Te Reta Mairoun te Rabwata n Tautaeka

Nakoia Raora n Tabonibai:

Ai kukureira ngaira ngkai ti koroboki nakoimi ni moan te ririki ae kakawaki aei! N raatokin 2014 ao e nang koro iai ana katebubua n ririki n tautaeka ara Uea ae tangiraki ae Iesu Kristo man te tai are moan tautaeka iai i buakoia ana kairiribai.​—TaiAre.110:1, 2.

Ni moanakin te ririki ni mwakuri aei ni boowin te Watch Tower Bible and Tract Society of Pennsylvania ao te Komete ae Tabe ma Rairan te Baibara ae te Aonnaba ae Boou, e a kaotinakoa te Baibara n te taetae n Ingiriti are e a manga rinanoaki ao n rairaki n te aro ae mataata riki ae e a tauraoi ngkai ibukia aomata nako. E kamanenaia natina Iehova aika e natinia n te taamnei bwa a na katauraoa te Baibara ae te Rairai ae te Aonnaba ae Boou. (IRom 8:15, 16) Akea te nanououa bwa te koaua anne n tii ngaia are e a karika te rairai aei bwa e na okoro, ko boraoi n iango iai?

Inanon ririki aika bati ao e a tia te Komete man te Rabwata n Tautaeka ae tabe ma Rongorongo ni moanibwaia rairakin te Baibara. Ni boong aikai, e a tauraoi te Baibara ae te Rairai ae te Aonnaba ae Boou ni bwanin ke tii te iterana n taetae aika 121 mwaitiia. Ti kaungaingkami bwa kam na kaotiota ami kakaitau ae korakora nakon Iehova n te Baibara ae kam karekea. Warekia ao kananoa ami iango iai ni katoabong. Mani karaoan anne iroumi, kam na kaaniaki riki iai ma te tia Koreia ae Iehova ae te Atua.​—Iak. 4:8.

Ti a kaumakaki ngkai ti ongo bwa a kaaitara ma kangaanga tarira ma mwaanera aika tangiraki iroura. Ti ota raoi bwa n tabetai, e bae ni kangaanga bwa a na kukurei ma tariia n te onimaki. N te katoto, a a tibwa rotaki maiuia te utu teuana i Atia ngke e a tii karina naba ni mate rabwatan neiere te buu te aine. E mino te iango iai, ao a aki kona taani kuakua aika mwaatai ni kamarurunga neiei. Ai boni kananokawakira! E tabeakina ngkai buuna teuaei i nanon uabwi ma aua te aoa. A katea te katoto ae raoiroi natiia te mwaane ao aine aika uoman ngkai Kristian ngaiia n aroia ni boutokaia aia karo ma te tangira. A a tia te utu ae raoiroi aei n ikotaki ma ngkami ni kabane aika kam tokanikai i aoni kangaanga aika kakaokoro, ni kona n namakina te kimwareirei ae reke man te nanomwaaka i aani kataakin ami onimaki. (Iak. 1:2-4) A karauaki nanoia te koraki aika kabiraki ao tiibu tabemwaang iroun Iehova bwa ti na boni kukurei ngkana ti teimatoa n nanomwaaka i aani kangaanga ibukina bwa ti na kakabwaiaaki n te kaniwanga ae te maiu are aki toki!​—Iak. 1:12.

N te ririki ae nako ao aika a roko te Kauring bon 19,241,252. Ai kaungananora noraia aomata aika bati ni karinea Iehova ao Iesu Kristo n iran te botaki ae te kabanea ni kakawaki n te ririki anne ibukia ana aomata te Atua! Inanon tain te Kauring, ao e a rikirake ni korakora te takakaa n nebonebo bwa ai mirion ma mirion aika beku bwa auxiliary bwaiania ni Maati ao Eberi. Ai boni kakimwareireira anne! Ao kam aki naba kukurei n ataakin ae a kona te koraki ake a auxiliary bwaiania n ira te reirei ni bwaiania ni kabanea are e na karaoia te mataniwi n te aono ae uarereke n rokona, e ngae naba ngkana tiaki ana tai n roko namwakaina aika Maati ao Eberi? A ota raoi te koraki aika wanawana ni kakawakini kateimatoaan te marurung n te mwakuri n uarongorongo ao ni mwakuri n te ekaretia. Ngkana ti katabetabeira, ti a buokaki iai bwa ti na teimatoa n aki kaingingaki ao n tei nene, ma n totokoa ana kariri te Riaboro ni kamamaraa ara onimaki ao ni katannakoira mani kawaira.​—1Kor. 15:58.

Ai kaungananora noraia te koraki aika 277,344 ake a kaota katabuani maiuia ni bwabetitoaia n te ran i nanon te ririki ni mwakuri ae nako ao a a toua ngkai te kawai nakon te maiu ma tariia ni katobibia te aonnaba! (Mat. 7:13, 14) A kainnanoa ara boutoka te koraki aika boou aikai bwa a aonga “ni kateimatoaaki n te onimaki.” (IKoro. 2:7) Teimatoa n ikaungaunga i marenami bwa kam aonga n nanomwaaka ni karokoa te toki. (Mat. 24:13) “Taetae ni kabebeteia akana rawawata nanoia, ni boutokaiia akana mamaara, ao ni bwaina te taotaonakinnano nakoia aomata nako.” (1 Tet. 5:14) Ni kabaneana, ti bia bane n “tataro n aki toki” ni kangai: “E bia roko am tautaeka n uea.”​—1Tet. 5:17; Mat. 6:10.

Taiaoka ni butimwaea te Yearbook aei ao ti rangi n tangiringkami ni kabane aika kam tangira Iehova!

Tarimi,

Te Rabwata n Tautaeka Ibukia Ana Tia Kakoaua Iehova