Ko Kona ni Kabwaia n Taai Aika a na Roko Ngkana te Aomata ae Raoiroi Ngkoe?

I nanon tienture aika bati, a iangoia aomata bwa ngkana ko raoiroi ko na boni karekea te kabwaia nakon taai aika a na roko. N te katoto, a karinea ana taeka te tia reirei ae karineaki ae Confucius (551-479 B.C.E.) kaain te aono n Atia, ae kangai: “Te baere ko aki tangiria bwa e na karaoaki nakoim, tai karaoia nakoia tabemwaang.”a

A BATI AIKA KATAIA NI KAKARAOA AE RAOIROI

A bati aika kakoauaa bwa te aroaro ae raoiroi boni kiingin te kabwaia nakon taai aika a na roko. A kataia ni bwaina te karinerine, a karikirakei aroaro aika raraoi, a atai tabeia ao ni kakororaoi, ao a kateimatoa itiakini mataniwin nanoia. E taku Nei Linh ae kaain Vietnam: “I kakoauaa ae ngkana I bwabwaina te kakaonimaki ao te koaua, N na boni kabwaia.”

Te aine naba anne ngke e anga te amwarake nakoia naake a kainnano ao akea mwengaia.

A kairaki tabeman n aia koaua n aia Aro bwa a na kakaraoa ae raoiroi. E taku te mwaane ae Hsu-Yun mai Taiwan: “I reireinaki bwa e na kukurei imwini matena te aomata ae kakaraoa ae raoiroi, ma e na kammarakaki imwini matena te aomata ae kakaraoa ae buakaka.”

TERA MWINA?

N tokin te bong anne, e nanokawaki ao ni kua te aine anne ngke e tobwa natina.

E koaua ae ti karekei kakabwaia aika bati ngkana ti kakaraoa ae raoiroi nakoia tabemwaang. Ma a bati ake a kataia ni karaoa anne ae a noria bwa bon akea te bwai ae a karekea mai iai. E taku te aine temanna ae Shiu Ping ae mena i Hong Kong: “I a ataia ae naake a kakaraoa ae raoiroi, a aki kakabwaiaaki n taai nako. I kabanea au konaa n tabeakina au utu ao ni kakaraoa ae raoiroi. Ma e aki nakoraoi au mare ao I a tiku ma natiu ngke e kitanai buu.”

A bati aika noria bwa a aki bane n raoiroi aomata ake a taua te Aro. E taku Nei Etsuko ae kaain Tiaban: “I kaaina te botaki n Aro teuana ao I a riki bwa te tia babaire n aia waaki te roro n rikirake. I kubanako n noran te aroaro ni maiu ae aki riai, te kaiangatoa ibukin te kairiri, ao kamanenaani mwanen te Aro n te aro ae aki riai, irouia kaain au Aro.”

“I kabanea au konaa n tabeakina au utu ao ni kakaraoa ae raoiroi. Ma e aki nakoraoi au mare ao I a tiku ma natiu ngke e kitanai buu.”—SHIU PING, HONG KONG

A bwara nanoia tabeman aika taua te Aro ibukina bwa e aki reke kaniwangaia imwini karaoan ae raoiroi. Anne ae e namakinna Nei Van ae kaain Vietnam. E taku: “I katoabong ni kabooa te uaanikai, te uee, ao te amwarake, ao I kareani nakoia au bakatibu ake a a tia ni mate, ma kantaningaan ae a na kakabwaiaai nakon taai aika imwaiu. Ma n aki ongei au mwakuri aika raoiroi ao au waaki n taromauri i nanon ririki aika bati, e rotaki n te aoraki ae kakaiaki buu. Imwina, e a mate natiu te aine ngke e reirei n te aba teuana.”

E AERA NGKAI E AKI TAU KAKARAOAN AE RAOIROI?

E kakawaki kakaraoan ae raoiroi, ma e aki tau ibukini karekean te kabwaia nakon taai aika a na roko. Bukin tera? Iangoa ae taekinaki n te Koroboki ae Tabu.

A AKI BANE AOMATA NI KANI KARAOA AE RAOIROI

“E kona te tia bure ae tii temanna ni kamauna te raoiroi ae bati.”—TE MINITA 9:18.

E ngae ngkana ko kekeiaki n riki bwa te aomata ae raoiroi, ma e kona n uruanaki arom nakon taai aika imwaim, man aia bangaomata tabeman. N te katoto, n taini butinakon te aoraki ao ko ongeaba n aia kaetieti taani kairiri ao ko taua raroam ma aomata. Ma tera ae e na riki ngkana iai aika aki kan ongeaba? E kona aroaroia n rotii marurungia naake a kataia ni karaoa ae riai.

E KONA NI KAIRUA AIA IANGO AOMATA IBUKIN TE BWAI AE RAOIROI KE AE BUAKAKA

“Iai te kawai ae taraa n eti iroun te aomata, ma n tokina ao e boni kairiri nakon te mate.”—TAEKA N RABAKAU 14:12.

A bati aomata aika karaoi baike a taku bwa a raoiroi, ma a a kunea imwina bwa e kairua aia iango. E ngae ngke a iangoia bwa e raoiroi te baere a karaoia, ma a bon rotakibuaka naba ni mwin aia motinnano.

E BIBITAKI TE MAIU AEI

“Kam aki ataia bwa tera aroni maiumi ningabong.”—IAKOBO 4:14.

E ngae ngke e rangi n raoiroi te aomata, ma e kona ni karina ni mate. N te katoto, ni butinakon te COVID-19 a bati taan ibuobuoki aika bua maiuia. Ke iangoa te baere e rinanona Nei Liting ae kaain Tiaina, are e mate tamana n te kabuanibwai n te kaa. E taku neiei: “I aki ota bwa e aera ngkai e na mate te aomata ae akoi. E mwakuri korakora tamau, e nanorinano, ao e bwabwaina te koaua. Ma bon tii ngaia kaain te kaa ae mate.”

Ngkana ngaia bwa kakaraoan ae raoiroi e aki tau ibukini karekean te kabwaia nakon taai aika a na roko, ti na kangaa ni karekea anne? Ibukini kaekaan anne, ti kainnanoa te kairiri ae kona n onimakinaki ae e na kaekai ara titiraki ao ni kaota te kawai ae ti na karekea iai te kabwaia nakon taai aika a na roko. E na reke ia te kairiri anne?

a Ibukini kabwarabwaraan riki ana reirei Confucius, nora mwakoro 7, barakirabe 31-35, n te boki ae Mankind’s Search for God, ae boreetiaki irouia Ana Tia Kakoaua Iehova ao e kona n reke n te atureti n te intanete ae www.pr418.com.