanga aika oti i nano ibukini buokam.
2. Ti na kanga n titirakinia aomata bwa a kan reirei n te Baibara, ibukini moanakin te reirei ma ngaiia?
2 Titirakinia Aomata Bwa A Kan Reirei n te Baibara: A bati aomata aika a ataia ae ti tibwaa nako Te Taua-n-Tantani ao te Awake!, ma a bae n aki ataia ae ti kairi reirei n te Baibara ma aomata. Ngkana ko kawara te auti teuana ma teuana ao e aera ko a aki titirakinia bwa a kan reirei n te Baibara? Ko kona naba n titirakinia bwa a kan reirei n te Baibara, aomata aika kan ongora ake ko kawariia. Ngkana a aki kan reirei n te Baibara, ko kona n teimatoa ni katikui booki irouia ao ni karikirakea kan ongoraeia. E aki toki temanna te tari te mwaane ni kakawariia te taanga teuana i nanon ririki aika bati n tain tibwaakin te maekatin. Ngke e a tia te tari aei ni katikui irouia maekatin aika boou ao e a tii rio naba n ana iango imwain ae e nako, te titiraki ae kangai: “Kam kan reirei n te Baibara?” E kubanako ngke a kaekaa bwa a kan reirei. A a tia ni bwabetitoaki ngkai te taanga aei.
3. Ti riai n iangoia bwa a reirei n te Baibara te koraki ake a kaakaei bobotaki? Kabwarabwaraa.
3 Titirakinia Naake A Kaakaei Bobotaki: Tai iangoia bwa a reirei n te Baibara te koraki aika kan ongora, ake ko nonoria ni bobotakin te ekaretia. E ribootinna temanna te tari te mwaane ni kangai: “E raka i aon iterani mwaitiia au reirei n te Baibara, aomata aika I reirei ngkai ma ngaiia aika reke ngke I kakataetaeia ngkana a roko ni bobotaki.” E iangoia temanna te tari te aine bwa e na kawara te aine ae mamaamaa ae iai uoman natina aine n te ekaretia aika a a tia ni bwabetitoaki. E kaakaei bobotaki te aine aei i nanon 15 te ririki, ao e roroko n te Tabo n Taromauri ngkana e moanaki te botaki ao ni waekoa naba n nako ngkana e bwara. E kariaia te aine aei bwa e na reirei n te Baibara, ao n tokina e a riki bwa te tia kakoaua temanna. E korea ae kangai te tari te aine arei: “I nanokawaki ngke I aki titirakinna i nanon 15 te ririki bwa e kan reirei n te Baibara!”
4. Ti na kanga ni kakaaeia ara reirei n te Baibara ngkana ti titirakinia tabemwaang ibukia aomata riki tabeman aika a kan reirei n te Baibara?
4 Titirakinia Tabemwaang Ibukia Aika A Kan Reirei: E kataia temanna te tari te aine n tuangia tabemwaang bwa e na katoaia nakon aia reirei n te Baibara. Ngkana e a ira te aomata anne nakon ana reirei n te Baibara, ao e a manga titirakina te aomata are a reirei ma ngaia bwa iai ae e kinaa ae e kan reirei n te Baibara. Ngkana ko katuka te boki ae Ana Reirei te Baibara iroun te aomata ae ko kakawaria, ko kona n titirakinna ni kangai: “Iai ae ko kinaa ae tangira ana boki ae aekakin aei?” N tabetai ao e kona n angabuaka baika riiriki ni maiuia taan uarongorongo ao bwaiania, bwa a na kaira te reirei n te Baibara ma te aomata ae a kaitiboo ma ngaia n aia aono. Mangaia are kaongoia tabemwaang ae ko tauraoi ni kaira te reirei n te Baibara ma aomata.
5. Bukin tera bwa ti kona n titirakinia buuia taari n te ekaretia aika tiaki kaain te onimaki bwa a kan reirei n te Baibara?
5 Buuia Taari Aika Tiaki Kaain te Onimaki: Iai taan uarongorongo n am ekaretia ae tiaki kaain te onimaki buuia? A rawa tabeman aika tiaki kaain te onimaki ni maroroakina kanoan te Baibara ma buuia ae kaain te onimaki, ma a kona ni butimwaea te reirei ma temanna ae tiaki kaain aia utu. E rangi n nakoraoi riki ngkana ko maroro moa ma te buu te mwaane ke te buu te aine are kaain te onimaki, bwa e aonga n nakoraoi titirakinani buuna ae tiaki kaain te onimaki bwa e kan reirei n te Baibara.
6. Tera kakawakin te tataro ngkana ko kakaaea ae ko na reirei ma ngaia n te Baibara?
6 Te Tataro: Tai iangoia bwa akea mwaakan te tataro. (Iak. 5:16) E berita Iehova bwa e na ongoraei ara bubutii ngkana a boraoi ma nanona. (1 Ioa. 5:14) E moana ana tataro ibukin ana reirei n te Baibara te tari te mwaane temanna ae e rangi n tatabetabe. E tabeaianga buuna irouna bwa e na kona n reke ana tai ke e na aki n tabeakina ana reirei n te Baibara, riki ngkana a bati ana kangaanga te aomata anne. Mangaia are e a katikui tabeaiangana iroun Iehova rinanon tataroakinan ae e na reke ana reirei n te Baibara buuna. Tao uoua te wiki imwina ao e a kaekaaki aia tataro, ngke e kaitiboo te bwaiania temanna n te ekaretia ma te mwaane ae kan reirei n te Baibara ao e a angan te tari anne bwa e na reirei ma ngaia. E korea ae kangai te buu te aine aei: “Ngkana iai ae e namakinna bwa e riaon ana kona kairan te reirei n te Baibara ma aomata, e riai ni mwanewea te bwai are e kainnanoia n ana tataro ao e na teimatoa n tataroakinna. Akea kabotauan te kimwareirei ae ti karekea ngkai.” Ko kona ni karekea am reirei n te Baibara ngkana ko teimatoa n tataroakinna, ao ko kona naba n namakina te kimwareirei ni buokaia aomata bwa a na toua “te kawai ae tiki nakon te maiu.”—Mat. 7:13, 14.